Рейтинг@Mail.ru
Рейтинг@Mail.ru
Ваш браузер устарел. Рекомендуем обновить его до последней версии.

КАНОНЫ О УСОПШИХ

Келейно (на домашней молитве) каноны о усопших православных христианах можно читать в любое время, кроме двунадесятых и великих недвунадесятых праздников, а также дней Страстной и Светлой седмиц. Канон о едином усопшем читают также ежедневно в первые 40 дней по кончине христианина, особенно в 3-й, 9-й и 40-й дни. Так как всех усопших в истинной вере, надежде на воскресение и жизнь вечную Церковь поминает в субботу, каноны о усопших включают в домашнее молитвенное правило на вечер пятницы[1].

 

Канон о едином усопшем[2]

Глас 8-й

Песнь 1

Ирмос: Воду прошед, яко сушу, и египетскаго зла избежав, израильтянин вопияше: Избавителю и Богу нашему поим.

Припев: Покой, Господи, душу усопшаго раба Твоего.

Отверз уста моя, Спасе, слово ми подаждь молитися, Милосерде, о преставленнем рабе Твоем (имя), да покоиши душу его, Владыко.

Припев: Покой, Господи, душу усопшаго раба Твоего.

Мертв быв плотию, Спасе, и во гробе положен с мертвыми, душу раба Твоего покой в месте злачне, яко Милосерд.

Слава: Молебный глас мой услыши, Боже Триипостасне, и учини душу преставленнаго в недрех Авраамлих, Избавителю.

И ныне: Ты, Пречистая Богородице, Егоже без искуса мужеска заченши родила еси, моли Сына Твоего подати покой рабу Твоему преставленному (имя).

 

Песнь 3

Ирмос: Небеснаго круга Верхотворче, Господи, и Церкви Зиждителю, Ты мене утверди в любви Твоей, желаний краю, верных утверждение, Едине Человеколюбче.

Припев: Покой, Господи, душу усопшаго раба Твоего.

В месте злачне, в месте покойне, идеже лицы святых веселятся, душу раба Твоего преставленнаго покой, Христе, Едине Милостиве.

Припев: Покой, Господи, душу усопшаго раба Твоего.

Идеже лицы святых, тамо вчини, Владыко, послужившаго Тебе всем сердцем и воздвигшаго иго Твое на рамо свое, яко Един Владыка живота и смерти.

Слава: Небесный Отче Вседержителю, и Сыне Единородный, и Душе Святый Исходный, презри умершаго согрешения, и в Церкви первенец всели его, славити Тя со всеми угождшими Тебе.

И ныне: Яко Мати Святая Пресвятаго Бога, Владычице всяческих, Марие Богородице, со всеми святыми Сего моли душу покоити раба Твоего (имя) в небесных селениих.

Господи, помилуй. (Трижды)

 

Седален, глас 5-й

Покой, Спасе наш, с праведными раба Твоего, и сего всели во дворы Твоя, якоже есть писано, презирая, яко Благ, прегрешения его вольная и невольная, и вся яже в ведении и не в ведении, Человеколюбче.

Слава, и ныне:

От Девы возсиявый миру, Христе Боже, сыны света Тою показавый, помилуй нас.

 

Песнь 4

Ирмос: Услышах, Господи, смотрения Твоего таинство, разумех дела Твоя и прославих Твое Божество.

Припев: Покой, Господи, душу усопшаго раба Твоего.

Сошедый в преисподняя, Христе, совоздвигл еси умершия вся, и преставльшагося от нас покой, Спасе, яко Щедр.

Припев: Покой, Господи, душу усопшаго раба Твоего.

Никтоже без греха есть, токмо Ты Един, Владыко, сего ради преставленному и грехи остави, и в рай того всели.

Слава: Услыши, Троице Святая, гласы молебныя, приносимыя Тебе в церкви о усопшем, и Богоначальным Твоим светом озари душу, омраченную суетными привержении.

И ныне: Родила еси, Пречистая, без мужеска семене, Бога совершенна и человека совершенна, вземлющаго грехи наша, Дево. Того моли, Госпоже, преставльшемуся рабу Твоему подати покой.

 

Песнь 5

Ирмос: Просвети нас повелении Твоими, Господи, и мышцею Твоею высокою Твой мир подаждь нам, Человеколюбче.

Припев: Покой, Господи, душу усопшаго раба Твоего.

Имый живота и смерти власть, преставленнаго от нас покой, Христе Боже, Ты бо еси всех, Спасе, покой и живот.

