Рейтинг@Mail.ru
Рейтинг@Mail.ru
Ваш браузер устарел. Рекомендуем обновить его до последней версии.
Каноны на понедельник (вечер воскресенья)

КАНОНЫ НА ПОНЕДЕЛЬНИК

(вечер воскресенья)

 

КАНОН И АКАФИСТ

СЛАДЧАЙШЕМУ ГОСПОДУ НАШЕМУ

ИИСУСУ ХРИСТУ

(см. каноны на воскресенье)

 

КАНОН

МОЛЕБНЫЙ КО ПРЕСВЯТОЙ БОГОРОДИЦЕ,

ПОЕМЫЙ ВО ВСЯКОЙ СКОРБИ ДУШЕВНОЙ

И ОБСТОЯНИИ

(см. каноны на воскресенье)

Или: канон Пресвятой Богородице Октоиха

настоящего гласа

 

КАНОН БЕЗПЛОТНЫМ[1]

 

Тропарь, глас 4-й

 

Небесных воинств Архистратизи, молим вас присно мы недостойнии, да вашими молитвами оградите нас кровом крил невещественныя вашея славы, сохраняюще ны припадающия прилежно и вопиющия: от бед избавите ны, яко чиноначальницы Вышних Сил.

 

Канон

Егоже краегранесие[2] сицево:

Да торжествуем, богомудрии, похвалу

Собору Безплотных.

Творение Иоанна монаха

 

Глас 8-й

 

Песнь 1

 

Ирмос: Песнь возслем, людие, чудному Богу нашему, свободившему Израиля от работы, песнь победную поюще и вопиюще: поим Тебе, единому Владыце.

Припев: Святии Архангели и Ангели, молите Бога о нас.

Вси воспоим, людие, вся направляющую невещественныя лики вышняго чиноначалия, Троицу Несозданную, поюще: Свят, Свят, Свят еси, Боже Вседержителю.

Припев: Святии Архангели и Ангели, молите Бога о нас.

Положил еси тварем начаток существо безплотное, Творче Ангелов, пречистый Твой Престол окружающа, звати Ти: Свят, Свят, Свят еси, Боже Вседержителю.

Слава: Радуйся, Гаврииле, Божия воплощения возвестителю, Михаиле же, чинов невещественных предстателю, непрестанно зовуще: Свят, Свят, Свят еси, Боже Вседержителю.

И ныне, Богородичен: Трепещу таинства, Христе, Твоего схождения, яко Иже естеством Бог, приял еси от Девы родитися яко человек, да спасеши мир от работы сопротивнаго.

 

Песнь 3

 

Ирмос: Страх Твой, Господи, всади в сердца раб Твоих и буди нам утверждение, Тя во истине призывающих.

Припев: Святии Архангели и Ангели, молите Бога о нас.

Крепостию уставил еси, Безсмертне, сильныя, совершающия пресвятое Твое хотение, Тебе в вышних всегда предстоящия.

Припев: Святии Архангели и Ангели, молите Бога о нас.

Ходатаи Твоего вочеловечения и честнаго востания, Ангельския чиноначальники, Христе, за ны приими молящияся.

Слава: Ангелы приставил еси хранители человеком, яко Благоутробен, служители же показал еси, Христе, спасения Твоим угодником.

И ныне, Богородичен: Неизреченно рождши, Богоневесто, Спаса и Господа, избави нас от тли, Тя воистину призывающих.

 

Господи, помилуй. (Трижды)


Седален, глас 8-й

Подобен: Повеленное тайно:

 

Небесных начальниче и первостоятелю высокопрестольных и страшных Божественныя славы, Михаиле Архистратиже, Ангелом чиноначальниче, со всеми Безплотными, Емуже служиши Владыце, о всем мире непрестанно молися и испроси оставление грехов, и милость и благодать обрести в день судный.

 

Слава, и ныне: Богородичен

 

В пучину люте впад уныния, от множества лукавых и беззаконных моих дел, приидох в недоумение, и отчаянием ныне одержуся: Владычице Богородице, Ты мя спаси, Ты ми помози: грешных бо Ты еси очищение и чистота спасительная.

 

Песнь 4

 

Ирмос: Всел еси на кони, апостолы Твоя, Господи, и приял еси рукама Твоима узды их, и спасение бысть еждение Твое верно поющим: слава силе Твоей, Господи.

Припев: Святии Архангели и Ангели, молите Бога о нас.

