Молитвы о достатке в семье
МОЛИТВЫ О МАТЕРИАЛЬНОМ БЛАГОПОЛУЧИИ
МОЛИТВЫ КО ГОСПОДУ
Молитва Господня
Отче наш, Иже еси на Небесех! Да святится имя Твое, да приидет Царствие Твое, да будет воля Твоя, яко на Небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.
Молитва Каллиста, патриарха Константинопольского
Владыко Господи Иисусе Христе Боже наш, глаголом Своим все от небытия преведый, персть вземый от земли и создавый человека, и душею словесною и образом Твоим почтый того, и рекий: раститеся и множитеся, и наполняйте землю; даяй скотом пищу и птенцем врановым; иже и в велицем и спасительном плотию пришествии Твоем, прежде убо седмию, потом же пятию хлебы, тысящи насытил еси многия; Сам Всеблагий Владыко и Твоя люди сия, призывающия пресвятое Твое имя, Твоею вседетельною и великодарною десницею богатно препитай. Призри, Господи, на убогия люди Твоя, отверзаяй руку Твою и насыщаяй всякое животно благоволения, ущедри всех бо нас милостивно: Ты бо Владыко Человеколюбче, един еси Отец всех нас, и к Тебе единому очи возводим, яко отдоенное на матерь свою; Твое есть слово, Преблагий Владыко: просите, и дастся вам; ищите и обрящете. Подаждь убо просящим ныне, Владыко, с духовною пищею и нуждную плоти, и препитай алчущия Твоя люди; дожди временны и благорастворение воздухов, и плодов различных изобилие земли даруй; в немощи и губительстве, и огневице, и недузех различных бедствующих посети. Избави, Господи, имя Твое призывающий сей град, и всякий град и страну, от глада, губительства, труса, потопа, огня, меча и убийства; даруяй нам милости Твоя, благодатию Безначальнаго и Единосущнаго Твоего Отца и Пресвятаго и Единочестнаго Твоего Духа, молитвами и моленьми Преблагословенныя Богородицы, богоглаголивых Твоих апостол и всех святых Твоих. Аминь.
Молитва о благочестивом и правильном распоряжении имуществом
Господи! Я в руках Твоих, Ты знаешь полезное мне, наставь меня по воле Твоей, не попусти мне впасть в заблуждение и злоупотребить имуществом: оно принадлежит Тебе, и Ты владычествуешь им. Устрой же, Владыко, чтобы сие совершилось в страхе Твоем, ибо Твоя есть слава во веки. Аминь.
Молитва о помощи в добрых делах
Господи Иисусе Христе, Единородный Сыне Безначальнаго Отца! Ты рекл еси пречистыми усты Твоими: яко без Мене не можете творити ничесоже. Сего ради припадая к Твоей благости, просим и молим Тя: рабом Твоим (имена) и всем, зде предстоящим и молящимся Тебе, помози во всех благих их делех, начинаниих и намерениих. Яко Твоя держава, Царство и сила, от Тебе помощь вси приемлем, на Тя уповаем и Тебе славу возсылаем, со Отцем и Святым Духом, ныне и присно и во веки веков. Аминь.