Припев: Покой, Господи, душу усопшаго раба Твоего.

На Тя, Спасе, надежду возложь, умерый отыде от нас; Ты же, Господи, ущедри его, яко Бог Многомилостив.

Слава: Просвети нас, Трисвяте, воспеваемый Владыко, молящихся Тебе, мир небесный прияти, и в мирных селех душу вчини, отшедшую от временных в надежде безконечныя жизни.

И ныне: Шуияго стояния, Пречистая, избавити преставленнаго умоли Сына Твоего, Дево Госпоже, яко Спаса и Бога нашего Мати сущая.

 

Песнь 6

Ирмос: Молитву пролию ко Господу, и Тому возвещу печали моя, яко зол душа моя исполнися и живот мой аду приближися, и молюся, яко Иона: от тли, Боже, возведи мя.

Припев: Покой, Господи, душу усопшаго раба Твоего.

Ада испроверг, Владыко, воскресил еси умершия от века; и ныне преставленнаго от нас в недро Авраамле Ты, Боже, всели, прегрешения вся отпустив, яко Милосерд.

Припев: Покой, Господи, душу усопшаго раба Твоего.

Заповедь, юже ми дал еси, Боже, преступих и смертен бых, но Ты, Боже, сошедый во гроб и души яже от века воскресивый, не возстави мене, Владыко, на мучение, но на покой, преставленный вопиет Тебе нами, Многомилостиве.

Слава: Молим Тя, Безначальне Отче и Сыне и Душе Святый, злобою душезлобнаго мира озлобленную и к Тебе, Зиждителю, прешедшую душу во адово дно не отрини, Боже Спасе мой.

И ныне: С небесе Христос Бог наш, яко дождь на руно, Пречистая, сниде на Тя, напаяя весь мир и изсушая вся безбожныя потоки, наводняяй всю землю разумом Своим, Приснодево; Того моли дати покой преставленному рабу Твоему (имя).

Господи, помилуй. (Трижды)

Слава, и ныне:

 

Кондак, глас 8-й

Со святыми упокой, Христе, душу раба Твоего, идеже несть болезнь, ни печаль, ни воздыхание, но жизнь безконечная.

 

Икос

Сам един еси Безсмертный, сотворивый и создавый человека; земнии убо от земли создахомся и в землю туюжде пойдем, якоже повелел еси Создавый мя и рекий ми: яко земля еси и в землю отыдеши, аможе вси человецы пойдем, надгробное рыдание творяще песнь: аллилуиа, аллилуиа, аллилуиа.

 

Песнь 7

Ирмос: От Иудеи дошедше отроцы, в Вавилоне иногда, верою Троическою пламень пещный попраша, поюще: отцев Боже, благословен еси.

Припев: Покой, Господи, душу усопшаго раба Твоего.

Владыко Христе Боже, егда хощеши судити миру, пощади душу раба Твоего, егоже от нас приял еси, вопиющаго: отец наших Боже, благословен еси.

Припев: Покой, Господи, душу усопшаго раба Твоего.

В пищи райстей, идеже праведных души веселятся, послуживших Тебе, причти с ними, Христе, душу раба Твоего, воспевшаго: отец наших Боже, благословен еси.

Слава: Иудейския три отроки спасый во огни, в Триех Лицех воспетый, избави огня вечнаго усопшаго, воспевшаго Ти верно: отец наших Боже, благословен еси.

И ныне: Владыку Христа рождшая, всех Бога, власти темныя воздушнаго князя избави, Дево, душу преставльшагося в вере и воспевшаго: отец наших Боже, благословен еси.

 

Песнь 8

Ирмос: Седмерицею пещь халдейский мучитель богочестивым неистовно разжже, силою же лучшею спасены сия видев, Творцу и Избавителю вопияше: отроцы благословите, священницы воспойте, людие превозносите во вся веки.

Припев: Покой, Господи, душу усопшаго раба Твоего.

Скончав течение и к Тебе прибегох, Господи, преставленный вопиет ныне, прегрешения остави, Христе Боже, и не осуди мене, егда хощеши судити всем, верно бо Тебе взывах: вся дела Господня, Господа пойте и превозносите Его во веки.

Припев: Покой, Господи, душу усопшаго раба Твоего.

Понесшаго, Владыко, иго Твое на раме своем, и бремя Твое легкое, аще и не всегда, обаче в месте преподобных Твоих всели душу его, воспевшаго Тебе, Христе Спасе: отроцы благословите, священницы воспойте, людие превозносите Его во веки.

