Рейтинг@Mail.ru
Рейтинг@Mail.ru
Ваш браузер устарел. Рекомендуем обновить его до последней версии.
Каноны и молитвы великомученику и целителю Пантелеимону

КАНОНЫ И МОЛИТВЫ ВЕЛИКОМУЧЕНИКУ

И ЦЕЛИТЕЛЮ ПАНТЕЛЕИМОНУ

 

КАНОН ВЕЛИКОМУЧЕНИКУ ПАНТЕЛЕИМОНУ[1]

(память 27 июля / 9 августа)

Творение Феофаново[2]

 

Тропарь, глас 3-й

Страстотерпче святый и целебниче Пантелеимоне, моли милостиваго Бога, да прегрешений оставление подаст душам нашим.

 

Канон

Глас 2-й

Песнь 1

Ирмос: Во глубине постла иногда фараонитское всевоинство преоруженная сила, воплощшееся же Слово всезлобный грех потребило есть, препрославленный Господь, славно бо прославися.

Припев: Святый великомучениче и целителю Пантелеимоне, моли Бога о нас.

Приступль усердно ко Христу, прежде скончания еже о Христе, мертвеца первее воздвигл еси. Ныне же мя, пребогате, умерщвлена греховным угрызением, твоими молитвами, о Пантелеимоне, оживотвори.

Припев: Святый великомучениче и целителю Пантелеимоне, моли Бога о нас.

Возсия, якоже звезда, нося во юности старостный и богомудрый разум, добротою же тела благолепие души стяжав, Препрославленному Слову явился еси прекрасен.

Припев: Святый великомучениче и целителю Пантелеимоне, моли Бога о нас.

Умертвився миру, и во Христа, блаженне, одеявся банею Крещения, был еси богоносен орган и приятелище действа Духу, всем угождая, всех уврачуя недуги.

Слава: Премудрость сестру себе притворив и причастник жизни ведом, от нея почтился еси и венцем дарований украсился еси, Божественныя зари, блаженне, облистая светлостию.

И ныне, Богородичен: Благословенми, Пресвятая Чистая, естество, удалено преслушанием бывшее от Зиждителя, Христа рождши, венчала еси и тления свободила еси. Темже, радующеся, вси вернии Тя ублажаем.

 

Песнь 3

Ирмос: Процвела есть пустыня, яко крин, Господи, языческая неплодящая Церковь, пришествием Твоим, в нейже утвердися мое сердце.

Припев: Святый великомучениче и целителю Пантелеимоне, моли Бога о нас.

Словеса Духа услышав, был еси яко земля добрая и благоплодная, приемый семя многоценно и родивый, треблаженне, спасение душам.

Припев: Святый великомучениче и целителю Пантелеимоне, моли Бога о нас.

Умертвил еси мудрование змиина угрызения и душу оживил еси, богодухновенно возродився и Царю всех предстоя.

Припев: Святый великомучениче и целителю Пантелеимоне, моли Бога о нас.

Посрамил еси безбожное мучителей повеление и ко Христу притекл еси, вместо всех Сего стяжав, и был еси, богомудре, великий купец.

Слава: Матере твоея благочестие возлюбль, славне, отчее же возненавидел еси безбожие многомятежное, яко имея разум, лучшее избрал еси.

И ныне, Богородичен: Носяй Божественным мановением всю тварь Господь, на руку носится Твоею, Дево; Егоже ныне моли избавити от бед поющия Тя.

 

Господи, помилуй. (Трижды)

 

Седален, глас 4-й

Добляго страдальца благочестия Христова восхвалим светло Пантелеимона, вернии, псалмы и пении, и песньми духовными, имже мучительство невидимаго врага силою Божественною попрася и недугов исцеление богатно от Господа даровася творящим верно Божественный и честный праздник его.

Слава: Ермолая мудраго, мучениче, словес послушал еси и оставил еси абие художество земное, яко мерзко, яко некрепко, яко губительно, имея Христовы страсти, учения жизни в сердце твоем, неисцельно страждущим здравие, Пантелеимоне, даруя. Темже молися о творящих любовию память твою.

