Молитвы об упокоении
МОЛИТВЫ ОБ УСОПШИХ
ЧИН ЗАУПОКОЙНОЙ ЛИТИИ И МОЛИТВЫ ОБ УСОПШИХ ПРАВОСЛАВНЫХ ХРИСТИАНАХ
Чин заупокойной литии, совершаемой мирянином[1]
Молитвами святых отец наших, Господи Иисусе Христе Боже наш, помилуй нас. Аминь.
Святый Боже, Святый Крепкий, Святый Безсмертный, помилуй нас. (Трижды)
Слава Отцу и Сыну и Святому Духу, и ныне и присно и во веки веков. Аминь.
Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради.
Господи, помилуй. (Трижды)
Слава Отцу и Сыну и Святому Духу, и ныне и присно и во веки веков. Аминь.
Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.
Тропари, глас 4-й
Со духи праведных скончавшихся душу раба Твоего [или рабы Твоея], Спасе, упокой, сохраняя ю во блаженней жизни, яже у Тебе, Человеколюбче.
В покоищи Твоем, Господи, идеже вси святии Твои упокоеваются, упокой и душу раба Твоего [или рабы Твоея], яко един еси Человеколюбец.
Слава Отцу и Сыну и Святому Духу.
Ты еси Бог, сошедый во ад и узы окованных разрешивый, Сам и душу раба Твоего [или рабы Твоея] упокой.
И ныне и присно, и во веки веков. Аминь.
Едина Чистая и Непорочная Дево, Бога без семене рождшая, моли спастися души его [или ея].
Господи, помилуй. (40 раз)
[Аще изволиши, приложи сия:
Кондак, глас 8-й
Со святыми упокой, Христе, душу раба Твоего [или рабы Твоея], идеже несть болезнь, ни печаль, ни воздыхание, но жизнь безконечная.
Икос
Сам Един еси Безсмертный, сотворивый и создавый человека; земнии убо от земли создахомся, и в землю туюжде пойдем, якоже повелел еси, Создавый мя и рекий ми: яко земля еси и в землю отыдеши, аможе вси человецы пойдем, надгробное рыдание творяще песнь: аллилуиа, аллилуиа, аллилуиа.]
Таже:
Честнейшую Херувим и славнейшую без сравнения Серафим, без истления Бога Слова рождшую, сущую Богородицу Тя величаем. (Поклон)
Слава Отцу и Сыну и Святому Духу, и ныне и присно и во веки веков. Аминь.
Господи, помилуй. (Трижды)
Молитвами святых отец наших, Господи Иисусе Христе, Боже наш, помилуй нас. Аминь.
И поем: Вечная память. (Трижды)
Молитва ко Господу о всяком усопшем
Помяни, Господи Боже наш, в вере и надежди живота вечнаго усопшаго раба Твоего (или усопшую рабу Твою) [имя] и яко Благ и Человеколюбец, отпущаяй грехи и потребляяй неправды, ослаби, остави и прости вся вольная его (или ея) согрешения и невольная, возставляя его (или ю) во святое Второе пришествие Твое в причастие вечных Твоих благ, ихже ради в Тя Единаго верова, истиннаго Бога и Человеколюбца. Яко Ты еси воскресение и живот, и покой рабу Твоему (или рабе Твоей) [имя], Христе Боже наш, и Тебе славу возсылаем, со Безначальным Твоим Отцем и с Пресвятым Духом, ныне и присно и во веки веков. Аминь.
Молитва ко Господу за внезапно умершего
Господи Иисусе Христе, Владыко живота и смерти, Ты рекл еси в святем Твоем Евангелии: бдите, не весте бо, егда приидет Сын Человеческий, в оньже час не мните, Сын Человеческий приидет. Но мы, земнии и грешнии, предавшеся печалем и сластем житейским, забвению предаем час смерти своея, и тако призываеми бываем к Тебе, Судие неба и земли, внезапу, в час, в оньже не чаяхом и не мнихом. Тако внезапу призван бысть к Тебе усопший раб Твой, брат наш (имя). Неизследимы и непостижимы пути дивнаго Твоего смотрения о нас, Господи Спасителю! Смиренно преклоняю главу свою пред сими Твоими путями, Господи Владыко, и молю Тя усердною моею верою: призри с высоты святаго жилища Твоего и осени мя Твоею благодатию, да исправится молитва моя сия пред Тобою, яко кадило благовонное. Премилостиве Господи, услыши молитву мою за раба Твоего, по неисповедимым судьбам Твоим внезапу похищеннаго от нас смертию; пощади и помилуй претрепетную его душу, позванную к нелицеприятному Твоему суду в час, в оньже не чаявше. Да не яростию Твоею обличиши ю, ниже гневом Твоим накажеши ю; но пощади и помилуй ю, ради крестных заслуг Твоих и, молитв ради Пречистыя Твоея Матере и всех святых Твоих, прости ей вся согрешения вольная и невольная, яже словом, яже делом, яже ведением и неведением. Аще и восхищен бысть раб Твой (имя), но обаче в жизни сей верова в Тя и исповеда Тя, Бога и Спаса миру Христа, и на Тя упование имяше: сию убо веру и сие упование вместо дел вмени. Милосерде Господи! Ты не хощеши смерти грешника, но милостиво приемлеши от него и за него вся, ко обращению и спасению соделоваемая, и Сам благоустрояеши путь его, еже живу быти ему. Молю убо Тя, благоволи такожде воспомянути вся дела милосердия и вся моления, зде на земли творимая за усопшаго раба Твоего, благоволи прияти и мою молитву о нем купно с молитвами священнослужителей Святыя Церкве Твоея, и отпустити душе его вся согрешения, умирити смятенное сердце его, пощадити его от вечныя муки и успокоити в месте светле. Яко Твое есть, еже миловати и спасати ны, Христе Спасе наш, и Тебе единому подобает неизреченная благость и вечная слава со Отцем и Святым Духом, и ныне и присно и во веки веков. Аминь.
