Рейтинг@Mail.ru
Рейтинг@Mail.ru
Ваш браузер устарел. Рекомендуем обновить его до последней версии.
Каноны на четверг (вечер среды)

КАНОНЫ НА ЧЕТВЕРГ

(вечер среды)

 

КАНОН ПОКАЯННЫЙ

КО ГОСПОДУ НАШЕМУ ИИСУСУ ХРИСТУ

(см. каноны на вторник)

 

КАНОН

МОЛЕБНЫЙ КО ПРЕСВЯТОЙ БОГОРОДИЦЕ,

ПОЕМЫЙ ВО ВСЯКОЙ СКОРБИ ДУШЕВНОЙ

И ОБСТОЯНИИ

(см. каноны на воскресенье)

Или: канон Пресвятой Богородице Октоиха

настоящего гласа

 

КАНОН АНГЕЛУ ХРАНИТЕЛЮ

(см. каноны на воскресенье)

 

КАНОН СВЯТЫМ АПОСТОЛАМ[1]

 

Тропарь, глас 3-й

 

Апостоли святии, молите Милостиваго Бога, да прегрешений оставление подаст душам нашим.

Канон святым апостолам

Творение Феофаново

 

Глас 4-й

 

Песнь 1

 

Ирмос: Моря чермную пучину невлажными стопами древний пешешествовав Израиль, крестообразныма Моисеовыма рукама Амаликову силу в пустыни победил есть.

Припев: Святии апостоли, молите Бога о нас.

Божественнии Утешителя органи, возглашающии Сего Божественными всегда дохновеньми, воспеша песнь нам, яко воистину спасительную, благославнии Христовы апостоли.

Припев: Святии апостоли, молите Бога о нас.

На одре лености слежаща и в смерти греховней недугом душевным люте истаема, посещения мя, славнии Христовы самовидцы, сподобите.

Слава: Иже словом безсловесие разрешивше языков апостоли, от безсловесных деяний люте омраченное сердце мое, Утешителя благодатию просветите, апостоли.

И ныне, Богородичен: Дева по рождестве нетленна пребыла еси, нас ради явльшагося на земли паче слова рождшая: Егоже прилежно моли просветити души наша.

 

Песнь 3

 

Ирмос: Веселится о Тебе Церковь Твоя, Христе, зовущи: Ты моя крепость, Господи, и прибежище, и утверждение.

Припев: Святии апостоли, молите Бога о нас.

Град Твой, Боже, словесных рек Твоих течения ученик, Владыко, священно возвеселяют.

Припев: Святии апостоли, молите Бога о нас.

Граждане небеснии, сослужебницы мысленным чином, всеславнии апостоли, всякия нас скорби избавите.

Слава: Утвердивый, Христе, словесныя Твоя небеса, утверди мя тех молитвами на камени Твоих хотений, яко благоутробен.

И ныне, Богородичен: Яко Мати Тя молит с ликом ученик, Господи, яже Тебе чисто родившая: даруй нам милости Твоя.

 

Господи, помилуй. (Трижды)

Седален, глас 4-й

 

Светила в концех ученики Твоя, Христе, явил еси, сияющия душам, сущим во тьме, разум твой, Владыко; и лесть идольскую тех ради омрачив, ученьми благочестия просветил еси мир; тех мольбами спаси души наша.

 

Слава, и ныне: Богородичен

 

Прибежище сущим в лютых, пременение к Богу согрешающим, Пречистая Владычице, спаси нас от всякаго обстояния, и озлобления человеческаго, и страшнаго мучения, и страстей безчестия, несумненною верою Тя присно призывающих, Дево Всепетая.

 

Песнь 4

 

Ирмос: Вознесена Тя видевши Церковь на Кресте, Солнце Праведное, ста в чине своем, достойно взывающи: слава силе Твоей, Господи.

Припев: Святии апостоли, молите Бога о нас.

Навел еси на море кони Твоя избранныя, Человеколюбче, зловерия воды возмущающия и всем разум Твой истинный возвещающия.

Припев: Святии апостоли, молите Бога о нас.

Звезды, просветивше благочестием мысленную твердь церковную, славнии апостоли, от нощи неведения и прегрешений избавите мя.

Слава: Явльшеся якоже стрелы изощрени, апостоли, вражия разжженныя стрелы злобы моея ныне угасите, и помышление мое утвердите.