И ныне: Треволнении страстными безсовестный аз обуреваем, Чистая, призываю Тя тепле: да не презриши мене, окаяннаго, погибнути, бездну милосердия рождши: разве бо Тебе надежды не имам. Да не врагом убо обрадование и смех, надеявся на Тя, явлюся; ибо можеши, елико хощеши, яко Мати сущи всех Бога.

 

Песнь 4

Ирмос: Пришел еси от Девы, не ходатай, ни Ангел, но Сам, Господи, воплощься, и спасл еси всего мя человека. Тем зову Ти: слава силе Твоей, Господи.

Припев: Святый великомучениче и целителю Пантелеимоне, моли Бога о нас.

Последуя Владыце любовию, расточил еси богатство нищим, себе обнажая к страданию, еже и прошел еси, вечныя надежды провидев.

Припев: Святый великомучениче и целителю Пантелеимоне, моли Бога о нас.

Хваления Богу жертву принесл еси, яве возгнушався идольских треб, все же шатание нечестивых, страстотерпче, попрал еси.

Припев: Святый великомучениче и целителю Пантелеимоне, моли Бога о нас.

Снедаемым завистию и гневом боримым, непоборимую силу сим представил еси, мучениче, и победил еси злочестивое томление, вооружився.

Слава: Иже старца Симеона руками Держимый, старца тя глаголы, Пантелеимоне, улови к Божественному разумению и ко многих спасению и избавлению.

И ныне, Богородичен: Юныя и девы во след Тебе потекоша, Деву и Отроковицу Тя и Матерь зряще, едина бо обоя во едино собрала еси несказанно, Богоневесто.

 

Песнь 5

Ирмос: Просвещение во тьме лежащих, спасение отчаянных, Христе Спасе мой, к Тебе утренюю, Царю мира, просвети мя сиянием Твоим, иного бо разве Тебе бога не знаю.

Припев: Святый великомучениче и целителю Пантелеимоне, моли Бога о нас.

Радостно подвиги подъял еси мучения, огражден силою Божественною, и терпением твердо мучения подъемля, радуяся вопиял еси: иного бо разве Тебе бога не знаем.

Припев: Святый великомучениче и целителю Пантелеимоне, моли Бога о нас.

Юношеско ты противление имея и твердостию души возставление стяжав, всяку язву доблественне претерпел еси, и мужеским, блаженне, умом, благодатию Божественнаго Креста укрепляем.

Слава: Несогласное отрину вещание заблуждших небесным учением, страдалец и многим спасению преславну бысть виновник, Твоим действом, Христе, укрепляем.

И ныне, Богородичен: Речения премудрых и гадания вся, Препрославленная, и пророк проречения Тя проображаху проявленно напоследок быти Божию Родительницу, иныя бо разве Тебе чистыя не знаем.

 

Песнь 6

Ирмос: В бездне греховней валяяся, неизследную милосердия Твоего призываю бездну: от тли, Боже, мя возведи.

Припев: Святый великомучениче и целителю Пантелеимоне, моли Бога о нас.

Идолы лестныя оплевал еси и возносимую прелесть упразднил еси, чудодействуя дивная и творя исцеления, богомудре.

Припев: Святый великомучениче и целителю Пантелеимоне, моли Бога о нас.

Венечник показался еси, всеизрядне, сквозе бо огнь ты прошел еси и воду, и на колеси протязаем, преславно погубил еси безумныя.

Слава: Мучителей суровство низложив, неудобь носимая биения телесная душевною крепостию, пострадал еси, богомудре, благодатию.

И ныне, Богородичен: Содержай концы земли яко Бог, Твоими руками, Чистая, держится, описанием тела, Иже Божественным зраком неописанный.

 

Господи, помилуй. (Трижды)

Слава, и ныне:

 

Кондак, глас 5-й

Подражатель сый Милостиваго и исцелений благодать от Него прием, страстотерпче и мучениче Христа Бога, молитвами твоими душевныя наша недуги исцели, отгоняя присно борца соблазны от вопиющих верно: спаси ны, Господи.

 

Икос

Безсребреника память, добляго страдальца, вернаго целебника, благочестно воспоем, христолюбцы, да приимем милость, паче же оскверншии, якоже и аз, своя храмы: душам бо и телом, возлюбленнии, исцеления подает. Потщимся убо, верная братия, в сердцах наших имети его крепость, избавляюща от лести вопиющия: спаси ны, Господи.