Молитва ко Господу об усопших родителях
Господи Иисусе Христе, Боже наш! Ты еси сирых хранитель, скорбящих прибежище и плачущих утешитель. Прибегаю к Тебе аз сирый, стеня и плача, и молюся Тебе: услыши моление мое и не отврати лица Твоего от воздыханий сердца моего и от слез очей моих. Молюся Тебе, милосердый Господи, утоли скорбь мою о разлучении с родившим и воспитавшим мя родителем моим (имя); душу же его, яко отшедшую к Тебе с истинною верою в Тя и твердою надеждою на Твое человеколюбие и милость, приими в Царство Твое Небесное. Преклоняюся пред Твоею святою волею, еюже отъят бысть у мене, и прошу Тя, не отыми точию от него милости и благосердия Твоего. Вем, Господи, яко Ты, Судия мира сего, грехи и нечестия отцев наказуеши в детях, внуках и правнуках даже до третияго и четвертаго рода; но и милуеши отцев за молитвы и добродетели чад их, внуков и правнуков. С сокрушением и умилением сердца молю Тя, милостивый Судие, не наказуй вечным наказанием усопшаго незабвеннаго для мене раба Твоего, родителя моего (имя), но отпусти ему вся согрешения его вольная и невольная, словом и делом, ведением и неведением, сотворенная им в житии его зде на земли, и по милосердию и человеколюбию Твоему, молитв ради Пречистыя Богородицы и всех святых, помилуй его и вечныя муки избави. Ты, милосердый Отче отцев и чад, даруй мне во вся дни жизни моея до последняго издыхания моего не преставати памятовати о усопшем родителе моем в молитвах своих и умоляти Тя, праведнаго Судию, да вчиниши его в месте светле, в месте прохладне и в месте покойне, со всеми святыми, отнюдуже отбеже всяка болезнь, печаль и воздыхание. Милостиве Господи! Приими днесь о рабе Твоем (имя) теплую молитву мою сию и воздай ему воздаянием Твоим за труды и попечения воспитания моего в вере и христианском благочестии, яко научившему мя первее всего ведети Тя, своего Господа, в благоговении молитися Тебе, на Тебе единаго уповати в бедах, скорбех и болезнех и хранити заповеди Твоя; за благопопечение его о моем духовном преуспеянии, за тепле приносимыя им о мне моления пред Тобою и за все дары, им испрошенныя мне от Тебе, воздай ему Своею милостию, Своими небесными благами и радостями в вечном Царствии Твоем. Ты бо еси Бог милостей и щедрот, и человеколюбия, Ты покой и радость верных рабов Твоих, и Тебе славу возсылаем со Отцем и Святым Духом, ныне и присно и во веки веков. Аминь.
Молитва ко Господу об усопших наставниках и воспитателях
Боже разума, Боже чудес, живый приснотекущий Источниче премудрости! Молю Тя, помяни во Царствии Твоем души усопших раб Твоих, наставников моих (имена), яко просвещавших мой ум и вселявших в сердце мое дух премудрости и разума, дух совета и крепости, дух ведения и правды, истины и добродетели. Молю Тя, Владыко, милостив буди о гресех их; ослаби, прости и отпусти им вся согрешения, елика сотворили в житии сем, словом, делом, помышлением, ведением и неведением. Воздаждь им, света Подателю, милостию Твоею, щедротами Твоими за вся попечения их о нашем духовном преуспеянии; яви им милость благоутробия Твоего за благая их поучения, за благопотребные их советы и вразумления, яже посеяваху и насаждаху во умах и сердцах наших, яко благия семена; воздаждь им за вся благая небесными и вечными Твоими благами, да узрят в Тебе, Боже, лицем к лицу вечную Истину и да озаряются и наслаждаются трисиятельным Светом Ея в безконечные веки во Царствии Твоем. Аминь.
Молитва ко Господу об усопших детях
Господи Иисусе Христе Боже наш, Владыко живота и смерти, Утешителю скорбящих! С сокрушенным и умиленным сердцем прибегаю к Тебе и молюся Ти: помяни, Господи, во Царствии Твоем усопшаго раба Твоего, чадо мое (имя), и сотвори ему вечную память. Ты, Владыко живота и смерти, даровал еси мне чадо сие. Твоей же благой и премудрой воле изволися и отъяти е у мене. Буди благословенно имя Твое, Господи. Молю Тя, Судие неба и земли, безконечною любовию Твоею к нам, грешным, прости усопшему чаду моему вся согрешения его, вольная и невольная, яже словом, яже делом, яже ведением и неведением. Прости, Милостиве, и наша родительская согрешения, да не пребудут они на чадах наших: вем, яко множицею согрешихом пред Тобою, множицею не соблюдохом, не сотворихом, якоже заповедал еси нам. Аще же усопшее чадо наше, нашея или своея ради вины, бяше в житии сем работая миру и плоти своея, а не паче Тебе, Господу и Богу своему: аще возлюби прелести мира сего, а не паче слово Твое и заповеди Твоя, аще предавшеся сластем житейским, а не паче сокрушению о гресех своих, и в невоздержании бдение, пост и молитву забвению предавше, молю Тя усердно: прости, Преблагий Отче, чаду моему вся таковая прегрешения его, прости и ослаби, аще и ино злое сотвори в житии сем, Христе Иисусе! Ты воскресил еси дщерь Иаира по вере и молитве отца ея, Ты исцелил еси дщерь жены хананеянки по вере и прошению матере ея, услыши убо и молитву мою, не презри и моления моего о чаде моем. Прости, Господи, прости вся согрешения его и, простив и очистив душу его, изыми муки вечныя и всели ю со всеми святыми Твоими, от века благоугодившими Тебе, идеже несть болезнь, ни печаль, ни воздыхание, но жизнь безконечная. Яко несть человек, иже жив будет и не согрешит, Ты един кроме греха, да егда имаши судити мирови, услышит чадо мое превожделенный глас Твой: приидите, благословеннии Отца Моего, и наследуйте уготованное вам царствие от сложения мира. Яко Ты еси Отец милостей и щедрот, Ты живот и воскрешение наше, и Тебе славу возсылаем со Отцем и Святым Духом, ныне и присно и во веки веков. Аминь.