МОЛИТВЫ КО ПРЕСВЯТОЙ БОГОРОДИЦЕ
Молитва ко Пресвятой Богородице пред иконою «Домостроительница» («Экономисса»)
(празднование 5 / 18 июля)
О Пречистая Дево Богородице, Премилостивая Владычице, высшая Ангел и Архангел, Царице Небесе и земли, страны нашея православныя твердое ограждение, покрове и защищение, всякаго дома и семейства христианскаго Благоустроительнице, труждающихся во благочестии благословение, нуждающихся неистощимое богатство, сирых и вдовиц Кормительнице, девствующих чистото и славо, матерей тихое веселие, отроков мудросте и научение, наставников и детоводителей совершенный разуме! Веруем в державный Твой Покров над православным отечеством нашим и над малейшим из нас, искупленным Божественною Кровию Сына Твоего. Веруем, яко в сей иконе Твоей, в благословение от Святыя Горы Афонския нам данней, Сама Ты низпосылаеши Твое Матернее благословение весем нашим и коемуждо дому, на Тя упование имущему. Темже со благоговейным трепетом и с благодарным сердцем преклоняемся пред сим новым знамением великия любве Твоея, Владычице, к нам, недостойным. Воспоминающе же Твое чудное явление преподобному Афанасию Афонскому, некогда в нужде и скорби бывшему и, яко пребудеши присная Домостроительница его обители, о Тебе милостивное обещание приимшему, смиренно молимся Тебе: о Премилосердая Мати рода христианскаго! Буди и нам, грешным и недостойным рабом Твоим, мудрая Домостроительница, житие наше добре устрояющая. Всякое же сообщество, всякий дом и семейство во благочестии и Православии, единомыслии, послушании и довольстве соблюди; заблуждшия на путь правый настави, старость поддержи, младенцы воспитай, всех вразуми приискренне повиноватися уставленным от Бога властем и вся повеленная соблюдати. Облегчи и возстави изнемогающия, сохрани люди Твоя от всякия нужды, болезни, глада, губительства, града, огня, от всякаго злаго обстояния и всякаго нестроения. Дому сему и всякой души христианстей и всей стране нашей исходатайствуй мир и велию милость ныне и присно и во веки веков. Аминь.
Молитва ко Пресвятой Богородице пред иконою «Достойно есть» («Милующая»)
(празднование 11 / 24 июня)
О Пресвятая и Премилостивая Владычице Богородице! Припадающе ко святей иконе Твоей, смиренно молимся Тебе, вонми гласу моления нашего, виждь скорби, виждь беды наша и, яко любвеобильная Мати, потщися на помощь нам, безпомощным, умоли Сына Твоего и Бога нашего, да не погубит нас за беззакония наша, но явит нам человеколюбно Свою милость. Испроси нам, Владычице, у благости Его телесное здравие и душевное спасение, мирное житие, земли плодоносие, воздуха благорастворение и благословение свыше на вся благая дела и начинания наша. И якоже древле призрела еси милостивно на смиренное славословие послушника Афонскаго, воспевавшаго Тя пред пречистою иконою Твоею, и послала еси к нему Ангела научити его пети песнь небесную, еюже славословят Тя Ангели; тако и ныне приими наше усердное молитвословие, Тебе приносимое. О Царице Всепетая! Простри ко Господу богоносныя Твоя руце, имиже Богомладенца Иисуса Христа носила еси, и умоли Его избавити нас от всякаго зла. Яви, Владычице, Твою милость к нам: болящия исцели, скорбящия утеши, бедствующим помози и сподоби нас благочестно житие сие земное совершити, христианскую непостыдную кончину получити и Небесное Царствие наследити Матерним ходатайством Твоим к Рождшемуся от Тебе Христу Богу нашему, Емуже со Безначальным Его Отцем и Пресвятым Духом подобает всякая слава, честь и поклонение, ныне и присно и во веки веков. Аминь.
Молитва ко Пресвятой Богородице пред иконою «Спорительница хлебов»
(празднование 15 / 28 октября)
О Пресвятая Дево Богородице, Премилостивая Владычице, Царице Небесе и земли, всякаго дома и семейства христианскаго Благоустроительнице, труждающихся благословение, нуждающихся неистощимое богатство, сирых и вдовиц и всех людей Кормительнице! Питательнице наша, рождшая Питателя вселенныя, и Спорительнице хлебов наших! Ты, Владычице, низпосылаеши Твое Матернее благословение градом нашим, селам и нивам, и коемуждо дому, на Тя упование имущему. Темже с благоговейным трепетом и сокрушенным сердцем смиренно молим Тя: буди и нам, грешным и недостойным рабом Твоим, мудрая Домостроительница, житие наше добре устрояющая. Всякое же сообщество, всякий дом и семейство во благочестии и Православии, единомыслии, послушании и довольстве соблюди. Нищия и неимущия пропитай, старость поддержи, младенцы воспитай, всех вразуми преискренне взывати ко Господу: хлеб наш насущный даждь нам днесь. Сохрани, Пречистая Мати, люди Твоя от всякия нужды, болезни, глада, губительства, града, огня, от всякаго злаго обстояния и всякаго нестроения. Обители (веси) нашей, домам и семействам, и всякой душе христианстей, и всей стране нашей исходатайствуй мир и велию милость, да славим Тя, Премилостивую Питательницу и Кормительницу нашу, ныне и присно и во веки веков. Аминь.