 

Песнь 7

Ирмос: Телу златому премудрыя дети не послужиша, и в пламень сами поидоша, и боги их обругаша, среди пламене возопиша, и ороси я Ангел: услышася уже уст ваших молитва.

Припев: Святый великомучениче и целителю Пантелеимоне, моли Бога о нас.

Законно стражда и победив врага, пристанище благоутишно сущим в мори, славне, обуреваемым был еси, свет же сущим во тьме жития, и пети научил еси: благословен Бог отец наших.

Припев: Святый великомучениче и целителю Пантелеимоне, моли Бога о нас.

Блажен еси и добро тебе есть ныне, преблаженне, восприимшему пребогатную и блаженную надежду твою, уготованную верою Господеви зовущим: благословен Бог отец наших.

Слава: Святых души и праведных лицы, и безплотных чини Ангельстии прияша сликовника тя, блаженне; мечем бо усечен быв во главу, поеши, радуяся: благословен Бог отец наших.

И ныне, Богородичен: Оружие, еже прежде древа животнаго нас отлучившее, ныне обращаемо приемлет знаменавшияся Кровию, из ребр Сына Твоего изшедшею, Пренепорочная. Благословена еси, Бога плотию рождшая.

 

Песнь 8

Ирмос: В пещь огненную ко отроком еврейским снизшедшаго и пламень в росу преложшаго Бога, пойте, дела, яко Господа, и превозносите во вся веки.

Припев: Святый великомучениче и целителю Пантелеимоне, моли Бога о нас.

Благоприятное твоея хитрости душевное ослепление отчее исцеляет, подающее свет верою, преблаженне, притекающим и ко Спасу Христу наставляющи.

Припев: Святый великомучениче и целителю Пантелеимоне, моли Бога о нас.

За Христа заклан быв, к вечней жизни преминул еси и богозванен явился еси именованием Божиим, богомудре. Тем почитаем тя и превозносим Христа во веки.

Слава: Витийское отложив лютое мудрых глумление, Христовым призыванием, болезненных страстей корения посекаеши, исцеляя превозносящия Христа во веки.

И ныне, Богородичен: Безсмертия зари вемы источника Тя, Богородице, яко рождшую Слово Безсмертнаго Отца, всех смерти избавляющаго, превозносящих Его во веки.

 

Песнь 9

Ирмос: Безначальна Родителя Сын, Бог и Господь, воплощься от Девы, нам явися, омраченная просветити, собрати расточенная. Тем Всепетую Богородицу величаем.

Припев: Святый великомучениче и целителю Пантелеимоне, моли Бога о нас.

Преставился еси, радуяся, к желанию конечному, идеже вселився, преблаженне, блаженный конец прияти воистину сподобился еси, сый со Владыкою твоим во веки безконечныя.

Припев: Святый великомучениче и целителю Пантелеимоне, моли Бога о нас.

Желание получил еси и любве твоея исполнение, каплющей еще теплей крови, за Христа излиявшейся, от Негоже, радуяся, приял еси венцы подвигов твоих.

Припев: Святый великомучениче и целителю Пантелеимоне, моли Бога о нас.

Львов уста и зверей зияния, якоже Даниил древле, ты обуздал еси, весть бо стыдетися, мучениче, добродетели и безсловесное естество. Темже тя, преславне, сошедшеся ублажаем.

Слава: Богатную благость тебе Христос дарует, сокровище исцелений нам даруя и всемилостива изволением тя подав всякому скорбящему, и пристанище тихое, и предстателя, и защитителя.

И ныне, Богородичен: Яко руно, Всенепорочная, Дождь Небесный во утробе заченши, нам родила еси, тишину дающаго, яко Бога Того поющим и Тя, Всепетую Богородицу, проповедающим.

 

 

КАНОН

СВЯТОМУ ВЕЛИКОМУЧЕНИКУ ПАНТЕЛЕИМОНУ[3]

(читаемый от лица болящего)

 

Тропарь, глас 3-й

Страстотерпче святый и целебниче Пантелеимоне, моли милостиваго Бога, да прегрешений оставление подаст душам нашим.