Молитва ко Господу об усопших, обидевших и ненавидевших нас
Владыко Человеколюбче, Господи Иисусе Христе, Сыне Божий! Ты, по неизреченной любви Своей к нам, грешным и недостойным рабам Твоим, сияеши солнце Свое на злыя и благая, дождиши на праведныя и неправедныя; Ты, Преблагий, заповедуеши нам любити врагов наших, добро творити ненавидевшим и обидевшим нас, благословляти клянущих нас и молитися за творящих нам напасть и изгоняющих нас. Ты, Спасителю наш, на крестном древе и Сам прощал еси врагов Твоих, хульно ругавшихся Тебе, и молился за мучителей Твоих; Ты дал еси образ нам, да последуем стопам Твоим. Ты, о дражайший Искупителю наш, научивый нас прощати врагов, повелел еси вкупе и молитися за них; молюся убо Тебе, Иисусе Прещедрый, Сыне и Агнче Божий, вземляй грехи мира, прости отшедшаго к Тебе раба Твоего (имя) и приими его не яко врага моего, соделавшаго ми злая, но яко согрешившаго пред Тобою. Молю Тя, безпредельный в милостех, Господи Боже наш, приими с миром пресельшагося к Тебе от мира сего без примирения со мною; спаси и помилуй его, Боже, Твоею великою и богатою милостию. Господи, Господи! Да не яростию Твоею, ниже гневом Твоим накажеши раба Твоего, творившего ми напасть, оскорбление, поношение и злохуление; молю Тя, не помяни сих прегрешений его, но отпусти и прости ему вся сия по человеколюбию Твоему, и помилуй по велицей Твоей милости. Молю Тя, о Преблагий и Прещедрый Иисусе, яко уз адовых Решителя, смерти Победителя, грешных Спасителя, разреши рабу Твоему сии согрешения, имиже, яко пленицами ада, связася усопший. Ты бо, Господи, рекл еси: аще не отпущаете человеком согрешения их, ни Отец ваш Небесный отпустит вам согрешений ваших; о да не будет сего! Со умилением и сокрушением сердца умоляю Тя, Спасителю Премилостивый, разреши ему сии узы злых наваждений и козней диавольских, не погуби усопшаго гневом Твоим, но отверзи ему, Жизнодавче, двери милосердия Твоего, да внидет во святый Твой град, хваля всесвятое и великолепое имя Твое и воспевая неизреченную любовь Духа Твоего Святаго к погибающим грешникам. И якоже Ты, Благость вечная, помянул еси на Кресте благоразумнаго разбойника, с Тобою распята, путесотворив ему вход в рай, сице, молю Тя, Всещедрый, помяни во Царствии Твоем и отшедшаго к Тебе раба Твоего (имя) и не затвори, но отверзи ему двери милосердия Твоего; Твое бо есть, еже миловати и спасати ны, Боже наш, и Тебе славу возсылаем со Безначальным Твоим Отцем, Пресвятым и Благим и Животворящим Твоим Духом, ныне и присно и во веки веков. Аминь.
Молитва ко Господу вдовца об усопшей супруге
Христе Иисусе, Господи и Вседержителю! В сокрушении и умилении сердца моего молюся Тебе: упокой, Господи, душу усопшия рабы Твоея (имя) в Небесном Царствии Твоем. Владыко Вседержителю! Ты благословил еси супружеский союз мужа и жены, егда рекл еси: не добро быти человеку единому, сотворим ему помощника по нему. Ты освятил еси союз сей во образ духовнаго союза Христа с Церковью. Верую, Господи, и исповедую, яко Ты благословил еси сочетати и мене сим святым союзом с единою из рабынь Твоих. Твоей же благой и премудрой воле изволися отъяти у мене сию рабу Твою, юже дал еси мне, яко помощницу и сопутницу жизни моея. Преклоняюся пред сею Твоею волею, и молюся Ти от всего сердца моего: приими моление мое сие о рабе Твоей (имя) и прости ей, аще согреши словом, делом, помышлением, ведением и неведением; аще земное возлюби паче небеснаго; аще о одежде и украшении тела своего печеся паче, неже о просвещении одеяния души своея; или аще небреже о чадех своих; аще преогорчи кого словом или делом; аще проропта в сердце своем на ближняго своего или осуди кого, или ино что от таковых злых содела. Вся сия прости ей, яко Благий и Человеколюбивый: яко несть человек, иже жив будет и не согрешит. Не вниди в суд с рабою Твоею, яко созданием Твоим, не осуди ю по грехом ея на вечныя муки, но пощади и помилуй по велицей милости Твоей. Молю и прошу Тя, Господи сил, даруй ми по вся дни жизни моея не преставати молитися о усопшей рабе Твоей, и даже до кончины живота моего просити ей у Тебе, Судии всего мира, оставления согрешений ея. Да якоже Ты, Боже, положил еси на главу ея венец от камене честна, венчая ю зде на земли, тако увенчай ю вечною Твоею славою в Небесном Царствии Твоем со всеми святыми, тамо ликующими, да вкупе с ними вечно воспевает всесвятое имя Твое с Отцем и Святым Духом. Аминь.