МОЛИТВЫ АРХАНГЕЛУ ВАРАХИИЛУ И СВЯТЫМ УГОДНИКАМ БОЖИИМ
Молитва Архангелу Варахиилу
(8 / 21 ноября)
О великий Архангеле Божий Варахииле! Предстоя Престолу Божию и свыше принося благословение Божие в домы верных рабов Божиих, испроси у Господа Бога милосердия и благословения на домы наша, да благословит Господь и нас от Сиона и послет изобилие плодов земных и подаст нам здравие и спасение и во всем благое поспешение, на враги победу и одоление и сохранит нас на многая лета, да единодушно славим Отца и Сына и Святаго Духа, ныне и присно и во веки веков. Аминь.
Молитва священномученику Власию, епископу Севастийскому
(память 11 / 24 февраля)
Преблаженне и приснопамятне священномучениче Власие, дивный страдальче и предстателю наш теплый, по отшествии твоем в жизнь вечную призывающим твое святое имя пособствовати и во всяких прошениих услышанным быти обещавый! Се, ныне к тебе, угоднику Божию, яко ко истинному ходатаю спасения, притекаем и смиренно молимся: предстани нам в помощь, узами грехов связанным, подвигнися на всемощныя твоя к Богу молитвы и помолися о нас, грешных; тя бо, недостойнии, призывати на заступление дерзаем и желаем от всех грехов наших тобою освобождение получити. О святче Божий Власие! В сокрушении и смирении сердца нашего пред тобою припадаем и молимся: осияй нас, омраченных наветы вражиими, светом благодати свыше, да в нем ходяще, не преткнем о камень ног наших. Тя, яко сосуд в честь избранный и исполненный благодати Божия, молим: сподоби нас, грешных, от исполнения твоего желаемое прияти, и исцели наша душевныя и телесныя язвы, грехом же нашим прощения и душевному и телесному нашему здравию и спасению полезное у Господа испроси, да всегда прославляем Отца и Сына и Святаго Духа, и твое милостивное предстательство о душах и телесех наших, ныне и присно и во веки веков. Аминь.
Молитва святителю Димитрию, митрополиту Ростовскому
(память 21 сентября / 4 октября; 28 октября / 10 ноября)
О преблаженне святителю Димитрие, великий угодниче Христов, Златоусте российский! Услыши нас, грешных, молящихся тебе, и принеси молитву нашу к Милостивому и Человеколюбцу Богу, Емуже ты ныне в радости святых и с лики Ангел предстоиши! Умоли Его благосердие, да не осудит нас по беззаконием нашим, но да сотворит с нами по милости Своей. Испроси нам у Христа Бога нашего мирное и безмятежное житие, здравие душевное и телесное, земли благоплодие и во всем всякое изобилие и благоденствие, и да не во зло обратим благая, даруемая нам от Щедраго Бога, но во славу Его и в прославление твоего заступления. Даруй нам богоугодно прейти поприще временныя жизни; избави нас от воздушных мытарств и настави на путь, ведущий в селения праведных, идеже празднующих глас непрестанный, зрящих Божия лица неизреченную доброту; Церковь же Святую от расколов и ересей сохрани, верныя укрепи, заблуждающия обрати, и всем даруй вся, яже ко спасению и славе Божией подобающая; Отечество твое сохрани от врагов ненаветно, но поборай оружию крестоноснаго воинства; и подаждь нам всем твое архипастырское и святое благословение, да оным осеняеми, избавимся от козней лукаваго и избегнем от всякия беды и напасти. Услыши моление наше, отче Димитрие, и моли непрестанно о нас Всесильнаго Бога, славимаго и поклоняемаго в Триех Ипостасех, Емуже подобает всякая слава, честь и держава во веки веков. Аминь.