Всел еси на Ангелы, якоже на кони, Человеколюбче, и приял еси рукою Твоею вожда их, и спасение бысть еждение Твое верно Ти вопиющим: слава силе Твоей, Господи.

Припев: Святии Архангели и Ангели, молите Бога о нас.

Покрывает Ангелы добродетель Твоя, Безсмертне, и земныя исполняет концы Твоего славнаго, Безначальне, Божественнаго хваления. С нимиже Тебе вопием: слава силе Твоей, Господи.

Слава: Изшел еси, Щедре, на спасение людем Твоим, Христе; созываеши же други силы Твоя, и веселие бысть во спасении Твоем безвещным, вопиющим: слава силе Твоей, Господи.

И ныне, Богородичен: Дева и Мати паче естества явилася еси, Пречистая, яко Бога Тогоже и Человека Христа родила еси, от Ангел хвалимаго; людей Твоих печаль преложи на радость молитвами Твоими.


Песнь 5

 

Ирмос: От нощи неведения боговедением просветивый концы, просвети мя утром человеколюбия Твоего, Господи.

Припев: Святии Архангели и Ангели, молите Бога о нас.

Невозвратным желанием всегда к высоте, Христе, носими, крайнее всех Желание, Ангельския силы непрестанно славят.

Припев: Святии Архангели и Ангели, молите Бога о нас.

Ты разумныя по существу, нетленныя благодатию Твоею, Христе, поставил еси певцы Твоему величествию, Ангелы Твоя по образу соделав, Непостижиме.

Слава: Ты непреклонны на горшая, к Тебе приближением, Христе, сохранил еси Твоя слуги: источник бо благости Ты еси, благотворя достойно Ти служащим.

И ныне, Богородичен: Умерщвленную мою душу страстьми мерзкими, Всенепорочная, оживи, животу Хранителя рождши, и к стезе вечней и блаженному житию устреми.

 

Песнь 6

 

Ирмос: Иону в ките, Господи, единаго вселил еси, мене же связаннаго мрежами вражиими, яко от тли онаго, спаси.

Припев: Святии Архангели и Ангели, молите Бога о нас.

Боголепно от несущества, Господи, словом привел еси существа небесных, Безсмертне, воинств, световидны сих соделовая.

Припев: Святии Архангели и Ангели, молите Бога о нас.

Служителие честнии Божия хваления бысте, Безплотнии, граждане небеснии и Божественная воистину скиния, Творцу достойно служаще.

Слава: Безплотных чини умнии Тя, Сыне Божий Пребезначальный, хвалят непрестанно и славословят, яко Творца и Создателя всяческих.

И ныне, Богородичен: Всепетая, Света порождши, всем свет дающаго, тьму моих прегрешений, Чистая, отжени Матерними Твоими к Нему молитвами.

 

Господи, помилуй. (Трижды)

Слава, и ныне:

 

Кондак, глас 2-й

 

Архистратизи Божии, служителие Божественныя славы, Ангелов начальницы и человеков наставницы, полезное нам просите и велию милость, яко Безплотных Архистратизи.

 

Икос

 

Рекл еси, Человеколюбче, в Писаниих Твоих, множеству радоватися Ангел о человеце едином кающемся, Безсмертне; тем и мы, в беззакониих суще, безгрешне едине Сердцеведче, Тя молити всегда дерзаем яко Благоутробнаго, ущедрити нас и послати недостойным умиление, Владыко, и подати нам прощение грехов: о всех бо нас молятся Тебе, яко Безплотных Архистратизи.

 

Песнь 7

 

Ирмос: Отроцы еврейстии в пещи попраша пламень дерзновенно и на росу огнь преложиша, вопиюще: благословен еси, Господи Боже, во веки.

Припев: Святии Архангели и Ангели, молите Бога о нас.

Светы явил еси, Щедре, Ангел Твоих невещественное существо, неизреченнаго света исполняеми, непрестанно зовущия: благословен еси, Господи Боже, во веки.

Припев: Святии Архангели и Ангели, молите Бога о нас.

Емуже предстоят непрестанно служаща тьмы Ангельския, лица же зрети не терпят Божества; благословен еси, зовуще, Боже, во веки.

Слава: Словом Твоим ипостасным, Господи, Ангельское естество соделал еси, освятив же Божественным Духом, Троицу богословити научил еси, Боже, во веки.