Слава: Безначальная Троице Святая, Боже Отче и Сыне и Душе Святый, в лице святых причти душу преставленнаго раба Твоего и огня вечнаго избави, да Тя хвалит, воспевая во веки: отроцы благословите, священницы воспойте, людие превозносите Его во веки.

И ныне: Тя, Дево, пророчестии лицы прорекоша, прозряще бо Тя прозорливыма очима: ов убо жезл нарече Тя, ин же дверь восточную, ов же гору, человеки несекомую. Мы же исповедуем Тя воистину Богородицу, Бога всяческих рождшую, Егоже моли упокоити преставленнаго во веки вся.

 

Песнь 9

Ирмос: Ужасеся о сем небо, и земли удивишася концы, яко Бог явися человеком плотски, и чрево Твое бысть пространнейшее небес. Тем Тя, Богородицу, Ангелов и человек чиноначалия величают.

Припев: Покой, Господи, душу усопшаго раба Твоего.

Иисусе Боже мой, Спасе, Адамле Ты взял еси преступление и смерти вкусил еси, да человеки от нея свободиши, Милосерде. Темже молим Тя, Милостиве: преставленнаго покой, яко Благ, во дворех святых Твоих, яко Един Всеблагий и Милосердый.

Припев: Покой, Господи, душу усопшаго раба Твоего.

Несть никтоже, Милосерде, иже не согреши в человецех, токмо Ты един, Иисусе Христе, вземляй грехи всего мира. Темже, очистив раба Твоего от прегрешений, вчини во святых Твоих дворех, Ты бо живот еси и покой, и свет, и веселие всех, Тебе благоугодивших.

Слава: Удивися все естество человеческое, како Безначальнаго Отца Сын сый единородный, плоть от Девы действом Святаго Духа приял еси, и пострадал еси яко человек, да умершия оживиши. Тем и преставленнаго ныне от нас, прилежно молим Тя, во стране живых, яко Благ, всели.

И ныне: Невесту Тя нарицаем, Пречистая, Отца невидимаго, и Матерь Сына, из Тебе Духом Святым воплощеннаго, и Молебницу Тя о усопшем рабе Твоем (имя) предлагаем: Тебе бо Помощницу имамы, земнии, и любовию поюще, Тя величаем.

 

Затем:

Молитвы после чтения канона

(см. "Молитвы при чтении заупокойных канонов")

 

 

Канон о усопших[3]

Егоже краегранесие[4]:

Умершим второе соплетаю пение.

Глас 2-й

Песнь 1

Ирмос: Непроходимое волнящееся море, Божиим Своим велением изсушившему, и пешешествовати сквозе е израильтеския люди наставльшему, Господеви поим: славно бо прославися.

Припев: Дивен Бог во святых Своих, Бог Израилев.

Смертию Твоею поправ смерть, Божественныя жизни источил еси присносущие; еже подаждь, Блаже, душам усопших, мученик Твоих мольбами, оставление прегрешений даруя.

Припев: Упокой, Господи, души усопших раб Твоих.

Иже богатую милость присно источая, благочестно присно приемлющим Тя, в дому Твоем, Христе, в дивней Твоей скинии, место ослабления подаждь, Владыко, рабом Твоим, яко благоутробен.

Слава: Крепчайший на смерть был еси, Христе: темже ту связав, нас избавил еси, и ныне избави от сея тления усопшия, яко Благ, и Твоего сияния причастие даруй.

И ныне, Богородичен: Утверждши колеблемый ум мой, Мати Божия, укрепи Божественными повеленьми Рождшагося из Твоего освященнаго чрева и упразднившаго, Владычице, адово мрачное царство.

 

Песнь 3

Ирмос: На камени мя веры утвердив, разширил еси уста моя на враги моя. Возвесели бо ся дух мой, внегда пети: несть свят, якоже Бог наш, и несть праведен паче Тебе, Господи.

Припев: Дивен Бог во святых Своих, Бог Израилев.

Твоея красоты сиянием озаритися в вере усопшим благоволи, с мученики Твоими, Иже богатый в милости; Ты бо еси Бог наш, и несть праведен паче Тебе, Господи.

Припев: Упокой, Господи, души усопших раб Твоих.

На месте прохлаждения, в недрех Авраамовых избраннаго Твоего, сподоби водворятися рабом Твоим, яко щедр, Тебе вопиющим: Ты бо еси Бог наш, и несть праведен паче Тебе, Господи.