Молитва святителю Иоанну Милостивому, патриарху Александрийскому
(память 12 / 25 ноября )
Святителю Божий Иоанне, милостивый защитниче сирых и сущих в напастех! К тебе прибегаем и тебе молимся, яко скорому покровителю всех ищущих от Бога утешения в бедах и скорбех: не престай моляся ко Господу о всех, с верою притекающих к тебе! Ты, преисполнен быв Христовы любве и благости, явился еси яко чудный чертог добродетели милосердия и стяжал еси себе имя Милостивый. Ты был еси яко река, непрестанно текущая щедрыми милостьми и всех жаждущих обильно напояющая. Веруем, яко, по преселении от земли на Небо, усугубися в тебе дар благодати сея и яко соделался еси неисчерпаемый сосуд всякия благостыни. Сотвори убо твоим ходатайством и заступлением пред Богом всякия утехи, да вси прибегающии к тебе обретают мир и безмятежие; даруй им утешение в печалех временных и пособие в нуждах житейских, всели в них надежду вечнаго успокоения во Царствии Небеснем. В житии твоем на земли ты был еси пристанище всем сущим во всякой беде и нужде, обидимым и недугующим, и ни един от притекавших к тебе и просивших у тебе милости лишен бысть твоея благостыни; тожде и ныне, царствуя со Христом Богом на Небеси, яви всем поклоняющимся пред честною твоею иконою и молящимся о помощи и заступлении. Не точию сам ты творил еси милость безпомощным, но и сердца других воздвигал еси ко утешению немощных и ко призрению убогих; подвигни убо и ныне сердца верных к заступлению сирых, ко утешению скорбящих и успокоению неимущих, да не оскудевают в них дары милости, паче же да вселится в них и в дому сем, призревающем страждущих, мир и радость о Дусе Святе, во славу Господа и Спаса нашего Иисуса Христа, во веки веков. Аминь.
Молитва первая святителю Спиридону Тримифунтскому
(память 12 / 25 декабря)
О преблаженне святителю Спиридоне, великий угодниче Христов и преславный чудотворче! Предстояй на Небеси Престолу Божию с лики Ангел, призри милостивым оком на предстоящия зде люди и просящия сильныя твоея помощи. Умоли благосердие Человеколюбца Бога, да не осудит нас по беззакониим нашим, но да сотворит с нами по милости Своей. Испроси нам у Христа и Бога нашего мирное и безмятежное житие, здравие душевное и телесное, земли благоплодие и во всем всякое изобилие и благоденствие, и да не во зло обратим благая, даруемая нам от щедраго Бога, но во славу Его и в прославление твоего заступления. Избави всех, верою несумненною к Богу приходящих, от всяких бед душевных и телесных, от всех томлений и диавольских наветов. Буди печальным утешитель, недугующим врач, в напастех помощник, нагим покровитель, вдовицам заступник, сирым защитник, младенцем питатель, старым укрепитель, странствующим путевождь, плавающим кормчий и исходатайствуй всем, крепкия помощи твоея требующим, вся, яже ко спасению полезная, яко да твоими молитвами наставляеми и соблюдаеми, достигнем вечнаго покоя и купно с тобою прославим Бога, в Троице Святей славимаго, Отца и Сына и Святаго Духа, ныне и присно и во веки веков. Аминь.
Молитва вторая святителю Спиридону Тримифунтскому
(память 12 / 25 декабря)
О великий и пречудный святителю Христов и чудотворче Спиридоне, Керкирская похвало, всея вселенныя светильниче пресветлый, теплый к Богу молитвенниче и всем к тебе прибегающим и с верою молящимся скоропредстательный заступниче! Ты веру Православную на Никейстем Соборе посреде отцев преславно изъяснил еси, ты единство Святыя Троицы чудесною силою показал еси и еретиков до конца посрамил еси. Услыши нас, грешных, святителю Христов, молящихся тебе, и сильным твоим предстательством у Господа избави нас от всякаго злаго обстояния: от глада, потопа, огня и смертоносныя язвы. Ты бо во временней жизни своей от всех сих бедствий избавлял еси людей твоих: от нашествия агарян и от глада страну твою сохранил еси, царя от неисцельнаго недуга избавил и многия грешники к покаянию привел еси, мертвых преславно воскрешал еси, за святость же жития твоего Ангелы, невидимо в церкви поющия и сослужащия тебе, имел еси. Сице убо прослави тебе, вернаго Своего раба, Владыка Христос, яко вся тайная человеческая деяния дарова тебе разумети и обличати неправедно живущия. Многим, в скудости и недостаточестве живущим, ты усердно помогал еси, люди убогия изобильно во время глада напитал еси и ина многа знамения силою в тебе живущаго Духа Божия сотворил еси. Сице и нас не остави, святителю Христов, поминай нас, чад своих, у Престола Вседержителя и умоли Господа, да подаст многих наших грехов прощение, безбедное и мирное житие да дарует нам, кончины же живота непостыдныя и мирныя и блаженства вечнаго в будущем веце сподобит нас, да выну возсылаем славу и благодарение Отцу и Сыну и Духу Святому, ныне и присно и во веки веков. Аминь.