И ныне: Душу мою, огорченную ядом, сопротивнаго угрызением, действенным врачеванием исцели, молитвами, Христе, Рождшия Тя, и священных апостол Твоих.

 

Песнь 5

 

Ирмос: Ты, Господи мой, Свет в мир пришел еси, Свет Святый, обращаяй из мрачна неведения верою воспевающия Тя.

Припев: Святии апостоли, молите Бога о нас.

Лозы животныя процветающе гроздие, напоиша всех вина мысленнаго веселия, славнии апостоли.

Припев: Святии апостоли, молите Бога о нас.

К свету заповедей Божиих наставите, апостоли, иже во тьме душевнаго уныния безумно пребывающия.

Слава: Избавите нас душевных прегрешений, и Суда будущаго, и тли, и бед, апостоли блаженнии.

И ныне: Спаси мя, Боже, яко Человеколюбец, спаси мя мольбами неизреченно Тебе Родившия, и всех Божественных апостол Твоих.

 

Песнь 6

 

Ирмос: Пожру Ти со гласом хваления, Господи, Церковь вопиет Ти, от бесовския крове очищшися, ради милости от ребр Твоих истекшею кровию.

Припев: Святии апостоли, молите Бога о нас.

Пастыря добраго богоизбранная овчата, разсеянная по миру, волков всяко зверство во овчую кротость верою преложиша.

Припев: Святии апостоли, молите Бога о нас.

Божественнаго рая древеса доброплодная, преокаянныя души моея всенеплодство, во благоплодие добродетельнаго нрава приведите, апостоли.

Слава: Уязвен бых сластей оружием, и умрох: иже от Христа приемше славнии благодать воскрешати мертвыя, умерщвленную окаянную мою душу оживите.

И ныне: Устави души моея свирепую бурю, Боже всех щедрый, мольбами рождшия Тя Богородицы, апостол же и мученик Твоих.

 

Господи, помилуй. (Трижды)

Слава, и ныне:

 

Кондак, глас 2-й

 

Твердыя и Боговещанныя проповедатели, верх ученик Твоих, Господи, приял еси в наслаждение благих Твоих и покой: болезни бо онех и смерть приял еси паче всякаго всеплодия, Едине сведый сердечная.

 

Икос

 

Уясни ми язык, Спасе мой, разширив ми уста и исполнив я, умили сердце мое, да яже глаголю, последую, и яже учу, сотворю первее: всяк бо творя и уча, рече, сей велик есть. Аще бо глаголя не творю, яко медь звенящая вменюся. Темже глаголати ми подобная и творити полезная научи, Едине сведый сердечная.

Песнь 7

 

Ирмос: В пещи Авраамстии отроцы персидстей, любовию благочестия паче, нежели пламенем опаляеми, взываху: благословен еси в храме славы Твоея, Господи.

Припев: Святии апостоли, молите Бога о нас.

Крепостию всесвятыя проповеди, нелестнии апостоли Христовы, прелести зиму разрушисте и просветисте богоразумием верных мудрование.

Припев: Святии апостоли, молите Бога о нас.

Миро благоуханное источающе всегда, Божественнии ученицы, мира умнаго благовония притекающих к вам исполните и злосмрадныя страсти отжените.

Слава: Растлевшаго мя плотскими безместии, Слова нетленнаго славнии ученицы, спасите мя поюща: благословен еси в храме славы Твоея, Господи.

И ныне: Лик ангельский, лик мученик и апостол Твоих, Слове, молят всегда многое благоутробия Твоего человеколюбие: всех ущедри Богородицею, яко Благоутробен.

Песнь 8

 

Ирмос: Руце распростер Даниил, львов зияния в рове затче; огненную же силу угасиша, добродетелию препоясавшеся, благочестия рачители отроцы взывающе: благословите, вся дела Господня, Господа.

Припев: Святии апостоли, молите Бога о нас.

Уста огнедохновенная Христова, иже бездверная уста заградивше, и спасительное проповедание повсюду разсеявше, от уст волка мысленнаго избависте вопиющия: вся дела, Господа пойте, и превозносите Его во вся веки.

Припев: Святии апостоли, молите Бога о нас.

Вострубите окрест моея умерщвленныя души, благогласныя трубы Христовы, апостоли славнии, и от гроба отчаяния и уныния лютаго сию воздвигните, во еже пети: вся дела, Господа пойте, и превозносите Его во вся веки.