 

Канон

Глас 2-й

Песнь 1

Ирмос: Во глубине постла иногда фараонитское всевоинство преоруженная сила; воплощшееся же Слово всезлобный грех потребило есть; препрославленный Господь, славно бо прославися.

Припев: Святый великомучениче и целебниче Пантелеимоне, моли Бога о нас.

Подвигом, мучениче, добрым подвизався, и врач изряден быв, исцели болезни моя, и обдержащий огнь орошением твоим отжени, здравие ми совершенное подавая.

Припев: Святый великомучениче и целебниче Пантелеимоне, моли Бога о нас.

Болезней избави мя лютых, о Пантелеимоне, и належащую ми немощь вскоре от мене отжени, и конечное исцеление ми даруй, яко да заступника великаго верою ублажаю тя.

Слава: Целителю душам и телесем, исцели страсти моя лютыя, телесныя же и душевныя, притекшаго, о Пантелеимоне, под кров твой спасительный, мучениче Спасов, яко да хвалами ублажаю тя.

И ныне, Богородичен: Милосерда сущи, Чистая, яко благоутробное Слово Божие родившая, исцели недуг раба Своего, и скорую даруй цельбу и здравие, верою просящему Твоея милости.

 

Песнь 3

Ирмос: Процвела есть пустыня, яко крин, Господи, языческая неплодящая Церковь, пришествием Твоим, в нейже утвердися мое сердце.

Припев: Святый великомучениче и целебниче Пантелеимоне, моли Бога о нас.

Разрушив многокозненное мучительство, страстотерпче, живот дающими о Христе подвигами, умерщвляющия страсти отжени от недугующаго зело, молитвою твоею.

Припев: Святый великомучениче и целебниче Пантелеимоне, моли Бога о нас.

Согнившей злыми помыслами и дел язвами душе моей, славне, посещением твоим даждь исцеление, и не остави мене погибнути окаяннаго, молю тя.

Слава: Безбожия пещь угасил еси течением кровей твоих, страстотерпче: темже ти молюся, огня болезни мя свободи.

И ныне, Богородичен: Низрину мя множество прегрешений, Чистая, в пучину недугов, но Сама, Чистая, окорми мя к тишине здравия, Богородице.

 

Седален, глас 4-й

Добляго страдальца благочестия Христова восхвалим светло Пантелеимона, вернии, псалмы и пении, и песньми духовными, имже мучительство невидимаго врага силою Божественною попрася и недугов исцеление богатно от Господа даровася творящим верно Божественный и честный праздник его.

Слава: Ермолая мудраго, мучениче, словеса послушал еси и оставил еси абие художество земное, яко мерзко, яко некрепко, яко губительно, имея Христовы страсти, учения жизни в сердце твоем, неисцельно страждущим здравие, Пантелеимоне, даруя. Темже молися о творящих любовию память твою.

И ныне: Треволнении страстными безсовестный аз обуреваем, Чистая, призываю Тя тепле: да не презриши мене, окаяннаго, погибнути, бездну милосердия рождши, разве бо Тебе надежды не имам. Да не врагом убо обрадование и смех, надеявся на Тя, явлюся: ибо можеши, елико хощеши, яко Мати сущи всех Бога.

 

Песнь 4

Ирмос: Пришел еси от Девы, не ходатай, ни Ангел, но Сам, Господи, воплощься, и спасл еси всего мя человека. Тем зову Ти: слава силе Твоей, Господи.

Припев: Святый великомучениче и целебниче Пантелеимоне, моли Бога о нас.

Уврачуй неисцельно болящаго мя, безмездный врачу, от Бога дарование исцелений приемый, и не посрами мене от моего упования, с верою молящагося ти.

Припев: Святый великомучениче и целебниче Пантелеимоне, моли Бога о нас.

Умерщвляющия мя болезни, Пантелеимоне, лечбами твоими исцели, и ко здравию привлецы, яко да с радостию и веселием славлю тя, достоблаженне.

Слава: Глаголы моя болезненныя услыши, святе: вопию ти раб твой, якоже древле слепаго, исцели, молюся, отчаяннаго и ко аду приближшагося.

И ныне, Богородичен: Яко всех Владычице с верою Ти молимся, принеси моление Сыну Твоему и Богу нашему, да от обдержащия беды избавит раба Твоего, Чистая.