Молитва ко Господу вдовицы об усопшем супруге
Христе Иисусе, Господи и Вседержителю! Ты плачущих утешение, сирых и вдовиц заступление. Ты рекл еси: призови Мя в день скорби твоея, и изму тя. Во дни скорби своея прибегаю к Тебе аз и молюся Ти: не отврати лица Твоего от мене и услыши моление мое, приносимое Тебе со слезами. Ты, Господи Владыко всяческих, благословил еси сочетати мя со единем из рабов Твоих, во еже быти нам едино тело и един дух; Ты дал еси мне сего раба, яко сожителя и защитника. Твоей же благой и премудрой воле изволися отъяти от мене сего раба Твоего и оставити мя едину. Преклоняюся пред сею Твоею волею и к Тебе прибегаю во дни скорби моея; утоли печаль мою о разлучении с рабом Твоим, другом моим. Аще отъял еси его от мене, не отыми от мене Твоея милости. Якоже некогда приял вдовицы две лепты, тако приими и сие моление мое. Помяни, Господи, душу усопшаго раба Твоего (имя), прости ему вся согрешения его, вольная и невольная, аще словом, аще делом, аще ведением и неведением, не погуби его со беззаконьми его и не предаждь вечной муке, но по велицей милости Твоей и по множеству щедрот Твоих ослаби и прости вся согрешения его и вчини его со святыми Твоими, идеже несть болезнь, ни печаль, ни воздыхание, но жизнь безконечная. Молю и прошу Тя, Господи, даруй ми во вся дни жизни моея не преставати молитися о усопшем рабе Твоем, и даже до исхода моего просити у Тебе, Судии всего мира, оставления всех согрешений его и вселения его в небесныя обители, яже уготовал еси любящим Тя. Яко аще бо и согреши, но не отступи от Тебе и несумненно Отца и Сына и Святаго Духа православно даже до последняго своего издыхания исповеда; темже веру его, яже в Тя, вместо дел ему вмени: яко несть человек, иже жив будет и не согрешит, Ты един кроме греха, и правда Твоя – правда во веки. Верую, Господи, и исповедую, яко Ты услышиши моление мое и не отвратиши лица Твоего от мене. Видя вдовицу, зельне плачущу, умилосердився, сына ея, на погребение несома, воскресил еси: тако умилосердився, утиши и скорбь мою. Якоже отверзл еси рабу Твоему Феофилу, отшедшему к Тебе, двери милосердия Твоего и простил ему прегрешения его по молитвам Святыя Церкви Твоея, внемля молитвам и милостыням супруги его; сице и аз молю Тя, приими и мое моление о рабе Твоем, и введи его в жизнь вечную. Яко Ты еси упование наше, Ты еси Бог, еже миловати и спасати, и Тебе славу возсылаем со Отцем и Святым Духом, ныне и присно и во веки веков. Аминь.
Молитва ко Господу о скончавшихся вне своего Отечества, безродных, нищих и убогих
Господи Иисусе Христе Боже наш, сирых защитниче, странных наставниче, плавающих кормчий, обуреваемых пристанище, с путешествущими путешествующий, утешение плачущих, нищих кормителю! Молим Тя, Многомилостиве Господи, помяни во Царствии Твоем души усопших раб Твоих (имена), в вере преставльшихся к Тебе, но отшедших в земли чуждей, без матерняго Святыя Твоея Церкви напутствия и благословения. Приими, Владыко, под Твое благоутробие рабов, преставльшихся тамо в скорби и печали о своих присных и ближних, имже никтоже бе утешаяй в страшный час смерти, идеже никтоже бе возносяй Тебе теплое моление о благотишном прохождении их от сея привременныя жизни в мир горний. Темже убо молим Тя, Преблагий, молим Тя, Вездесущий и Присносущный Господи, воззри на сих рабов Твоих благосердием Твоим, прости им всякое согрешение вольное и невольное, словом и делом содеянное и вся, яже в ведении и неведении. Умоляем Тя молитвами и предстательством Матере Твоея, Пресвятыя Владычицы нашея Богородицы, и всех святых, не погуби отшедших к Тебе со беззаконием их, но сотвори им велию милость Твою, яви им Твое человеколюбие и щедроты Твоя, приведи их к тихому Твоему пристанищу и водвори их в дому Твоем.
Еще молимся о упокоении душ усопших раб Твоих (имена), отшедших к Тебе безродными и никогоже от присных своих о себе молитвенников имущими, разве Святыя Твоея Церкви; сего ради молим Тя, Господи, приими о сих наше моление: прости им вся согрешения и помилуй их по велицей Твоей милости; всели их во святом жилище Твоем, да обрящут в Тебе покой, яко в Спасителе и Искупителе рода человеческаго.
Господи, Господи! Аще усопшия рабы Твоя, иже быша в нищете и убожестве, за чашу студеныя воды, за укрух хлеба, за едину лепту, поданныя им во имя Твое, приносили быша Тебе моления о нас, прошения и благодарения; аще сирые благословляли быша благотворящую им руку, моляся о ниспослании нам благ Твоих, того убо ради молим Тя ныне, Христе Боже наш, и мы о них: помяни убо во Царствии Твоем сих, яко меньших, по реченному Тобою, братий Твоих; прости им всякое прегрешение вольное и невольное, покрый их Твоим благоутробием и всели их во святый чертог Твой; и яко получавших зде на земли пропитание чрез призывание святаго Твоего имене, препитай тамо на небеси от тука дома Твоего, и да утешатся, и да насладятся нескончаемою радостию вси истинно плакавшие к Тебе; водвори их со святыми Твоими, да вси купно у Тебе, Судии живых и мертвых, составят сонмы избранных Твоих, и тако да славят, хвалят и превозносят безпредельное Твое милосердие в безпредельные веки. Аминь.