Слава: Мене, законы Твоя, Христе, поправшаго ума развращением, мене, Владыко, блуднаго, во глубину поползшася, и обычаю лукавому присно работающа, не презри, учеников Твоих мольбами.

И ныне, Богородичен: Марие, Госпоже всяческих, обладаема мя от змия, и согрешающа всегда, свободи молитвами Твоими, и поработи Христу, в житии чисте воспевати: вся дела, Господа пойте, и превозносите во вся веки.

 

Песнь 9

 

Ирмос: Камень нерукосечный от несекомыя горы Тебе, Дево, краеугольный отсечеся, Христос совокупивый разстоящаяся естества: тем веселящеся, Тя, Богородице, величаем.

Припев: Святии апостоли, молите Бога о нас.

Камение избранное положеннаго во главу угла Камене, создасте всех верных сердца, каменем веры вражия создания, апостоли, развергше.

Припев: Святии апостоли, молите Бога о нас.

Решити и вязати от Христа приемше власть, разрешите зол моих соуз, и к любви Божией привяжите, и Царствия причастника Божественнаго соделайте, апостоли.

Слава: Божественнии Владыки облацы, изсохшее мое сердце всяким лукавым деянием, Божественными тучами ныне напойте и плодоносно покажите, апостоли богоблаженнии.

И ныне, Богородичен: Со святыми Ангелы, с Божественными апостолы, со славными мученики, Твоего моли Сына и Бога, Богородительнице Пречистая, от бед избавити души наша.

 

Молитва

 

Владыко Господи, Твой есть день и Твоя есть нощь, Тебе вся тварь работает, и всякое дыхание славит Тя; аз же окаянный, все житие мое скончав блудно, страхом одержим есмь, яко помянух дни первыя, и до ныне, в няже вся безместная сотворих злая; и того ради не имам к Тебе дерзновения, яко беззакония моя велика, и безмернии греси мои, врази же всегда стужают ми. Но, Господи мой, Господи, отверзый устне немому, и моя уста отверзи, да глаголю в молитве угодная Тебе: се бо душа моя яко земля безводная оста, и не может приносити о себе плода; но даждь ми от семене Святаго Твоего Духа, и напой мя росою благодати Твоея, да принесу Тебе плод покаяния. Господи Иисусе Христе, хотяй всем человеком спастися, услыши молитву мою, молитвами святых апостол Твоих, яко тии молятся за ны, и аз теми у Тебе прошу прощения, яко тех молитвы присно послушаеши; молением их спаси мя грешнаго, исцели болезни сердца моего, уврачуй струпы души моея, разжзи утробы моя пламенем страха Твоего, да пояст терние грехов моих, и душу мою любовию прохлади; к Тебе бо желаю истинному Свету и Подателю света, у Тебе единаго прошу милости, спаси мя: насыти алчущую и напой жаждущую душу мою, от потока безчисленнаго милосердия Твоего; покрый мя благодатию Твоего человеколюбия от всякаго зла, да Тобою храним, избавлюся многих сетей лукаваго, по вся дни на мя пропинаемых, и да не похвалятся врази мои о мне, рабе Твоем, уповающем на Тя; спаси мя по милости Твоей, да воздам обеты моя, до последняго издыхания каяйся о своих согрешениих, и прославлю пресвятое имя Твое, со Отцем и Святым Духом, ныне и присно и во веки веков. Аминь.

КАНОН

СВЯТИТЕЛЮ И ЧУДОТВОРЦУ НИКОЛАЮ,

АРХИЕПИСКОПУ МИР ЛИКИЙСКИХ[2]

 

Тропарь, глас 4-й

 

Правило веры и образ кротости, воздержания учителя яви тя стаду твоему яже вещей истина; сего ради стяжал еси смирением высокая, нищетою богатая, отче священноначальниче Николае, моли Христа Бога спастися душам нашим.

 

Канон

святому и великому чудотворцу Николаю

Творение Феофаново

 

Глас 2-й

 

Песнь 1

 

Ирмос: Во глубине постла иногда фараонитское всевоинство преоруженная сила, воплощшееся же Слово всезлобный грех потребило есть, препрославленный Господь, славно бо прославися.

Припев: Святителю отче Николае, моли Бога о нас.

Венценосец Престолу Христову, премудре Николае, предстоя со ангельскими чинми, просвещение ми даруй, озаряющее души моея омрачение: яко да восхвалю радуяся твою, преблаженне, память. (Дважды)

Слава: Прославляяй вся Господь, иже Того славящия, тя верным прибежище дал есть, напастей избавляюща, притекающия ко твоему крову, Николае, и призывающия тя верою и любовию, преславне.

