Молитвы о здравии онлайн
МОЛИТВЫ О ЗДРАВИИ БОЛЯЩИХ
МОЛИТВЫ КО ГОСПОДУ О БОЛЯЩИХ
Тропарь, глас 4-й
Скорый в заступлении един сый, Христе, скорое свыше покажи посещение страждущему рабу Твоему, и избави от недуг и горьких болезней; и воздвигни во еже пети Тя и славити непрестанно, молитвами Богородицы, едине Человеколюбче.
Кондак, глас 2-й
На одре болезни лежащаго и смертною раною уязвленнаго, якоже иногда воздвигл еси, Спасе, Петрову тещу и разслабленнаго на одре носимаго; сице и ныне, Милосерде, страждущаго посети и исцели: Ты бо един еси недуги и болезни рода нашего понесый и вся могий, яко Многомилостив.
Молитва
Владыко Вседержителю, Святый Царю, наказуяй и не умерщвляяй, утверждаяй низпадающия и возводяй низверженныя, телесныя человеков скорби исправляяй, молимся Тебе, Боже наш, раба Твоего (имя) немощствующа посети милостию Твоею, прости ему всякое согрешение вольное и невольное. Ей, Господи, врачебную Твою силу с небесе низпосли, прикоснися телеси, угаси огневицу, укроти страсть и всякую немощь таящуюся, буди врач раба Твоего (имя), воздвигни его от одра болезненнаго и от ложа озлобления цела и всесовершенна, даруй его Церкви Твоей благоугождающа и творяща волю Твою. Твое бо есть, еже миловати и спасати ны, Боже наш, и Тебе славу возсылаем, Отцу и Сыну и Святому Духу, ныне и присно и во веки веков. Аминь.
Канон за болящего [1]
Глас 3-й, Песнь 1
Ирмос: Пресекаемое море жезлом древле, Израиль пройде яко по пустыни, и крестообразно яве предуготовляет стези. Сего ради поим во хвалении чудному Богу нашему, яко прославися.
Стих: Господи, да не яростию Твоею обличиши мене, ниже гневом Твоим накажеши мене.
В день печали, нашедшия на ны, к Тебе, Христе Спасе, припадающе, Твоея милости просим. Облегчи болезнь раба Твоего, рцы и нам, яко и сотнику: иди, се здрав есть отрок твой.
Стих: Помилуй мя, Господи, яко немощен есмь.
Мольбы и моления приносяще, с воздыханием и верою к Тебе вопием: Сыне Божий, помилуй нас и воздвигни от одра лежащаго, якоже разслабленнаго словом, рекий: возми одр твой, отпущаются ти греси твои.
Слава[2]: Твоего, Христе, образа подобию поклоняющеся, сего верою лобызаем и болящему здравия просим, подражающе кровоточивей, яже воскрилия риз Твоих прикоснувшися, исцеление недуга прияла есть.
И ныне[3]: Пречистая Госпоже Богородице, всем известная Помощнице, не презри нас, к Тебе припадающих, но моли яко Благая Сына Своего и Бога нашего, дати здравие болящему, да Тя с нами прославляет.
Песнь 3
Ирмос: Иже от не сущих вся приведый, словом созидаемая, совершаемая Духом, Вседержителю Вышний, в любви Твоей утверди мене.
Стих: Исцели мя, Господи, яко смятошася кости моя, и душа моя смятеся зело.
От тяжких болезней на землю поверженный к Тебе, Христе, нами вопиет; подаждь здравие телеси его, якоже Езекии плакавшуся к Тебе.
Стих: И Ты, Господи, доколе: обратися, Господи, и избави душу мою.
Призри, Господи, на наше смирение и не помяни беззаконий наших. Но веры ради болящаго, якоже прокаженнаго, словом исцели, да Твое, Христе Боже, славится имя.
Слава: Церкви, юже освятил еси, Христе, не даждь поношения, но воздвигни невидимо на одре болезни лежащаго, иже молится Тебе, да не рекут невернии: где есть Бог их.
И ныне: К Твоему пречистому, Богородице, образу руце воздеюще, вопием, услыши раб Твоих молитву и спаси в недузе лежащаго, да от болезни востав, воздаст обеты, яже в печали глаголаша уста его.