Молитва первая священномученику Харалампию, епископу Магнезийскому
(память 10 / 23 февраля )
О священная и многострадальная главо, пастырю добрый словесных овец Христовых, священномучениче Христов Харалампие, Магнисийская похвало и вселенныя славо, всемирный светильниче, великий наш заступниче и в скорбех, бедах и всяких нуждах благий помощниче! Услыши нас, грешных, к тебе прибегающих и молящих ти ся, и избави нас от всякаго злаго обстояния. Ты бо приял еси от Господа благодать и силу велику за многая и тяжкая страдания твоя и терпение, еже всюду и во всем нам помогати, и наипаче идеже память твоя чтитися будет бдением, пением и усердным молением. Сицевая благодать дадеся ти, священномучениче Христов, от явльшагося ти Господа Царя Славы по твоему испрошению. Егда на мечное тя усечение осудиша, услышал бо еси превожделенный и сладчайший оный глас, глаголющ тебе: прииди, Харалампие, друже Мой, многия муки имене ради Моего претерпевый, и проси у Мене, еже хощеши, и Аз дам ти. Ты же, великий светильниче, рекл еси Христу Господу: Господи мой, велико убо мне есть от Тебе, Света Невечерняго, дарование сие: аще угодно есть величеству Твоему, молю Тя, благоволи даровати ми сицевую милость Твою, да идеже положены будут мощи моя и почитаема будет память страдания моего, не будет на месте том ни глада, ни мора, ни тлетворнаго воздуха, погубляющаго плоды, но да будет паче на месте оном мир, здравие телесем и душам спасение, изобилие пшеницы, вина и елеа и умножение скотов, яже на потребу человеком. И отвеща тебе глас Господень: буди по прошению твоему, преславный Мой воине. И абие, по глаголании сем Господнем, предал еси душу свою прежде мечнаго посечения, и сия ко Господу взыде Ангелом сретающим ю: и тако приял еси венец славы от Божественныя руки Его с лики святых, вечно славящих пресвятое имя Господа. Тамо убо, во славе Небесней пребывая, призри, угодниче Божий, и на нас, грешных, молящихся тебе, и воспомяни нас пред Господем, еже даровати нам на потребу велия Его милости во веки веков. Аминь.
Молитва вторая священномученику Харалампию, епископу Магнезийскому
(память 10 / 23 февраля )
О пречудный священномучениче Харалампие, страстотерпче непреодоленный, священниче Божий, о всем мире ходатайствуяй! Призри на моление нас, почитающих святую память твою. Испроси нам у Господа Бога прощение грехов наших, да не до конца прогневается на нас Господь, согрешихом бо и недостойни явихомся милосердия Божия. Моли о нас Господа Бога, да низпослет мир на грады и веси наша, да избавит нас от нашествия иноплеменников, междоусобныя брани и всяких раздоров и нестроений. Утверди, священномучениче, веру и благочестие во всех чадех Православныя Христианския Церкве, и да избавит нас Господь Бог от ересей, расколов и всякаго суеверия. О милосердный мучениче! Молися за ны ко Господу, да сохранит нас от глада и всяких болезней, и да подаст нам изобилие плодов земных, скотов умножение на потребу человеком и вся нам полезная, наипаче же да сподобимся, молитвами твоими, Небеснаго Царствия Христа Бога нашего, Емуже честь и поклонение подобает, со Безначальным Его Отцем и Пресвятым Духом, ныне и присно и во веки веков. Аминь.
***
Текст приводится по изданию: Молитвы о материальном благополучии. – М.: Изд. Тихомирова М.Ю., 66 с. Обложка. Формат издания 115 х 165 мм. – см. раздел нашего Каталога «Собственные издания»
Рекомендуем также:
 |
 |
 |