 

Песнь 5

Ирмос: Ходатай Богу и человеком был еси, Христе Боже: Тобою бо, Владыко, к светоначальнику Отцу Твоему, от нощи неведения приведение имамы.

Припев: Святый великомучениче и целебниче Пантелеимоне, моли Бога о нас.

Ты мертва древле воскресил еси, Пантелеимоне: такожде помози и сему рабу твоему, молимся ти, и совершенное исцеление тому вскоре даруй.

Припев: Святый великомучениче и целебниче Пантелеимоне, моли Бога о нас.

Целиши многих недуги, с верою к тебе притекающих: такожде и мене исцели, и не посрами моего упования, не постыди мя, мучениче Пантелеимоне.

Слава: Источник сый многих даров Духа, Пантелеимоне, утоли горесть болезни моея, и исцели, блаженне, люте разслабленнаго.

И ныне, Богородичен: Яко огнь снедает мя, Пречистая Владычице, недуг, от негоже избави мя, и спаси мольбами Твоими, яко Жизнь всех неизреченно рождшая.

 

Песнь 6

Ирмос: В бездне греховней валяяся, неизследную милосердия Твоего призываю бездну: от тли, Боже, мя возведи.

Припев: Святый великомучениче и целебниче Пантелеимоне, моли Бога о нас.

Блаженных надежд получив дарование, и мою надежду исполни, внезапу спаси мя от обдержащия мя смертныя болезни, Пантелеимоне.

Припев: Святый великомучениче и целебниче Пантелеимоне, моли Бога о нас.

Море обуревает мя недугов, пристанище тя тихое яви ми, святе, твою спасительную помощь низпослав, вопиет ти раб твой.

Слава: Уныния, блаженне, разжжения и пренемогания тяготу облегчи к твоему заступлению притекающаго, Пантелеимоне.

И ныне, Богородичен: Теплую Твою, Пречистая, помощь одожди рабу Твоему, люте горящему грехи, и телесными недуги одержимому, Препетая.

 

Господи, помилуй. (Трижды)

Слава, и ныне:

 

Кондак, глас 5-й

Подражатель сый Милостиваго и исцелений благодать от Него прием, страстотерпче и мучениче Христа Бога, молитвами твоими душевныя наша недуги исцели, отгоняя присно борца соблазны от вопиющих верно: спаси ны, Господи.

 

Икос

Безсребреника память, добляго страдальца, вернаго целебника, благочестно воспоем, христолюбцы, да приимем милость, паче же оскверншии, якоже и аз, своя храмы: душам бо и телом, возлюбленнии, исцеления подает. Потщимся убо, верная братия, в сердцах наших имети его крепость, избавляюща от лести вопиющия: спаси ны, Господи.

 

Песнь 7

Ирмос: Богопротивное веление беззаконнующаго мучителя высок пламень вознесло есть; Христос же простре богочестивым отроком росу духовную, Сый благословен и препрославлен.

Припев: Святый великомучениче и целебниче Пантелеимоне, моли Бога о нас.

Пребыл еси неподвижим во время мучения, Пантелеимоне: темже люте одержимаго лютыми болезньми и бедствующа исцели раба твоего, да верою славит заступление твое.

Припев: Святый великомучениче и целебниче Пантелеимоне, моли Бога о нас.

Милостию видев тя богатящася Бог Многомилостивый, мудре Пантелеимоне, благодать ти дарова подавати исцеления. Темже ти молюся прилежно: ума моего недуги исцели.

Слава: Узы врага злодея духовным оружием, мудре, расторгл еси. Темже молимся ти: недугом связана и бедствующаго исцели болящаго, да присно почитаем заступление твое.

И ныне, Богородичен: Исцели сокрушение человеческое, Пречистая, рождшая Бога неизреченно, Того убо моли яко Преблагаго, исцеление ми подати, Дево, рабу Твоему, люте страждущему.

 

Песнь 8

Ирмос: Пещь иногда огненная в Вавилоне действа разделяше Божиим велением, халдеи опаляющая, верныя же орошающая, поющия: благословите, вся дела Господня, Господа.

Припев: Святый великомучениче и целебниче Пантелеимоне, моли Бога о нас.