Седален, глас 8-й
Якоже древле воздвигл еси Петрову тещу и спасл еси разслабленнаго носима на одре, тако и ныне посети болящаго раба Твоего, Милостиве: Ты бо един еси понесый недуги рода нашего, и Тебе единаго вемы терпеливаго, и милосердаго, и милостиваго Врача душ и телес, Христа Бога нашего, наводящаго недуги и паки возставляющаго, и подавающаго прощение кающимся о согрешениих, едине Милосерде и Всемилостиве.
Слава: Аз, грешный, плачуся на одре моем лежа, прощение подаждь, Христе Боже, грехом моим, яже от юности моея сотворих, и от болезни мя воздвигни, да славлю Тя, единаго всемилостиваго душ и телес Врача.
И ныне: Умилосердися, Владычице, и воздвигни мя от одра болезненнаго, крепость бо моя во мне изнеможе и весь нечаянием одержим есмь, Мати Божия Пречистая, исцели недугующа люте, Ты бо еси Помощница христианом.
Песнь 4
Ирмос: Положил еси к нам твердую любовь, Господи: Единороднаго бо Твоего Сына за ны на смерть дал еси. Темже Ти зовем благодаряще: слава силе Твоей, Господи.
Стих: Спаси мя ради милости Твоея.
Тебе, Творче, молимся, вся грехи раба Твоего прости, не хощеши бо смерти грешнаго, оживи и уздрави болящаго, да востав послужит Ти, исповедая с нами Твою благость.
Стих: Яко несть в смерти поминаяй Тебе, во аде же кто исповестся Тебе?
Уже отчаяннаго лютым недугом и к смерти приближившагося, возврати, Христе, на живот и даждь плачущимся утешение, да вси прославляем Твоя святая чудеса.
Слава: Слезы Манассиины, ниневитян покаяние и Давидово исповедание приим, вскоре сих спасл еси, и наша молитвы ныне приими, благосерде Господи, и подаждь здравие болящему, о немже Тя молим.
И ныне: Подаждь нам Твою милость, Госпоже, всегда на Тя надеющимся, и испроси здравие болящему, врачебнии Твои руце со Предтечею, Богородице, ко Христу Богу простирающи.
Песнь 5
Ирмос: На земли Невидимый явился еси, и человеком волею сожил еси, Непостижимый, и к Тебе утренююще, воспеваем Тя, Человеколюбче.
Стих: Утрудихся воздыханием моим.
Дщерь Иаирову, уже умершую, яко Бог оживил еси, и ныне возведи, Христе Боже, от врат смертных болящаго, Ты бо еси Путь и Живот всем.
Стих: Измыю на всяку нощь ложе мое, слезами моими постелю мою омочу.
Сына вдовича оживив, Спасе, тоя слезы преложил еси на радость: и ныне спаси от недуга тлеющаго раба Твоего, да и наша скорбь и болезнь на радость прейдет.
Слава: Огненная болезнь иногда, Христе, тещи Петрове прикосновением Твоея руки исцеле, и ныне таяжде всесильная Твоя десница да воставит болящаго раба Твоего, да востав, якоже и сия, послужит Тебе.
И ныне: В скорби сущи грешнии, и не имуще к Богу дерзновения, к Тебе, Пречистая Богомати, вопием: моли Сына Твоего подати болящему здравие.
Песнь 6
Ирмос: Бездна последняя грехов обыде мя, и исчезает дух мой; но прострый, Владыко, высокую Твою мышцу, яко Петра мя, Управителю, спаси.
Стих: Смятеся от ярости око мое.
Бездну милости имеяй, Христе Боже, услыши моления раб Твоих, и якоже Петром Тавифу воскресил еси, сице и ныне в болезни лежащаго воздвигни, послушав церковныя молитвенники.
Стих: Обетшах во всех вразех моих.
Врачу душам и телесем нашим, понесый недуги всего мира, Христе, Енея Петром исцеливый и Евтиха Павлом воскресивый, и ныне болящаго исцели святых апостол молитвами.
Слава: Преложи, Христе, на радость рыдание о недужнем ныне скорбящих, да Твою получивше милость, внидем в дом Твой со обетованными дары, славяще Тя со Отцем и Духом во Едином Существе Нераздельнаго Бога.
И ныне: Приидите, о друзи, припадем к Божией Матери. Та бо имать власть недужныя исцеляти, со безмездникома вкупе, духовным помазующе молитв Своих богоприятных елеем.