Молитва ко Господу о скончавшихся после тяжкой и продолжительной болезни
Господи, Господи! Праведен еси Ты, и суд Твой праведен: Ты, в предвечной Своей Премудрости, положил еси предел жизни нашея, егоже никтоже прейдет. Премудры Твоя законы, неизследимы путие Твоя! Ты повелеваеши Ангелу смерти изъяти от тела душу у младенца и старца, у мужа и юноши, у здраваго и больнаго по несказанным и неведомым нам судьбам Твоим; но веруем, яко на сие есть Твоя святая воля, зане, по суду правды Твоея, Ты, Преблагий Господи, яко Премудрый и Всемогущий и Всеведущий Врач душ и телес наших, болезни и недуги, беды и злоключения посылаеши человеку, яко врачевство духовное. Ты поражаеши его и исцеляеши, умерщвляеши в нем мертвенное и оживотворяеши безсмертное и, яко чадолюбивый Отец, наказуеши, егоже любиши, биеши всякаго сына, егоже приемлеши; молим Тя, Человеколюбче Господи, приими преставльшагося к Тебе раба Твоего (имя), егоже взыскал еси человеколюбием Своим, наказавый тяжкою болезнию телесною, во еже спасти душу от болезни смертныя; и аще вся сия приял есть от Тебе со смиренномудрием, терпением и любовию к Тебе, яко вседетельному Врачу душ и телес наших, яви убо ему днесь богатую милость Твою, яко претерпевшему вся сия грех своих ради. Вмени ему, Господи, сию привременную тяжкую болезнь в некое наказание за прегрешения, содеянныя в сей юдоли плача, и исцели душу его от недугов греховных. Помилуй, Господи, помилуй взысканнаго Тобою и, наказаннаго временно, молю Тя, не накажи лишением вечных Твоих небесных благ, но сподоби его наслаждатися ими во Царствии Твоем. Аще же усопший раб Твой, не разсуждая в себе, чесо ради бысть сие прикосновение целительныя и промыслительныя десницы Твоея, стропотно что рече в себе, или по неразумию своему возропта в сердце своем, яко бремя сие возомни себе неудобоносимым, или по немощи естества своего, стужаше долгою болезнию и огорчися злоключением, молим Тя, Долготерпеливе и Многомилостиве Господи, прости ему сия согрешения по безпредельной Твоей милости и безприкладному Твоему милосердию к нам, грешным и недостойным рабам Твоим, прости ради любви Твоей к роду человеческому; аще же беззакония его превзыдоша главу его, болезнь же и недуги не подвигоша его к полному и искреннему покаянию, умоляем Тя, Начальниче жизни нашея, умоляем Твоими искупительными заслугами, помилуй и спаси, Спасе, раба Твоего от вечныя смерти. Господи Боже, Спасителю наш! Ты, по вере в Тя, даровал еси прощение и отпущение грехов, даровав помилование и исцеление тридесятиосмилетнему разслабленному, егда рекл еси: отпущаются тебе греси твои; с сею же верою и упованием на Твою благость, прибегаем к Твоему, о Иисусе Прещедрый, неизреченному милосердию и во умилении сердца нашего молим Тя, Господи: рцы убо и днесь тако слово помилования, слово отпущения грехов усопшему приснопоминаемому нами рабу Твоему (имя), да исцелеет духовне и да вселится в месте светле, в месте покойне, идеже несть болезнь, ни печаль, ни воздыхание, и да пременятся тамо болезни и недуги его, слезы страданий и скорбей в источник радости о Дусе Святе. Аминь.
Молитва ко Господу о скончавшихся в состоянии душевного заболевания
Дивна дела Твоя, Господи, и величию Твоего разума несть конца! Коль многообразными и неизследимыми стезями преводиши Ты люди Своя в веце сем от дольняго мира к горнему! Разоряеши бо премудрость премудрых, отвергаеши разум разумных, высокия и гордыя расточаеши и смиряеши, сильныя и доброродныя низлагаеши и посрамляеши; буия же и смиренныя, уничиженныя, немощныя и худородныя избираеши, возвышаеши, укрепляеши и прославляеши, открывая премудрыя и благия советы всепромыслительнаго смотрения Твоего младенцам и утаевая их от тех, иже о себе мнятся быти совершени умы своими. Кто доволен есть уразумети вся судьбы Твоя, Боже, имиже, по богатству благости Своея и долготерпения, вразумляеши, научаеши и спасаеши нас, грешных и недостойных рабов Твоих? Овому прилагаеши смышление и даруеши здравое разсуждение, оваго же обуяеши, у оваго исторгаеши сердце каменно и влагаеши плотяно; овому низпосылаеши крепость и бодрость телесну, вкупе же и мужество душевно; овому же болети душею и телом попускаеши; оваго радуеши, овому же печаловаться хощеши; оваго живиши, оваго же мертвиши. О великий и неисповедимый в тайнах Своего смотрения о нас Господи Боже наш! Вем и от всего сердца исповедую пред Тобою, яко и со усопшим приснопоминаемым мною рабом Твоим (имя) не без премудраго и благаго изволения и смотрения Твоего бысть сокрушительный недуг душевный, егоже истинная вина и вся сила Тебе единому точию ведома суть; темже благоговейно повергаяся пред Твоими, Господи, неизреченными, но выну спасительными судьбами, со умилением вопию Ти: приклони ухо Твое к молению моему и человеколюбне вонми ми, и скоро услыши молитву мою о сем рабе Твоем. Недоумеваю бо и зело скорблю о необычайных судьбах его, зане, не якоже иныя человецы смысленнии, самосознательнии и твердыя в памяти, отъиде к Тебе от нас, но яко лишен сый ума, извращен в смысле, болезненно опечалован сердцем, не имеяй самообладательныя силы своего изволения, неистово и свирепо являющися в деяниях своих. Господи, Господи! Что сие есть неудоборазумеваемое некое в душевней жизни человечестей явление? Како созданный по образу и по подобию Твоему впадает в крайнее неразумие, безумствует, неистовствует и содевает неподобная? Что убо сие есть с дыханием жизни Твоея, Боже Вседержителю? Воистину по Твоим, Господи, неизследимым путям и неизреченным советам вся сия премудро и благим намерением Тобою устрояются: наводиши бо, яко привременное наказание, и