Дан был еси верным ограждение, стена и врачевство, святе, изрядное, темже моя язвы душевныя, мудре, исцели и облегчи болезни телесныя, Пантелеимоне, люте обдержащия мя.

Слава: К твоему милостивому покрову притекающим отъемлеши всяку болезнь; и ныне посети прибегающа с верою к тебе, святе, раба твоего, и избави многообразных недуг.

И ныне, Богородичен: Направи, Чистая, к пристанищу здравия недугом бедствующа, и во глубину погружаема, и не даждь погибнути ми, Божественныя помощи Твоея любовию ищуща, Еюже вернии спасаются.

 

Песнь 9

Ирмос: Безначальна Родителя Сын, Бог и Господь, воплощься от Девы, нам явися, омраченная просветити, собрати расточенная. Тем Всепетую Богородицу величаем.

Припев: Святый великомучениче и целебниче Пантелеимоне, моли Бога о нас.

Яко свет, яко солнце возсиял еси, блаженне, лучами исцелений всех просвещая, темже с верою молимся ти: от недуг и тяжкия тьмы вскоре избави люте обуреваемаго.

Припев: Святый великомучениче и целебниче Пантелеимоне, моли Бога о нас.

Тебе ныне молим, святый Пантелеимоне, тебе припадаем и тепле молимся: смертною болезнию одержимаго от навета лютых недуг, посетив, исцели, да любовию ублажает тя.

Слава: День возсияй здравия рабу твоему, слежащему в нощи лютаго недуга, да благодарственным сердцем приидет в честный ти храм, твою исповедуя благодать, Пантелеимоне.

И ныне, Богородичен: Благая Владычице! Манием Твоим милосердым приосени огорченнаго мя грехи многими, и обдержащей мя болезни и немощей избави, да благодарственно ублажаю Тя, Владычице, Юже по достоянию блажат вси роди.



[1] Текст канона приводится по изданию: Сборник канонов ко Господу, Пресвятой Богородице, в честь двунадесятых праздников и святых. – М.: ООО «Духовное преображение», 2015, с. 497–511.

[2] Преподобного Феофана Начертанного.

[3] Текст канона приводится по изданию: Молитвослов с канонами на каждый день седмицы и всякое прошение души. – М.: Издательство «Летопись», 2014, с. 374–384.

 

Молитва первая

великомученику и целителю Пантелеимону

(читаемая от лица болящего)

О великий угодниче Христов, страстотерпче и врачу многомилостивый Пантелеимоне! Умилосердися надо мною, грешным рабом, услыши стенание и вопль мой, умилостиви Небеснаго Верховнаго Врача душ и телес наших, Христа Бога нашего, да дарует ми исцеление от недуга, мя гнетущаго. Приими недостойное моление грешнейшаго паче всех человек. Посети мя благодатным посещением. Не возгнушайся греховных язв моих, помажи тыя елеем милости твоея и исцели мя; да здрав сый душею и телом, остаток дней моих, благодатию Божиею, возмогу провести в покаянии и угождении Богу и сподоблюся восприяти благий конец жития моего. Ей, угодниче Божий! Умоли Христа Бога, да предстательством твоим дарует здравие телу моему и спасение души моей. Аминь.

 

Молитва вторая

великомученику и целителю Пантелеимону

О великий Христов угодниче и преславный целебниче, великомучениче Пантелеимоне, душею на Небеси Престолу Божию предстояй и Триипостасныя Его славы наслаждаяйся, телом же и ликом святым на земли в Божественных храмех пребываяй и данною ти свыше благодатию различная источаяй чудеса! Призри милостивным твоим оком на предстоящия люди, пред честней твоей иконой умильно молящияся и просящия от тебе целебныя помощи и заступления: простри ко Господу Богу нашему теплыя твоя молитвы и испроси душам нашим оставление согрешений. Се бо мы, за беззакония наша не смеюще возвести очеса наша к высоте небесней, ниже вознести глас молебный к Его в Божестве неприступней славе, сердцем сокрушенным и духом смиренным тебе, ходатая милостива ко Владыце и молитвенника за ны, грешныя, призываем, яко ты приял еси благодать от Него недуги исцеляти и страсти отгоняти. Тебе убо просим: не презри нас, недостойных, молящихся тебе и твоея помощи требующих; буди нам в печалех утешитель, в недузех лютых страждущим врач, напаствуемым скорый покровитель, очесем недугующим прозрения податель, ссущим и младенцем в болезнех скорый предстатель и исцелитель; исходатайствуй всем вся, яже ко спасению полезная, яко да твоими ко Господу Богу молитвами, получивше благодать и милость, прославим всех благих Источника и Дароподателя Бога, Единаго в Троице Святей славимаго Отца и Сына и Святаго Духа, ныне и присно и во веки веков. Аминь.