Кондак, глас 2-й
На одре болезни лежащаго и смертною раною уязвленнаго, якоже иногда воздвигл еси, Спасе, Петрову тещу и разслабленнаго на одре носимаго, сице и ныне, Милосерде, страждущаго посети и исцели: Ты бо един еси недуги и болезни рода нашего понесый и вся могий, яко Многомилостив.
Икос
Иже руки Своея горстию содержай концы, Иисусе Боже, Иже Отцу собезначальный и Духу Святому совладычествуяй, яко плотию явился еси недуги исцеляя и страсти очистил еси, слепыя просветил еси, и разслабленнаго словом Божественным совоставил еси, сего право ходяща сотворив, и одр повелел еси на раму взяти. Темже вси с ним воспеваем и поем: щедре Христе, даждь ми исцеление.
Песнь 7
Ирмос: Прежде образу златому, персидскому чтилищу, отроцы не поклонишася, трие поюще посреде пещи: отцев Боже, благословен еси.
Стих: Отступите от мене, вси делающии беззаконие.
Креста Твоего, Господи, Животворнаго, имже смерть погибе, и мертвии оживотворени быша, Божественным знамением ныне болящаго воздвигни, якоже при Елене умершую девицу.
Стих: Яко услыша Господь глас плача моего.
Долгую и лютую болезнь Иовлю, на гноищи в червех седящаго и благодарне молящагося, словом исцелил еси, Господи. И ныне болезнующаго и нами молящагося Тебе яко Благ исцели невидимо молитвами святых Твоих.
Слава: Вси вемы, яко всяко умрети нам есть, Тебе Богу тако изволившу, но на мало время, Милостиве, здравия просим болящему, премени от смерти того на живот, подаждь скорбящим утешение.
И ныне: Пособствуй и помози нашей нищете, Богородице, Ты бо веси время и час, когда умолити Сына Твоего и Бога нашего, подати болящему здравие и прощение всех грехов.
Песнь 8
Ирмос: Служити Живому Богу в Вавилоне отроцы претерпевше, о мусикийских органех нерадиша, и посреде пламене стояще, боголепную песнь воспеваху, глаголюще: благословите, вся дела Господня, Господа.
Стих: Услыша Господь моление мое.
Наказуя наказал еси, Владыко, болезнию раба Твоего, и скоро исцели, милостиве Христе Боже, и еще смерти не предаждь судне, да Тебе покаянием воздаст. Сам бо рекл еси: не хощу смерти грешнаго.
Стих: Господь молитву мою прият.
Господи милостиве, Твоя преславная чудеса и до нас ныне да достигнут: бесы прожени, недуги и раны исцели, болезни уврачуй, и потвора и чародеяния, и всякия язвы избави ны.
Слава: Запретивый, Христе, морским ветром, и страх учеников на радость преложивый, запрети и ныне тяжким болезнем, труждающим раба Твоего, да вси возвеселимся, хваляще Тя во веки.
И ныне: Избави, Богородице, от обышедших ны печалей, бед же и скорбей, и всех различных недугов, отравы же и чародеяний, и бесовскаго мечтания, и от навета злых человек, и от напрасныя смерти, молимся.
Песнь 9
Ирмос: На Синайстей горе виде Тя в купине Моисей, неопально огнь Божества заченшую во чреве; Даниил же Тя виде Гору несекомую, Жезл прозябший, Исаиа взываше, от корене Давидова.
Стих: Да постыдятся и смятутся вси врази мои.
Источниче жизни, Подателю милости, Христе, не отврати лица Твоего от нас, но облегчи болезни утружденному болезнию и воздвигни его, якоже Фаддеом Авгаря, да присно Тебе славит со Отцем и Духом Святым Единаго Бога.
Стих: Да возвратятся и устыдятся зело вскоре.
Евангельскому верующе глаголу, Твое ищем обещание, Христе: просите, бо рекл еси, и дастся вам. Тем и ныне предстояще молим Тя, востави от одра здрава лютым поверженнаго недугом, да Тя с нами вкупе величает.
Слава: Мучимый недугом и внутрь невидимыми ранами Тебе, Христе, нами вопиет; не нам, Господи, ни нас ради, вси бо мы исполнени грехов, но Матерними и Предтечи Твоего молитвами подаждь исцеление болящему, да Тя вси возвеличим.