Слава: В чертозех небесных водворятися, с мудрыми девами совшедшими, Владыко, приими рабы Твоя свещеносцы, ихже преставил еси Твоею волею от временных, едине Человеколюбче.

И ныне, Богородичен: Умерщвлена мя и к земли возвращена воздвигнула еси, рождши Жизнодавца, и возвела еси мя из ада преисподнейшаго, Богородицу Тя верою славящаго, и почитающаго, Пречистая, Тебе Всепетую.

 

Господи, помилуй. (Трижды)

 

Седален, глас 6-й

Воистину суета всяческая, житие же сень и соние, ибо всуе мятется всяк земнородный, якоже рече Писание: егда мир приобрящем, тогда во гроб вселимся, идеже вкупе царие и нищии. Темже, Христе Боже, преставльшияся упокой, яко Человеколюбец.

Слава, и ныне: Богородичен

Всесвятая Богородице, во время живота моего не остави мене, человеческому предстательству не ввери мя, но Сама заступи и помилуй мя.

 

Песнь 4

Ирмос: Пою Тя, слухом бо, Господи, услышах и ужасохся, до мене бо идеши, мене ища, заблуждшаго. Тем многое Твое снизхождение, еже на мя, прославляю, Многомилостиве.

Припев: Дивен Бог во святых Своих, Бог Израилев.

Упованием и любовию пожившия, и умом православным, яже паче ума славы Твоея сподоби рабы Твоя, Христе, многим Твоим человеколюбием и избранных мученик мольбами.

Припев: Упокой, Господи, души усопших раб Твоих.

Яко имый сладости приснотекущий поток, присно напаяеши избранныя, Господи: с нимиже и ныне преставленныя, Христе, к Тебе, неизреченным Твоим милосердием питаеши при водах оставления.

Слава: Ты живыми господствуеши, Владыко, и мертвыми владееши. Ты в земли персть сущую силою Твоею воскресиши. Темже к Тебе пришедшия во дворех Твоих, Спасе, всели.

И ныне, Богородичен: Исцелила еси Евино сокрушение и древнее окаянство: Зиждителя бо родила еси, могущаго исправити нас, прегрешеньми поверженных, Богородительнице едина Мати Дева.

 

Песнь 5

Ирмос: Света подателю и веков Творче, Господи, во свете Твоих повелений настави нас: разве бо Тебе иного бога не знаем.

Припев: Дивен Бог во святых Своих, Бог Израилев.

Умерщвленных нас, и положенных во тли, возвел еси от мрачных адовых сокровищ, и восхитил еси, Блаже, и сочетал святых Ангел воинством.

Припев: Упокой, Господи, души усопших раб Твоих.

За еже спасти нас яко пришел еси, Христе, приими ныне иже благочестно к Тебе преставленныя, яко един благ, на лонех Авраама, и с Лазарем тех всели.

Слава: Разрешил еси, Владыко, летную мою и долгую брань, Тебе прежде ходатаю и молитвеннику примирения бывшу; и ныне Твоя рабы, ущедрив, упокой.

И ныне, Богородичен: Под кровом Твоим, Мати Божия, иже надеющиися на Тя спасаются: Жизнодавца бо родила еси нам, Животворящаго вся волею.

 

Песнь 6

Ирмос: В бездне греховней валяяся, неизследную милосердия Твоего призываю бездну: от тли, Боже, мя возведи.

Припев: Дивен Бог во святых Своих, Бог Израилев.

Неизреченныя и Божественныя светлости, идеже мученичестии лицы, сподоби, яже от земли преставил еси, вседетельною Твоею волею, Человеколюбче.

Припев: Упокой, Господи, души усопших раб Твоих.

Иже создавый, Жизнодавче Христе, человека от земли, ихже от нас преставил еси, упокой, оставление подая им злых, яко Милосерд и Человеколюбец.

Слава: Озаритися добротою славы Твоея сподоби оставльшия житие, и к свету Твоему неизреченному, Владыко, прешедшия упокой.

И ныне, Богородичен: Избавляющи усердно явися призывающия Тя, Пречистая Владычице, яже Бога рождшая, животом и смертию обладающа.

 

Господи, помилуй. (Трижды)

Слава, и ныне:

 

Кондак, глас 8-й

Со святыми упокой, Христе, души раб Твоих, идеже несть болезнь, ни печаль, ни воздыхание, но жизнь безконечная.

 

Икос

Сам един еси Безсмертный, сотворивый и создавый человека; земнии убо от земли создахомся и в землю туюжде пойдем, якоже повелел еси, создавый мя и рекий ми: яко земля еси, и в землю отыдеши, аможе вси человецы пойдем, надгробное рыдание творяще песнь: Аллилуиа.