И ныне, Троичен: Три убо зряще сущия Ипостаси, неописанное славим Существо, Отца и Слова со Духом, вопиюще: благословен еси, Господи Боже отец наших.

 

Песнь 8

 

Ирмос: На горе святей прославльшася и в купине огнем Приснодевы Моисеови тайну явльшаго, Господа пойте и превозносите во вся веки.

Припев: Святии Архангели и Ангели, молите Бога о нас.

Ангельскому поревнуем житию, и разум вперим к высоте, и с ними невещественно воспоем Господа и превозносим во веки.

Припев: Святии Архангели и Ангели, молите Бога о нас.

Ликовственницы лика небеснаго, иже Престол обстояще славы, о Бозе всегда обращаеми Ангели, поют и славословят во вся веки.

Слава, Троичен: Невещественна огня творящей пламень, на высоте непрестанно служащих, и Ангелы духи являющей, Троице покланяемся и славословим во вся веки.

И ныне, Богородичен: Иже во утробу всельшася Девы, и от Сея странно и выше слова наздавша древняго Адама, Господа поем и славословим во веки.

 

Песнь 9

 

Ирмос: Уставы прешла еси естества, Содетеля заченши и Господа, и дверь спасения мирови была еси. Тем Тя, Богородице, непрестанно величаем.

Припев: Святии Архангели и Ангели, молите Бога о нас.

Тя, неизреченно совокупившаго небесным, Христе, земная, и едину Церковь совершивша Ангелом и человеком, непрестанно величаем.

Припев: Святии Архангели и Ангели, молите Бога о нас.

Ангели и Архангели, Престоли, Власти же и Господствия, Начала и Силы, и Херувими и Серафими, с Богородицею о мире молитеся.

Слава, Троичен: Тя, Троице, славим, от небытия вся сотворившую, и чини ангельския украсившую, и Божественными зарями просветившую концы.

И ныне, Богородичен: Радуйся, Святая Богоневесто; радуйся, Свет мирови рождши верным; радуйся, стено и покрове всех нас; Бога, яко благодателя, за ны непрестанно моли.

 

Молитва

 

К вам, яко заступником и хранителем живота моего, аз окаянный, припадая, молюся: подадите мне молитвами вашими дневное пребывание богоугодно и неискусно от злых деяний и помышлений прейти. Отверзите слух ушию моею, да услышу и разумею дела и словеса Божия душеполезная, да прозрю внутреннима очима, тьмою греховною обдержимый. Молите за мя, по вся часы согрешающаго, да не пояст мене меч ярости Господни: зело бо превзыдоша беззакония моя главу мою, и яко бремя тяжкое отяготеша на мне. Ты же, Господи мой, Господи, призри на мя и помилуй мя, и изведи из темницы греховныя душу мою, прежде даже не отиду отсюду, и не прииду на Страшный оный Суд Твой. Приими молящияся за ны святыя Ангелы Твоя, иже окрест Престола Твоего выну со страхом предстоят, и тех молитвами, изряднее же Пречистыя Твоея Матере, избави мя Страшнаго онаго и грознаго Суда Твоего. Ты бо еси Агнец Божий, вземляй всего мира грехи, распятый на Кресте нашего ради спасения; вонми молитве моей и посли Ангела хранителя души моей и телу, да тем наставляем, избавлюся от всяких врагов видимых и невидимых и сподоблюся получити Твою милость со всеми от века Тебе благоугодившими: яко Ты еси Бог наш, и к Тебе прибегаю, и на Тя надеюся, аще и согреших паче человек, но Тебе не отступих, ни руку моею воздех ко иному богу. Тебе молюся, Господи Иисусе Христе, Тя благословлю и Тебе покланяюся от Троицы единому, со Отцем и Святым Духом, ныне и присно и во веки веков. Аминь.

 

КАНОН АНГЕЛУ ХРАНИТЕЛЮ

(см. каноны на воскресенье)



[1] В названии канона сохранена старая орфография. Этот канон называют также каноном святым Архангелам и Ангелам. Текст приводится по изданию: Канонник. – М.: Издательство Московской Патриархии Русской Православной Церкви, 2012.

[2] Буквально – краестишие или краестрочие (акростих), т.е. стихотворение, в котором начальные буквы стихов (строк) образуют слово или фразу, часто – имя автора. Акростих в канонах – это сочетание начальных букв ирмосов и тропарей.