И ныне: Божия Мати Пречистая, со всеми святыми призываем Тя, со Ангелы и Архангелы, с пророки и патриархи, со апостолы и святители, с преподобными и праведными молися Христу Богу нашему подати здравие болящему, да Тя вси величаем.
Молитва ко Господу за болящего
Боже сильный, милостию строяй вся на спасение роду человеческому, посети раба Своего сего (имя), нарицающа имя Христа Твоего, исцели его от всякаго недуга плотскаго; и отпусти грех и греховныя соблазны, и всяку напасть, и всяко нашествие неприязненно далече сотвори от раба Твоего. И воздвигни от одра греховнаго, и устрой его во Святую Твою Церковь здрава душею и телом, и делы добрыми славящаго со всеми людьми имя Христа Твоего, яко Тебе славу возсылаем, со Безначальным Ти Сыном и со Святым Духом, ныне и присно и во веки веков. Аминь.
Молитва ко Господу от лица болящего
Владыко! Я в руках Твоих: помилуй меня по воле Твоей и, если мне полезно, исцели меня вскоре. Аминь.
Молитва ко Господу на всякую немощь
Владыко Вседержителю, Врачу душ и телес, смиряяй и возносяяй, наказуяй и паки исцеляяй, брата нашего (имя) немощствующа посети милостию Твоею, простри мышцу Твою исполнену исцеления и врачбы и исцели его, возставляяй от одра и немощи, запрети духу немощи, отстави от него всяку язву, всяку болезнь, всяку рану, всяку огневицу и трясавицу; и аще есть в нем согрешение, или беззаконие, ослаби, остави, прости Твоего ради человеколюбия. Ей, Господи, пощади создание Твое во Христе Иисусе, Господе нашем, с Нимже благословен еси, и с Пресвятым и Благим и Животворящим Твоим Духом, ныне и присно и во веки веков. Аминь.
Молитва ко Господу о немощном и неспящем
Боже великий, хвальный и непостижимый, и неисповедимый, создавый человека рукою Твоею, персть взем от земли и образом Твоим почтивый его, явися на рабе Твоем (имя) и даждь ему сон упокоения, сон телесный здравия и спасения, и живота, и крепость душевную и телесную. Сам убо, Человеколюбче Царю, предстани и ныне наитием Святаго Твоего Духа и посети раба Твоего (имя), даруй ему здравие, крепость и благомощие Твоею благостию, яко от Тебе есть всяко даяние благо и всяк дар совершен. Ты бо еси Врач душ наших, и Тебе славу и благодарение, и поклонение возсылаем, со Безначальным Твоим Отцем и с Пресвятым и Благим и Животворящим Твоим Духом, ныне и присно и во веки веков. Аминь.
Молитва ко Господу болящего о даровании терпения
О дивный Создателю, человеколюбивый Владыко, многомилостивый Господи! С сердцем сокрушенным и смиренным сице молю Тя: не возгнушайся грешнаго моления моего, не отрини слез моих и воздыхания, услыши мене, якоже хананею, не презри мене, якоже блудницу, яви и на мне, грешнем, великую милость человеколюбия Твоего, ризою Твоею честною защити, помилуй и подкрепи мя, да вся попускаемыя Тобою к пользе моей беды и напасти со благодарением в надежде вечных благ претерплю; изряднее же печаль мою на радость претвори, да не во отчаяние впаду и погибну аз, окаянный. Ты бо еси Источник милости и непостыдная спасения нашего надежда, Христе Боже наш, и Тебе славу возсылаем со Безначальным Твоим Отцем и с Пресвятым и Благим и Животворящим Твоим Духом, ныне и присно и во веки веков. Аминь.