И ныне, Богородичен: Изравнитися желание ми вложь змий вселукавый, Содетелю, яко пленника восхити; Тобою же, Пречистая, призван бых, обожився истинно: Ты бо, Богомати, мене Обожившаго родила еси.

 

Песнь 3

 

Ирмос: Процвела есть пустыня яко крин, Господи, языческая неплодящая Церковь, пришествием Твоим, в нейже утвердися мое сердце.

Припев: Святителю отче Николае, моли Бога о нас.

Николае блаженне, Владыки присный ученик ты быв, спасаеши к тебе притекающия от лютых бед и смерти горькия. (Дважды)

Слава: Очисти рабы Твоя и грехов оставление яко Благ даруй, Николая, Твоего угодника иже к Тебе ходатайствы, Многомилостиве.

И ныне, Богородичен: Устави смущение страстей моих, Владычице, и жизнь окорми, Пресвятая, Бога рождшая: в Немже утвердися сердце мое.

 

Господи, помилуй. (Трижды)

 

Седален, глас 8-й

Подобен: Премудрости:

 

Восшед на высоту добродетелей, Божественными оттуду, отче, озарился еси сиянии чудес, пресветел воистину явився мирови пастырь, и в напастех сый предстатель непобедим. Темже преславно врага побеждь, лжу отгнал еси и человеки спасл еси от смерти, Николае; моли Христа Бога грехов оставление даровати чтущим любовию святую память твою.

 

Слава, и ныне: Богородичен

 

Прибежище сущим в лютых, пременение к Богу согрешающим, Пречистая Владычице, спаси нас от всякаго обстояния, и озлобления человеческаго, и страшнаго мучения, и страстей безчестия, несумненною верою Тя присно призывающих, Дево Всепетая.

 

Песнь 4

 

Ирмос: Пришел еси от Девы, не ходатай, ни Ангел, но Сам, Господи, воплощься, и спасл еси всего мя человека. Тем зову Ти: слава силе Твоей, Господи.

Припев: Святителю отче Николае, моли Бога о нас.

Приближився чисте зарям духовным, светоносец был еси, мира просвещая концы, всем предстоя и вся спасая, верою к тебе притекающия.

Припев: Святителю отче Николае, моли Бога о нас.

Избавляяй от смерти, якоже явился еси первее, Николае, юноши, преподобне; тако и ныне мя спаси от всякаго обстояния и напастей, и бед, всеблаженне.

Слава: Облистал еси добродетелей сиянием, всебогате, подражатель преизряден своему Владыце быв, спасаеши же призываем, иже благоговением и любовию тя славящия.

И ныне, Богородичен: Найде на Тя Владыка и Господь воплощаем и спасаяй яко благоутробен всего мя человека. Темже зову Ти: радуйся, Богородице Всенепорочная.

 

Песнь 5

 

Ирмос: Просвещение во тьме лежащих, спасение отчаянных, Христе Спасе мой, к Тебе утренюю, Царю мира, просвети мя сиянием Твоим: иного бо разве Тебе бога не знаю.

Припев: Святителю отче Николае, моли Бога о нас.

Боголепным житием, преблаженне, просвещаем, осужденныя неправедным изречением умрети, представ, избавил еси, Владыце Христу зовущия: иного разве Тебе бога не знаем. (Дважды)

Слава: На небесех присносущную славу ныне зря, и неизглаголанныя и Божественныя зари пресветлыми наслаждаяся сиянии, покрый мя предстательством твоим, преподобне, угодниче Христов всечестне.

И ныне, Богородичен: Да Твой взыщеши образ, погребенный страстьми, Спасе, небесных утаився сил, воплощься от Девы, явился еси Тебе зовущим: иного разве Тебе бога не знаем.

 

Песнь 6

 

Ирмос: В бездне греховней валяяся, неизследную милосердия Твоего призываю бездну: от тли, Боже, мя возведи.

Припев: Святителю отче Николае, моли Бога о нас.

Иже победы, Николае, венец на твоем версе достойно положися: яко победитель убо изряден, тя призывающия спаси. (Дважды)

Слава: Умерщвлена мя, блаженне, прегрешении, и страстными треволнении погружаема, явлься спаси, направляя ко пристанищу Божественныя воли.