 

Молитва третья

великомученику и целителю Пантелеимону

О святый великомучениче и целителю Пантелеимоне, Бога милостиваго подражателю! Призри благосердием и услыши нас, грешных, пред святою твоею иконою усердне молящихся. Испроси нам у Господа Бога, Емуже со Ангелы предстоиши на небеси, оставление грехов и прегрешений наших. Исцели болезни душевныя и телесныя рабов Божиих, ныне поминаемых, зде предстоящих и всех христиан православных, к твоему заступлению притекающих. Се бо мы, по грехом нашим люте одержимы есмы многими недуги и не имамы помощи и утешения, к тебе же прибегаем, яко дадеся ти благодать молитися за ны и целити всяк недуг и всяку болезнь. Даруй убо всем нам святыми молитвами твоими здравие и благомощие души и тела, преспеяние веры и благочестия и вся к житию временному и ко спасению потребная. Яко да сподобившеся тобою великих и богатых милостей, прославим тя и Подателя всех благ, дивнаго во святых Бога нашего, Отца и Сына и Святаго Духа. Аминь.

 

Молитва четвертая

великомученику и целителю Пантелеимону

О преславный мучениче и доблий воине Небеснаго Царя, Пантелеимоне всеблаженне, Милостиваго Бога преизрядный подражателю, иже Христа на земли дерзновенно исповедав и многообразныя за Него муки претерпев, неувядаемый приял еси венец на небеси, идеже вечнаго наслаждаешися блаженства и со дерзновением Престолу Трисолнечнаго Божества предстоиши! К твоему Христоподражательному состраданию по Бозе прибегаем вси мы грешнии и всеусердно молим тя, теплаго заступника и предстателя нашего: не престай призирати на нас, сущих в нуждех и скорбных обстояниих, и твоею молитвенною помощию и цельбоподательною силою избавляй нас присно от лютых зол, всегубительства и всякия иныя беды и болезни. Ты бо приял еси, святе, неоскудную благодать исцелений от Спаса нашего Иисуса Христа за твердую твою к Нему веру, при чистом и непорочном житии, запечатленную мученичеством и многопобедною твоею кончиною, в нейже по данней ти благодати и наименован от Христа Пантелеимоном, милости тезоименитым, милующим всех притекающих к тебе в скорбех и болезнех. Сего ради, ведуще тя милостиваго ко всем помощника и исцелителя, с верою взываем к тебе: услыши нас и богоприятным ходатайством твоим подавай нам вся благопотребная в житии сем и нужная к вечному спасению. Мученическим же дерзновением твоим умоли Милостиваго Бога, да помилует нас, грешных и недостойных, по велицей милости Своей, да избавит от труса, потопа, огня, меча и всякаго праведнаго гнева и прещения, благовременне подвизая нас к очистительному и умилостивительному во гресех наших покаянию, ради множества щедрот Своих, да подаст всем нам безбедное, тихое и богоугодное житие, и всех нас от врагов видимых и невидимых да сохранит благодатию Своею и непобедимым ополчением Ангел Своих, имиже ограждаеми и наставляеми да поживем в веце сем в покаянии, чистоте и в творении богоугодных дел; да сподобимся твоим теплым предстательством христианскую кончину улучити безболезненну, мирну, непостыдну, избавитися от козней воздушных князей тьмы и от вечныя муки и быти наследниками безконечнаго, всеблаженнаго Царствия. Ей, угодниче Божий! Не престай молитися за ны, грешныя, да твоим ходатайством временных и вечных бед избавлени, величаем тебе, заступника нашего и молитвенника, и вечно прославляем общаго Владыку и Господа нашего Иисуса Христа, Емуже подобает всякая слава, честь и поклонение со Безначальным Его Отцем и Пресвятым Духом, ныне и присно и во веки веков. Аминь.