Молитва ко Господу о даровании терпения и любви при уходе за больным
Господи Иисусе Христе, Сыне Бога Живаго, Агнче Божий, вземляй грехи мира, Пастырю добрый, положивый душу Твою за овцы Твоя, Небесный Врачу душ и телес наших, исцеляяй всякий недуг и всякую язву в людех Твоих! Тебе припадаю, помози ми, недостойному рабу Твоему. Призри, Многомилостиве, на делание и служение мое, даждь ми быти верным в мале, послужити болящим, Тебе ради, носити немощи немощных, и не себе, но Тебе единому угодити во вся дни живота моего. Ты бо рекл еси, о Сладчайший Иисусе: понеже сотвористе единому сих братий Моих менших, Мне сотвористе. Ей, Господи, суди мне, грешному, по сему глаголу Твоему, яко да сподоблюся творити благую Твою волю во отраду и утешение искушаемых, недугующих раб Твоих, ихже искупил еси честною Твоею Кровию. Низпосли ми благодать Твою, попаляющую во мне страстей терние, призвавый мя, грешнаго, на дело служения о имени Твоем, без Тебе не можем творити ничесоже; посети убо нощию и искуси сердце мое, внегда предстояти ми у возглавия болящих и низверженных, уязви душу мою Твоею любовию, вся терпящею и николиже отпадающею. Тогда возмогу, Тобою укрепляем, подвигом добрым подвизатися и веру соблюсти, даже до последняго моего издыхания. Ты бо еси Источник исцелений душевных же и телесных, Христе Боже наш, и Тебе яко Спасителю человеков и Жениху душ, грядущему в полунощи, славу и благодарение, и поклонение возсылаем, ныне и присно и во веки веков. Аминь.
Молитва ко Господу благодарственная после исцеления от болезни,
праведного Иоанна Кронштадтского
Слава Тебе, Господи, Иисусе Христе, Сыне Единородный Безначальнаго Отца, едине исцеляяй всяк недуг и всяку язю в людех, яко помиловал мя еси, грешнаго, и избавил еси мя от болезни моей, не попустив ей развиться и умертвить меня по грехам моим. Даруй мне отныне, Владыко, силу твердо творить волю Твою во спасение души моея окаянныя и во славу Твою со Безначальным Твоим Отцем и Единосущным Твоим Духом, ныне и присно и во веки веков. Аминь.
МОЛИТВЫ К БОЖИЕЙ МАТЕРИ И СВЯТЫМ
Молитва ко Пресвятой Богородице пред иконою «Всех скорбящих Радость»
(празднование 23 июля / 5 августа; 24 октября / 6 ноября)
Надеждо ненадежных, сило безпомощных, пристанище обуреваемых, покрове напаствуемых, заступление обидимых, хлебоманно, услаждающая алчущих, нектаре небеснаго упокоения жаждущих, Мати Преблагословеннаго Бога, Преблагословенная и Пренепорочная Дево! К Тебе единей прибегаю, к Твоему покрову вседушно преклоняю колена, Владычице. Не презри плача и слез, утехо плачущих! Аще ужасает мя мое недостоинство и окаянство моих грехов, но уверяет мя цельбоносный сей образ, на немже благодать Твою и силу, яко неисчерпаемое море, вижду: слепых прозревших, скачущих хромых, странствующих, аки под сению Твоего призрения, Матерне упокоенных и по всякому прошению благоизобильствующих; на оных помилования образ взирая, прибегох, слеп сый душевныма очима и хром душевными чувствы. О, Свете Незаходимый! Просвети и исправи мя; веси всякую мою скорбь, веси всякую беду; не презри моления моего, о, Полезнодательнице! Не возгнушайся мене, грешнаго, не презри мене, сквернаго; вем, яко вся можеши, елика волиши, о добрая Надеждо моя, упование мое от сосцу матере моея. К Тебе привержен есмь от чрева матере моея, Тебе оставлен есмь; не остави мене, не отступи от мене, ныне и присно и во веки веков. Аминь.
Молитва ко Пресвятой Богородице пред иконою «Скоропослушница»
(празднование 9 / 22 ноября)
Преблагословенная Владычице, Приснодево Богородице, Бога Слова паче всякаго слова на спасение наше рождшая и благодать Его преизобильно паче всех приявшая, море явльшаяся Божественных дарований и чудес приснотекущая река, изливающая благость всем, с верою к Тебе прибегающим! Чудотворному Твоему образу припадающе, молимся Тебе, Всещедрей Матери Человеколюбиваго Владыки: удиви на нас пребогатыя милости Твоя, и прошения наша, приносимая Тебе, Скоропослушнице, ускори исполнити все, еже на пользу, во утешение и спасение коемуждо устрояющи. Посети, Преблагая, рабы Твоя благодатию Твоею, и подаждь недугующим цельбу и совершенное здравие, обуреваемым тишину, плененным свободу и различными образы страждущих утеши. Избави, Всемилостивая Госпоже, всяк град и страну от глада, язвы, труса, потопа, огня, меча и иныя казни временныя и вечныя, Матерним Твоим дерзновением отвращающи гнев Божий; и душевнаго разслабления, обуревания страстей и грехопадений свободи рабы Твоя, яко да непреткновенно во всяком благочестии поживше в сем веце, и в будущем вечных благ сподобимся благодатию и человеколюбием Сына Твоего и Бога, Емуже подобает всякая слава, честь и поклонение со Безначальным Его Отцем и Пресвятым Духом, ныне и присно и во веки веков. Аминь.