И ныне, Богородичен: На Тя упование возложих, Мати Приснодево, спасения моего и Тя Предстательницу положих живота, тверду и непоколебиму.

 

Господи, помилуй. (Трижды)

Слава, и ныне:

Кондак, глас 3-й

 

В Мирех, святе, священнодействитель показался еси: Христово бо, преподобне, Евангелие исполнив, положил еси душу твою о людех твоих и спасл еси неповинныя от смерти. Сего ради освятился еси, яко великий таинник Божия благодати.

 

Икос

 

Воспоим ныне святителя песньми, мирским людем пастыря и учителя, да молитвами его просветимся. Се бо явися весь чист, нетленен духом, Христови принося жертву непорочну, чисту, Богови благоприятну, яко святитель очищен и душею и телом. Темже есть воистину Церкви предстатель и поборник сея, яко великий таинник Божия благодати.

 

Песнь 7

 

Ирмос: Образу златому на поли Деире служиму, трие Твои отроцы небрегоша безбожнаго веления, посреде же огня ввержени, орошаеми пояху: благословен еси, Боже отец наших.

Припев: Святителю отче Николае, моли Бога о нас.

Во острое искушение впадох люте подстрекаем, и ко вратом ада приближихся, печальми ударяем; спаси мя молитвами твоими, блаженне, и возстави поюща: благословен Бог отец наших. (Дважды)

Слава: Незаходимаго света невещественными молниями облистаем, сущия во тьме скорбей, озлобленныя исхити и ко просвещению веселия настави, поющия: благословен Бог отец наших.

И ныне, Богородичен: Моли Христа, Сына Твоего и Бога, Богородительнице, проданным лютыми прегрешеньми и лестьми змииными, Кровию Его Честною избавитися, поющим: благословен еси, Боже отец наших.

 

Песнь 8

 

Ирмос: В пещь огненную ко отроком еврейским снизшедшаго и пламень в росу преложшаго Бога, пойте, дела, яко Господа, и превозносите во вся веки.

Припев: Святителю отче Николае, моли Бога о нас.

Яко Благ и Милосерд, иже во глубине напастей одержимыя свободи, блаженне, содержащих лютых, Николае, разрешение подая молитвами твоими, яже ко Спасу Христу, священнотаинниче. (Дважды)

Слава: Таинник иже паче ума, святых служитель и небесных сый, богомудре, архиерей же верен, прегрешений оставления проси от Спаса нашего, священноявленне.

И ныне, Богородичен: Изнемогает мой ныне ум, во глубины впад безчестия, яко отвсюду различными объят есмь злыми; но Ты, Дево, исцели, безстрастия светом одевающи.

 

Песнь 9

 

Ирмос: Безначальна Родителя Сын, Бог и Господь, воплощься от Девы, нам явися, омраченная просветити, собрати расточенная: тем Всепетую Богородицу величаем.

Припев: Святителю отче Николае, моли Бога о нас.

Свещами благодати, богомудре, просвещаем, и светильник благочестия яве быв, сущия в напастех спасаеши, и иже во глубине морстей избавляеши, и питаеши алчущия преславно, всеблаженне. (Дважды)

Слава: Яко в раи пищи ныне водворяем и неизреченную славу ясно зря, от небесных круг певцы твоя назираеши, от страстей избавляя, богоносе всеблаженне.

И ныне, Богородичен: Премудрость и Силу, и Слово ипостасное Отчее, Богомати Чистая, родила еси от Твоих пречистых кровей, Свой Храм приимшую, и Сему по соединению соединившуюся нераздельно.

 

Молитва святителю Николаю

 

О всесвятый Николае, угодниче преизрядный Господень, теплый наш заступниче и везде в скорбех скорый помощниче! Помози мне грешному и унылому в настоящем житии, умоли Господа Бога даровати ми оставление всех моих грехов, елико согреших от юности моея, во всем житии моем, делом, словом, помышлением и всеми моими чувствы; и во исходе души моея помози ми окаянному, умоли Господа Бога, всея твари Содетеля, избавити мя воздушных мытарств и вечнаго мучения: да всегда прославляю Отца и Сына и Святаго Духа и твое милостивное предстательство, ныне и присно и во веки веков. Аминь.



[1] Текст приводится по изданию: Канонник. – М.: Издательство Московской Патриархии Русской Православной Церкви, 2012.

[2] Текст приводится по изданию: Канонник. – М.: Издательство Московской Патриархии Русской Православной Церкви, 2012.