попускаеши толикая нестроения и превращения в чудном составе существа нашего, да сокровенными у Тебе тако путями устроиши, возставиши и неразсудным, злым и лукавым обычаем учинена суть, и тако видимая злая у человек, у Тебе, Всеблагий Владыко, приснотекущий Источниче премудрости и разума, у Тебе обращаются во благая. Того ради смиренно припадая к неистощимым щедротам Твоим, Человеколюбче Спасе наш, молю Тя, Подателю благих, приими усопшаго раба Твоего (имя), яко тако люте болезновавшаго и страдавшаго в житии сем, приими милостию Твоею, да не пробавиши, Блаже, и тамо, во стране отшедших от нас братий наших, стужения и страдания его, яже суть безмерно лютейша неже зде земная; но отврати от него прещение гнева Твоего и воззри на него пресветлым оком милосердия Твоего; но не предаждь люте погибнути во веки, зане и Сам, Премилосердый Спасе, не хощеши смерти грешника, не хощеши, да кто погибнет, Сладчайший Иисусе Христе, Сыне Божий, исцеляяй неисцельно недугующих телом, прокаженных очищаяй и бесных творяй смыслящими! Молю Тя, Господи, исцели душу усопшаго раба Твоего (имя), очисти его от всех вольных и невольных, ведомых и неведомых прегрешений и грехопадений его; Сам, Спасе, очисти, якоже не возмогшаго разумно и в здравой памяти исповедатися Тебе в них, того ради умилосердися о нем, Господи, и возми от него все тяжкое бремя грехов, вземляй грехи мира! Покрый и оправдай его Своею благодатию, и имиже веси судьбами спаси раба Твоего от избранных Твоих, но сподоби общником быти небесных ликостояний, яко убогаго раба Твоего, иже зде на земли отлученна и отчужденна себе имяше от сродников своих, другов и ближних, и не лиши его Небеснаго Твоего Царствия, яко лишенна зде на земли видети благая Твоя и оставленна влачити дни своя, исполненнии горькоплачевных деяний: того ради молю Тя, Господи: упокой его со святыми Твоими в дому Отца Твоего, с Нимже Тебе, Избавителю и Жизнодавцу нашему, купно со Пресвятым Твоим Духом славу возсылаем всегда, ныне и присно и во веки веков. Аминь.
Моление о упокоении православных воинов, за веру и Отечество на поле брани убиенных
Непобедимый, непостижимый и крепкий во бранех Господи Боже наш! Ты, по неисповедимым судьбам Своим, овому посылаеши Ангела смерти под кровом его, овому на селе, овому на мори, овому же на поле брани от оружий бранных, изрыгающих страшныя и смертоносныя силы, разрушающия телеса, расторгающия члены и сокрушающия кости ратующих; веруем, яко по Твоему, Господи, премудрому смотрению, такову приемлют смерть защитники веры и Отечества. Молим Тя, Преблагий Господи, помяни во Царствии Твоем православных воинов, на брани убиенных, и приими их в небесный чертог Твой, яко мучеников изъязвленных, обагренных своею кровию, яко пострадавших за Святую Церковь Твою и за Отечество, еже благословил еси, яко достояние Свое. Молим Тя, приими убо отшедших к Тебе воинов в сонмы воев Небесных Сил, приими их милостию Твоею, яко павших во брани за независимость земли Русской от ига неверных, яко защищавших от врагов веру Православную, защищавших Отечество в тяжкие годины от иноплеменных полчищ; помяни, Господи, и всех, добрым подвигом подвизавшихся за древнехранимое апостольское Православие, за освященную и в язык свят избранную Тобою землю Русскую, в нюже враги Креста и Православия приношаху и огнь, и меч. Приими с миром души раб Твоих (имена), воинствовавших за благоденствие наше, за мир и покой наш, и подаждь им вечное упокоение, яко спасавшим грады и веси и ограждавшим собою Отечество, и помилуй павших на брани православных воинов Твоим милосердием, прости им вся согрешения, в житии сем содеянная словом, делом, ведением и неведением. Призри благосердием Твоим, о Премилосердый Господи, на раны их, мучения, стенания и страдания, и вмени им вся сия в подвиг добрый и Тебе благоугодный; приими их милостию Твоею, зане лютыя скорби и тяготу зде прияша, в нуждех, тесноте, в трудех и бдениих быша, глад и жажду, изнурение и изнеможение претерпеша, вменяеми быша яко овцы заколения. Молим Тя, Господи, да будут раны их врачевством и елеем, возлиянным на греховныя язвы их. Призри с небесе, Боже, и виждь слезу сирых, лишившихся отцев своих, и приими умиленныя о них мольбы сынов и дщерей их; услыши молитвенныя воздыхания отцев и матерей, лишившихся чад своих; услыши, благоутробне Господи, неутешных вдовиц, лишившихся супругов своих; братии и сестер, плачущих о своих присных, и помяни мужей, убиенных в крепости сил и во цвете лет, старцев, в силе духа и мужества; воззри на сердечныя скорби наша, виждь сетование наше и умилосердися, Преблагий, к молящимся Тебе, Господи! Ты отъял еси от нас присных наших, но не лиши нас Твоея милости: услыши молитву нашу и приими милостивно отшедших к Тебе приснопоминаемых нами рабов Твоих (имена); воззови их в чертог Твой, яко доблих воинов, положивших живот свой за веру и Отечество на полях сражений; приими их в сонмы избранных Твоих, яко послуживших Тебе верою и правдою, и упокой их во Царствии Твоем, яко мучеников, отшедших к Тебе израненными, изъязвленными и в страшных мучениях предавших дух свой; всели во святый Твой град всех приснопоминаемых нами рабов Твоих (имена), яко воинов доблих, мужественно подвизавшихся в страшных приснопамятных нам бранех; облецы их тамо в виссон светел и чист, яко зде убеливших ризы своя в крови своей, и венцев мученических сподоби; сотвори их купно участниками в торжестве и славе победителей, ратоборствовавших под знаменем Креста Твоего с миром, плотию и диаволом; водвори их в сонме славных страстотерпцев, добропобедных мучеников, праведных и всех святых Твоих. Аминь.