Молитва ко Пресвятой Богородице пред иконою «Целительница»
(празднование 18 сентября / 1 октября)
О Пресвятая Госпоже Царице Богородице, Высшая всех Небесных сил и Святейшая всех святых! Припадаем и поклоняемся Тебе пред всечестным и цельбоносным образом Твоим, воспоминающе дивное явление Твое болящему клирику Викентию, и усердно молим Тя, Всесильную рода нашего Заступницу и Помощницу: якоже древле подала еси исцеление тому клирику, тако и ныне исцели наша души и телеса, болезнующия ранами грехов и страстей многоразличных, избави нас от всяких напастей, бед, скорбей и вечнаго осуждения. Сохрани от душепагубных учений и безверия, от льстивых и наглых нападений невидимых врагов. Подаждь нам христианскую кончину, безболезненну, мирну, непостыдну, Святых Таин причастну. Сподоби нас на нелицеприятнем Судищи Христове стати одесную Всеправеднаго Судии и блаженный глас Его услышати: «Приидите, благословеннии Отца Моего, наследуйте уготованное вам Царствие от сложения мира». Аминь.
Молитва первая преподобному Агапиту Печерскому, врачу безмездному
(память 1 / 14 июня; 28 сентября / 11 октября)
О всеблаженне Агапите, земный ангеле и небесный человече! Припадаем к тебе с верою и любовию и молимтися прилежно: яви нам, смиренным и грешным, святое свое заступление; се бо грех ради наших не имамы свободы чад Божиих просити о потребах наших Господа и Владыку нашего, но тебе, молитвенника благоприятна к Нему, предлагаем и просим тя со усердием многим: испроси нам от благости Его благопотребная дары душам и телесем нашим: веру праву, любовь ко всем нелицемерну, в злостраданиих терпение, тяжкими болезнями одержимым от недугов исцеление, под бременем скорбей и напастей неудобоносимых падающим и жития своего отчаявшимся твоими молитвами получити скорое облегчение и избавление сподоби. Не забуди, блаженне отче, и обитель твою святую, присно тя чтущую, и всех живущих и подвизающихся в ней и на поклонение в ню приходящих, и соблюди их невредимыми от искушений диавольских и всякаго зла. Егда же приспеет наше от временнаго сего жития отшествие и к вечности преселение, не лиши нас помощи твоея небесныя, но молитвами твоими всех нас приведи в пристанище спасения и наследники яви нас быти всесветлаго Царствия Христова, да поем и славим неизреченныя щедроты Человеколюбца Бога, Отца и Сына и Святаго Духа, и твое вкупе с преподобными Антонием и Феодосием отеческое заступление во веки веков. Аминь.
Молитва вторая преподобному Агапиту Печерскому, врачу безмездному
О преподобне и богоносне отче наш Агапите! Слуго Божий преизряднейший, чудотворче и врачу всемилостивый, всем с верою и любовию тя призывающим скорый помощниче и теплый заступниче. Яко светильник пресветлый, ты просиял еси житием добродетельным в горах Киевских на пажити Богоматери: темже припадающе к раце многоцелебных мощей твоих, со страхом поклоняемся и любовию лобызаем, из глубины сердца к тебе взывая: помози нам, угодниче Божий, помяни нас пред Господем и испроси нам от Него оставление согрешений наших вольных и невольных, в недузех страждущим скорое исцеление подаждь, путешествующим заступление, скорбящим утешение, бедствующим помощь и избавление и вся потребная ко спасению. Яко да твоими, отче, святыми молитвами получивше благодать и милость от Всемилостиваго Спаса и Господа нашего Иисуса Христа, возвеличим и прославим препетое имя Его, Емуже со Отцем и Святым Духом слава и держава во веки. Аминь.