Песнь 7

Ирмос: Богопротивное веление беззаконнующаго мучителя высок пламень вознесло есть; Христос же простре богочестивым отроком росу духовную, Сый благословен и препрославлен.

Припев: Дивен Бог во святых Своих, Бог Израилев.

Иже везде сый, низшел еси, Господи, еже спасти иже древле прельщаемый человечь род. Темже Тя присно мученицы молят: сих, ихже преставил еси от земли, в земли кротких, Спасе, упокой.

Припев: Упокой, Господи, души усопших раб Твоих.

Мертвости умерщвление оттрясл еси, в мертвых свободь быв, Сам един Христе; и ныне умерщвления греховнаго, Владыко, избави рабы Твоя, являя их наследники Царствия Твоего.

Слава: Многим Твоим и неизреченным милосердием, и неизмерною бездною человеколюбия Твоего, Христе, прегрешений убо оставление преставленным даждь, и благодатию Твоею очищены сих яви.

И ныне, Богородичен: Светильник была еси Божественныя славы, сияние носящи, Дево, духом, и плотию нам явльшагося, и адову мглу светлостию Божества Своего потребльша, Богорадованная.

 

Песнь 8

Ирмос: Пещь иногда огненная в Вавилоне действа разделяше, Божиим велением халдеи опаляющая, верныя же орошающая, поющия: благословите, вся дела Господня, Господа.

Припев: Дивен Бог во святых Своих, Бог Израилев.

Показал еси нам врагов смерть, схождением Твоим яко Безсмертен; Божественною же силою Твоею входы явил еси живота, Безсмертне, егоже мученицы Твои ныне достойно получиша.

Припев: Упокой, Господи, души усопших раб Твоих.

Доброты умныя Твоея насладитися преставленным сподоби, студ греха злообразнаго очищая, яко Человеколюбец: един бо Ты, Владыко, явился еси греха отчужден.

Слава: Исправил еси нас, Христе, падшия в персть смертную, смертию Твоею живот даруя, и пищу безконечную, и радость присносущную, еяже ныне преставленныя сподоби, яко милостив.

И ныне, Богородичен: Велия и страшна есть тайна, Богомати, Твоего рождества: Бога бо родила еси, Егоже смерть не претерпе, и гроб не растли. Темже Тя, Пречистая, вси языцы славим.

 

Песнь 9

Ирмос: Яже прежде солнца светильника Бога возсиявшаго, плотски к нам пришедшаго, из боку Девичу неизреченно воплотившая, Благословенная Всечистая, Тя, Богородице, величаем.

Припев: Дивен Бог во святых Своих, Бог Израилев.

Имеяй власть живыми и мертвыми, живота Начальниче, от земли к Тебе прешедшим, наследие небесное подаждь, Владыко, и светлость святых и преславных страстотерпец Твоих.

Припев: Упокой, Господи, души усопших раб Твоих.

Слово сый, Еже древле быти ми подая, живоначальнейшее, и еже добре быти паки даруя, в недрех желанных Авраама праотца, преставльшияся рабы Твоя, яко милостив, всели.

Слава: Весь еси, Спасе мой, сладость световиднейшая, весь еси желание ненасыщаемое; потоки Твоея пищи и водою оставления усопшия напой, непрестанно Тебе славящия.

И ныне, Богородичен: Тя, Богородице, достойно вернии ныне ублажаем, Богодохновенным словесем Твоим последующе: Ты бо едина земным Бога родила еси, смерти разоршаго силу, Мати Дево.

 

Затем:

Молитвы после чтения канона

(см. "Молитвы при чтении заупокойных канонов")



[1] См. подробнее: Каноны на каждый день для домашнего чтения. – М.: Изд. Тихомирова М.Ю., 2016. www.pravmolitva.ru

[2] Текст приводится по изданию: Сборник канонов ко Господу, Пресвятой Богородице, в честь двунадесятых праздников и святых. – М.: ООО «Духовное преображение», 2015, с. 129–139.

[3] Текст приводится по изданию: Канонник. – М.: Издательство Московской Патриархии Русской Православной Церкви, 2012.

[4] Буквально – краестишие или краестрочие (акростих), т.е. стихотворение, в котором начальные буквы стихов (строк) образуют слово или фразу, часто – имя автора. Акростих в канонах – это сочетание начальных букв ирмосов и тропарей.