 

Молитва пятая

великомученику и целителю Пантелеимону

(преосвященного Иеремии Отшельника)

Святый великомучениче и целебниче Пантелеимоне! Моли Бога о нас и не допусти долее оставатися в нас тем болезнем, коими болим душею и телом! Исцели те язвы и струпы, кои причинены нам страстьми нашими. Болим мы леностию и разслаблением – исцели ны. Болим влечением и пристрастием к земным предметам – исцели ны. Болим, о святый Пантелеимоне! Болим забывчивостию о деле спасения, о наших гресех и немощех, о наших обязанностех – исцели ны. Болим злопомнением, гневливостию, ненавистничеством – исцели, о целебниче Свято-Афонский и всемирный. Болим завистию, гордостию, надменностию, превозношением, при всей скудости и непотребстве, – исцели ны. Болим многими и разными припадками плотоугодия: чревоизлишеством, невоздержностию, многоядением, сластолюбием – исцели ны. Болим сонливостию, многословием, празднословием, осудливостию – исцели ны, о святый Пантелеимоне! Болят наша очи греховными воззрении, болят наша уши слушанием пустословия, злоречия, наветов – исцели ны. Болят руки нерасположением к молитвенному воздеянию и к подаянию милостыни – исцели ны. Болят наша нози нежеланием поспешно идти в храм Господень и стремлением к хождениим по стогнам и к посещениим домов мирских – исцели ны. Болит, зело болит язык наш, уста наша: пустословием, празднословием, злоречием, отвращаяся от молитвословий и славословий, или произнося их небрежно, разсеянно, без внимания, без понятия – исцели ны, о милостиве! От главы до ног болим мы: болит в нас разум непонятливостию, неразумностию и безумием; болит в нас воля, отвращаяся от святых занятий и стремяся к делом вредным и богопротивным; болит в нас память, забывая наша прегрешения и содержа в себе неутратно согрешения и оскорбления ближних наших; болит в нас воображение, не умея и не желая живо представити нам нашу смерть, вечную муку грешных, блага Царствия Небеснаго, Божий гнев, крестныя страдания Христовы, Его распятие – исцели ны, о святый Пантелеимоне! Все в нас болит. Немощствует и душа наша вся со всеми ее силами и способностями. Немощствует и тело наше все со всеми его членами. Исцели ны, о святый Пантелеимоне, целебниче безмездный и любвеобильный врачевателю, слуго Пресвятыя Богородицы, и не остави наше окаянство в толицех недузех и в толицей немощи: да исцеляся твоею благодатию, прославим Пресвятую Троицу, Отца и Сына и Святаго Духа, и Пресвятую Богородицу, тебе на служение болящим посылающую, и возблагодарим твою, о святый Пантелеимоне, цельбоносную святыню во веки. Аминь.

 

Молитва шестая

великомученику и целителю Пантелеимону

(благодарственная, по исцелении от болезни)

О святый великомучениче, целителю и чудотворче Пантелеимоне, всеизрядный угодниче Божий и молитвенниче присный христиан православных! Достойно наречен еси Пантелеимоном, еже есть всемилостивый, яко, прияв от Бога благодать молитися за ны и болезни целити, ты богатно подаеши всем, к тебе притекающим, различная исцеления и вся к жизни временней и ко спасению потребная. Сего ради и мы, недостойнии, сподобившеся твоея милости, паки пред святою твоею иконою прибегаем к тебе, и прославляюще тя, яко искренняго угодника Божия, нашего же вернаго молитвенника и исцелителя, усердне благодарим тя и Подателя всех благ Господа Бога нашего о великих благодеяниих, от Него тобою нам бывших. Приими убо милостивно малое сие молитвенное благодарение наше, зане не имамы ино что по достоянию воздати тебе, и прочее время живота нашего не лиши нас, немощных и грешных, твоея помощи и молитвеннаго ходатайства у Господа Бога нашего, Емуже подобает всякая слава, благодарение и поклонение, Отцу и Сыну и Святому Духу, ныне и присно и во веки веков. Аминь.