Молитва бессребреникам Косме и Дамиану Асийским
(память 1 / 14 ноября)
О чудотворцы славнии, врачеве безмезднии, Космо и Дамиане! Вы, от юности Христа Бога возлюбивше и Того повеления всем сердцем соблюдающе, аще и вдасте себе учению врачебному, но добродетельнаго ради жития и чистоты душевныя, силою Христа Бога, не врачевания токмо искусство, но паче неоскудную благодать исцеления всяких неисцельных недугов от Бога прияли есте. Отнюдуже, любовию и милосердием к недугующим подвизаеми, не токмо людем, но и скотом исцеления болезней подаваете, неисчетным множеством чудес ваших весь мир наполняете и не телесныя токмо недуги исцеляете, но и верою Христовою души просвещаете, в терпении болезней укрепляете, в тяжких недузех о исправлении жития вразумляете и ко Христу покаянием привлекаете. Темже ныне и нас, припадающих к вам пред честною иконою вашею, скоро услышите: юныя дети, вашея помощи во учении книжнем просящия, вашими молитвами наставите, да вашему житию ревнующе, не земное точию научение приобрящут, но паче во благочестии и правей вере выну да преуспеют. На одре болезни лежащим, человеческия помощи отчаянным, к вам же тепле с верою и усердною молитвою прибегающим, исцеление болезней вашим милостивым чудодейственным посещением даруйте. Многажды в болезни впадающия и от лютых недугов в уныние, малодушие и роптание пришедшия, данною вам от Бога благодатию в терпении утвердите и наставите, да уразумеют волю о них Божию святую и благую и сами себе и живот свой воле Христа Бога предают. В недузех сущих, о исправлении же жития нерадящих, во гресех не раскаивающихся, сердцем ожесточенных сокрушите во спасение и к покаянию призовите, да немощни суще телом, здрави пребудут душею и причастницы соделаются Божия спасительныя благодати. Братию святаго храма сего, вашему святому заступлению от Бога врученную, и всех к вам усердно прибегающих невредимы сохраните от долгонедужия, от болезней лютых и неисцельных, от разслабления тела, от изступления ума, от смертоносныя язвы, от внезапныя смерти и мощным ходатайством вашим к Богу соблюдите в правой вере твердых, во благочестии преспевающих, в добрых делех усердных, в молитве к Богу прилежных, да с вами вкупе сподобятся в будущем веце присно воспевати и славити всесвятое и великолепое имя Отца и Сына и Святаго Духа, во веки веков. Аминь.
Молитва первая великомученику и целителю Пантелеимону
(память 27 июля / 9 августа)
О великий угодниче Христов, страстотерпче и врачу многомилостивый Пантелеимоне! Умилосердися надо мною, грешным рабом, услыши стенание и вопль мой, умилостиви Небеснаго Верховнаго Врача душ и телес наших, Христа Бога нашего, да дарует ми исцеление от недуга, мя гнетущаго. Приими недостойное моление грешнейшаго паче всех человек. Посети мя благодатным посещением. Не возгнушайся греховных язв моих, помажи тыя елеем милости твоея и исцели мя; да здрав сый душею и телом, остаток дней моих, благодатию Божиею, возмогу провести в покаянии и угождении Богу и сподоблюся восприяти благий конец жития моего. Ей, угодниче Божий! Умоли Христа Бога, да предстательством твоим дарует здравие телу моему и спасение души моей. Аминь.
Молитва вторая великомученику и целителю Пантелеимону
О святый великомучениче и целителю Пантелеимоне, Бога милостиваго подражателю! Призри благосердием и услыши нас, грешных, пред святою твоею иконою усердне молящихся. Испроси нам у Господа Бога, Емуже со Ангелы предстоиши на небеси, оставление грехов и прегрешений наших. Исцели болезни душевныя и телесныя рабов Божиих, ныне поминаемых, зде предстоящих и всех христиан православных, к твоему заступлению притекающих. Се бо мы, по грехом нашим люте одержимы есмы многими недуги и не имамы помощи и утешения, к тебе же прибегаем, яко дадеся ти благодать молитися за ны и целити всяк недуг и всяку болезнь. Даруй убо всем нам святыми молитвами твоими здравие и благомощие души и тела, преспеяние веры и благочестия и вся к житию временному и ко спасению потребная. Яко да сподобившеся тобою великих и богатых милостей, прославим тя и Подателя всех благ, дивнаго во святых Бога нашего, Отца и Сына и Святаго Духа. Аминь.