Молитва ко Пресвятой Богородице об усопших
О Пресвятая Госпоже Владычице Богородице! К Тебе прибегаем, Чистая: Ты бо еси стена необоримая, предстательство и покров всем, прибегающим к Тебе с верою и упованием. Молим Тя, Преблагословенная: услыши молитву недостойных раб Твоих и предстани за усопшия рабы Твоя (имена). Ты присно ходатайствуеши о православно чтущих Тя и прибегающих к Покрову Твоему; обаче ходатайство Твое, Владычице, наипаче по смерти нашей нам благопотребно является. Темже молим Тя, о Пресвятая Богородице, Владычице мира, надеждо ненадежных: буди днесь Ходатаица к Рождшемуся от Тебе за усопшия рабы Твоя, и умоли Сына Твоего, Бога нашего дати нам прощение и оставление прегрешений: много бо может моление Матернее ко благосердию Владыки. От Тебе Господь всяко слово прошения приемлет: приими убо и Ты наша молитвы и моления о душах усопших раб Твоих. Помози им, Владычице, Матерним Твоим ко Господу дерзновением достигнути тихаго пристанища в Небеснем Иерусалиме; помози им, Заступнице усердная, непостыдно предстати на страшнем втором Пришествии Сына Твоего, идеже кийждо от своих дел или прославится, или постыдится; помози им, Благодатная, пред лицем Седящаго на Престоле славы оправдитися, да не постыдятся пред Ангелы и всеми святыми, ниже да будут бесом радование. О Всепетая Мати, Владычице Богородице! Молим Тя, заступи, спаси, сохрани и от будущия изми муки усопшия рабы Твоя (имена), да не погибнут вовек, но да спасутся Твоими молитвами и прейдут от смерти в живот; посли им, Благодатная, достигнути вожделеннаго Отечества и узрети блага небесная. Ты бо еси едина Благословенная в женах, многомощная Заступница, надежда, покров и прибежище всем, притекающим к Тебе; Ты еси мост, преводяй сущих от земли на небо, и райских дверей отверзение родом людей Твоих во веки веков. Аминь.
МОЛИТВЫ ОБ УМЕРШИХ БЕЗ ПОКАЯНИЯ, КРЕЩЕНИЯ ИЛИ НАДЕЖДЫ
О поминовении умерших без покаяния
Молясь о прощении грехов усопших и об избавлении от мук умерших без покаяния, православные христиане обращаются к заступничеству замечательного египетского подвижника – преподобного Паисия Великого (вторая половина IV в. – V в.). Он жил в одиночестве в Нитрийской пустыне в пещере, которую высек собственными руками, пребывая в посте и молитве.
Однажды отшельник сподобился видения Господа Иисуса Христа, который открыл Паисию, что ради его трудов вся пустыня будет населена подвижниками; действительно, со временем там был образован монастырь. Господь удостоил святого Паисия великого дара исполнения всего, о чем ни попросит во имя Его в молитве, а также обещал отпущение грехов всем грешникам, о коих будет молиться Ему преподобный. Паисий сподобился множества духовных дарований, особенно «болящия исцеляти, бесы от человек отгоняти и грешники от муки молитвою своею избавляти».
Молитва первая преподобному Паисию Великому
(память 19 июня / 2 июля)
Божественною любовию от юности распаляем, преподобне, вся красная, яже в мире, возненавидев, Христа единаго возлюбил еси, сего ради в пустыню вселися, идеже сподобися Божественнаго посещения, Егоже неудобь зрети и Ангельскима очима, паде, поклонися. Великий же Дародатель, яко Человеколюбец, рече к тебе: не ужасайся, возлюбленный Мой, дела твоя угодна Мне, се даю тебе дар: о коем либо грешнице помолишися, отпустятся ему греси. Ты же в чистоте сердца твоего возгореся, прием воду и прикоснуся Неприкосновенному, умы нозе Его и, пив воду, даром чудес обогатися: болящия исцеляти, бесы от человек отгоняти и грешники от муки молитвою своею избавляти. О преподобне отче Паисие, молю тя, да умолиши и о мне, якоже тебе Бог обетова, ибо от сих грешних первый аз есмь, да даст ми Господь время покаяния и простит мое согрешение, яко Благий и Человеколюбец, да со всеми и аз воспою Ему: Аллилуиа.