Молитва третья великомученику и целителю Пантелеимону
(благодарственная, по исцелении от болезни)
О святый великомучениче, целителю и чудотворче Пантелеимоне, всеизрядный угодниче Божий и молитвенниче присный христиан православных! Достойно наречен еси Пантелеимоном, еже есть всемилостивый, яко, прияв от Бога благодать молитися за ны и болезни целити, ты богатно подаеши всем, к тебе притекающим, различная исцеления и вся к жизни временней и ко спасению потребная. Сего ради и мы, недостойнии, сподобившеся твоея милости, паки пред святою твоею иконою прибегаем к тебе, и прославляюще тя, яко искренняго угодника Божия, нашего же вернаго молитвенника и исцелителя, усердне благодарим тя и Подателя всех благ Господа Бога нашего о великих благодеяниих, от Него тобою нам бывших. Приими убо милостивно малое сие молитвенное благодарение наше, зане не имамы ино что по достоянию воздати тебе, и прочее время живота нашего не лиши нас, немощных и грешных, твоея помощи и молитвеннаго ходатайства у Господа Бога нашего, Емуже подобает всякая слава, благодарение и поклонение, Отцу и Сыну и Святому Духу, ныне и присно и во веки веков. Аминь.
Молитва преподобному Сампсону Странноприимцу
(память 27 июня / 10 июля)
О теплый молитвенниче, благостный отче, преподобне Сампсоне! Моли Бога о мне, грешнем, и низпосли от Всеблагаго Владыки помощь ми и избавление, привременна бо есть жизнь моя и исполнена труда, скорбей и болезней. Укрепи сердце мое, да возмогу понести тяготу мою, и не попусти, да превозмогут искушения многая моя малыя силы, но споспешествуй мне заступлением твоим, и посреде обстояний и бед управи путь мой в Царство Небесное, да славлю прославльшагося в тебе Господа во веки веков. Аминь.
Молитва святителю Спиридону Тримифунтскому
(память 12 / 25 декабря)
О преблаженне святителю Спиридоне, великий угодниче Христов и преславный чудотворче! Предстояй на Небеси Престолу Божию с лики Ангел, призри милостивым оком на предстоящия зде люди и просящия сильныя твоея помощи. Умоли благосердие Человеколюбца Бога, да не осудит нас по беззакониим нашим, но да сотворит с нами по милости Своей. Испроси нам у Христа и Бога нашего мирное и безмятежное житие, здравие душевное и телесное, земли благоплодие и во всем всякое изобилие и благоденствие, и да не во зло обратим благая, даруемая нам от щедраго Бога, но во славу Его и в прославление твоего заступления. Избави всех, верою несумненною к Богу приходящих, от всяких бед душевных и телесных, от всех томлений и диавольских наветов. Буди печальным утешитель, недугующим врач, в напастех помощник, нагим покровитель, вдовицам заступник, сирым защитник, младенцем питатель, старым укрепитель, странствующим путевождь, плавающим кормчий и исходатайствуй всем, крепкия помощи твоея требующим, вся, яже ко спасению полезная, яко да твоими молитвами наставляеми и соблюдаеми, достигнем вечнаго покоя и купно с тобою прославим Бога, в Троице Святей славимаго, Отца и Сына и Святаго Духа, ныне и присно и во веки веков. Аминь.
***
Текст приводится по изданию: Домашний молитвослов для всей семьи. – М.: Изд. Тихомирова М.Ю., 316 с. Обложка. Формат издания 115 х 165 мм. – см. раздел нашего Каталога «Молитвословы»
Рекомендуем также:
 |
 |
 |
____________________
[1] Текст канона приводится по изданию: Православный молитвослов. Молитвы на всякую потребу. – М.: Издательство Московского Подворья Свято-Троицкой Сергиевой Лавры, 2013, с. 481–488.
[2] Когда написано «Слава:», надо читать полностью: «Слава Отцу и Сыну и Святому Духу».
[3] Когда написано «И ныне:», надо читать полностью: «И ныне и присно и во веки веков. Аминь».