Молитва вторая преподобному Паисию Великому
(память 19 июня / 2 июля)
Страстей победителя, душам помощника, о всех молебника, всем спасения ходатая и наставника, из глубины сердца воздыхая, усердне и пламенне молим тя, Паисие преподобне! Внемли и помози нам, не отрини и не презри нас, но абие услыши в смирении сердца притекающих к тебе. Ты, преподобне, к спасению ближних прилежно стремился и многих грешников к свету спасения привел еси. Подвиги чрезмерныя успокоением считал ты себе, пречудне, и любовию ко Господу всегда горя, явления Христа Спаса сподобился еси, и Ему, за людей умершему, любовию подражая, и об отрекшихся от Христа молился еси. Услыши нас, Паисие прехвальне, ибо недостойни есмы молитися о даровании нам велией милости Господней, понеже грешны есмы, и уста оскверненныя и сердца отягощенныя имамы, и под бременем прегрешений страждем, и не достигает молитва наша до Господа. Сего ради помолися за нас мольбою твоею крепкою и богоприятною, святый Паисие, да избавлены будут скончавшиися без покаяния сродники, ближния и знаемыя наши от муки вечныя, и молитву твою во благоволении приимет Спас наш и милосердие Свое вместо добрых дел их даст им, свободит их, веруем, от страданий и вселит в селениих праведных, и нас в покаянии скончатися удостоит, да прославим вкупе всесвятое и великолепое имя Отца и Сына и Святаго Духа, во веки веков. Аминь.
О поминовении умерших без крещения
Церковь не совершает поминовение людей, не принявших Святого Крещения (как взрослых, так и младенцев), на Божественной Литургии и в заупокойных службах, но не запрещает личной, домашней молитвы за близких, умерших некрещеными. Как молиться дома о таких людях, подскажет духовный отец или другой православный священник.
По сложившейся традиции в нашей стране в этих случаях на домашней молитве прибегают к заступничеству мученика Уара (конец III в. – начало IV в., возможно 307 г.), которого почитают, помимо прочего, как молитвенника о некрещеных и неправославных усопших. Святой Уар, живший в Египте в период особых гонений на христиан, сам был тайным христианином. Он посещал в тюрьмах гонимых за веру, приносил им пищу, перевязывал раны, как мог, облегчал их страдания. Однажды, когда осужденных христианских учителей повели на казнь, Уар добровольно пошел вместе с ними, открыто исповедал веру во Христа, после чего был замучен.
Из жития святого Уара следует также, что он вымолил у Господа прощение и отпущение грехов предкам благочестивой вдовы Клеопатры, которая положила тело мученика вместе с телами своих родственников в семейной усыпальнице. Предполагают, что эти усопшие (или многие из них) были некрещеными; житие святого Уара этот факт не опровергает и не подтверждает.
Молитва мученику Уару
(память 19 октября / 1 ноября)
О святый мучениче Уаре досточудный! Ревностию по Владыце Христу разжигаем, Небеснаго Царя пред мучителем исповедал еси, и о Нем усердно пострадал еси, и ныне Церковь почитает тя, яко прославляемаго от Владыки Христа славою небесною, Иже дарова тебе благодать великаго к Нему дерзновения, и ныне предстоиши Ему со Ангелы, и в вышних ликуеши, и зриши ясно Святую Троицу, и светом Безначальнаго Сияния наслаждаешися. Воспомяни и наших сродников томление, умерших в нечестии, приими наше прошение, и якоже Клеопатрин род неверный молитвами твоими от вечных мук свободил еси, тако воспомяни елицы противобожне погребенныя, умершия некрещеными, потщися испросити оным от вечныя тьмы избавление, да вси едиными усты и единым сердцем восхвалим Премилосердаго Творца во веки веков. Аминь.
О поминовении самоубийц
Намеренное самоубийство, как и оказание помощи в его совершении, рассматривается как тяжкий грех. По общему правилу Церковь не совершает поминовение умерших, самовольно лишивших себя жизни. При этом в книге «Правила Святых Апостол, Святых Соборов Вселенских и Поместных и Святых Отец» содержится 14-е правило Тимофея, епископа Александрийского, которое определяет, когда такое поминовение все же допускается:
«Вопрос: Аще кто, будучи вне себя, подымет на себя руки, или повержет себя с высоты: за такового должно ли быть приношение[2] или нет?
Ответ: О таковом священнослужитель должен рассудити, подлинно ли, будучи вне ума, соделал сие. Ибо часто близкие к пострадавшему от самого себя, желая достигнути, да будет приношение и молитва за него, неправдуют и глаголют, яко был вне себя. Может же быти, яко соделал сие от обиды человеческия, или по иному какому случаю от малодушия: и о таковом не подобает быти приношение, ибо есть самоубийца. Посему священнослужитель непременно должен со всяким тщанием испытывати, да не подпадет осуждению»[3].
При этом допускается келейная (домашняя) молитва православных христиан о людях, самовольно лишивших себя жизни, приносимая с глубоким смирением и предварительным прошением о помиловании самих молящихся. Как молиться в таких случаях, подскажет духовный отец или другой священник, благословляющий на этот труд. Так, великий Оптинский старец Леонид (в схиме Лев) благословил своего ученика молиться об его отце-самоубийце, выполняя долг любви и обязанности сыновней. Ниже приводится текст молитвы, рекомендованной старцем.
Молитва о самовольно живот свой скончавшем (преподобного Льва Оптинского) [4]
Взыщи, Господи, погибшую душу отца моего (имя); аще возможно есть, помилуй! Неизследимы судьбы Твои. Не постави мне во грех сей молитвы моей, но да будет святая воля Твоя.
***
Текст приводится по изданию: Каноны и молитвы об усопших. – М.: Изд. Тихомирова М.Ю., 134 с. Обложка. Формат издания 115 х 165 мм. – см. раздел нашего Каталога «Молитвы о разных нуждах»
Рекомендуем также:
 |
 |
____________________
[1] Лития – букв. усердная молитва; часть православного богослужения. По приведенному в данном издании чину заупокойная лития может совершаться мирским человеком дома или на кладбище. Текст литии печатается по изданию: Православный молитвослов. Изд. 5-е. – М.: Издательство Московской Патриархии Русской Православной Церкви, 2014, с. 367–372.
[2] Имеется в виду церковное поминовение.
[3] Цит. по изданию: Молитвы и каноны, чтомые по усопшим. – М.: Сибирская Благозвонница, 2015, с. 159–160.
[4] Только для келейного чтения.