Рейтинг@Mail.ru
Рейтинг@Mail.ru
Ваш браузер устарел. Рекомендуем обновить его до последней версии.
Каноны и молитвы ко Господу

КАНОНЫ И МОЛИТВЫ КО ГОСПОДУ

 

КАНОН ЗА БОЛЯЩЕГО[1]

Глас 3-й

Песнь 1

Ирмос: Пресекаемое море жезлом древле, Израиль пройде яко по пустыни, и крестообразно яве предуготовляет стези. Сего ради поим во хвалении чудному Богу нашему, яко прославися.

Стих: Господи, да не яростию Твоею обличиши мене, ниже гневом Твоим накажеши мене.

В день печали, нашедшия на ны, к Тебе, Христе Спасе, припадающе, Твоея милости просим. Облегчи болезнь раба Твоего, рцы и нам, яко и сотнику: иди, се здрав есть отрок твой.

Стих: Помилуй мя, Господи, яко немощен есмь.

Мольбы и моления приносяще, с воздыханием и верою к Тебе вопием: Сыне Божий, помилуй нас и воздвигни от одра лежащаго, якоже разслабленнаго словом, рекий: возми одр твой, отпущаются ти греси твои.

Слава[2]: Твоего, Христе, образа подобию поклоняющеся, сего верою лобызаем и болящему здравия просим, подражающе кровоточивей, яже воскрилия риз Твоих прикоснувшися, исцеление недуга прияла есть.

И ныне:[3] Богородичен: Пречистая Госпоже Богородице, всем известная Помощнице, не презри нас, к Тебе припадающих, но моли яко Благая Сына Своего и Бога нашего, дати здравие болящему, да Тя с нами прославляет.

 

Песнь 3

 Ирмос: Иже от не сущих вся приведый, словом созидаемая, совершаемая Духом, Вседержителю Вышний, в любви Твоей утверди мене.

Стих: Исцели мя, Господи, яко смятошася кости моя, и душа моя смятеся зело.

От тяжких болезней на землю поверженный к Тебе, Христе, нами вопиет; подаждь здравие телеси его, якоже Езекии плакавшуся к Тебе.

Стих: И Ты, Господи, доколе: обратися, Господи, и избави душу мою.

Призри, Господи, на наше смирение и не помяни беззаконий наших. Но веры ради болящаго, якоже прокаженнаго, словом исцели, да Твое, Христе Боже, славится имя.

Слава: Церкви, юже освятил еси, Христе, не даждь поношения, но воздвигни невидимо на одре болезни лежащаго, иже молится Тебе, да не рекут невернии: где есть Бог их.

И ныне, Богородичен: К Твоему пречистому, Богородице, образу руце воздеюще, вопием, услыши раб Твоих молитву и спаси в недузе лежащаго, да от болезни востав, воздаст обеты, яже в печали глаголаша уста его.

 

Господи, помилуй. (Трижды).

Седален, глас 8-й

Якоже древле воздвигл еси Петрову тещу и спасл еси разслабленнаго носима на одре, тако и ныне посети болящаго раба Твоего, Милостиве: Ты бо един еси понесый недуги рода нашего, и Тебе единаго вемы терпеливаго, и милосердаго, и милостиваго Врача душ и телес, Христа Бога нашего, наводящаго недуги и паки возставляющаго, и подавающаго прощение кающимся о согрешениих, едине Милосерде и Всемилостиве.

Слава: Аз, грешный, плачуся на одре моем лежа, прощение подаждь, Христе Боже, грехом моим, яже от юности моея сотворих, и от болезни мя воздвигни, да славлю Тя, единаго всемилостиваго душ и телес Врача.

И ныне, Богородичен: Умилосердися, Владычице, и воздвигни мя от одра болезненнаго, крепость бо моя во мне изнеможе и весь нечаянием одержим есмь, Мати Божия Пречистая, исцели недугующа люте, Ты бо еси Помощница христианом.

 

Песнь 4

Ирмос: Положил еси к нам твердую любовь, Господи: Единороднаго бо Твоего Сына за ны на смерть дал еси. Темже Ти зовем благодаряще: слава силе Твоей, Господи.

Стих: Спаси мя ради милости Твоея.

Тебе, Творче, молимся, вся грехи раба Твоего прости, не хощеши бо смерти грешнаго, оживи и уздрави болящаго, да востав послужит Ти, исповедая с нами Твою благость.

Стих: Яко несть в смерти поминаяй Тебе, во аде же кто исповестся Тебе?

Уже отчаяннаго лютым недугом и к смерти приближившагося, возврати, Христе, на живот и даждь плачущимся утешение, да вси прославляем Твоя святая чудеса.

Слава: Слезы Манассиины, ниневитян покаяние и Давидово исповедание приим, вскоре сих спасл еси, и наша молитвы ныне приими, благосерде Господи, и подаждь здравие болящему, о немже Тя молим.

И ныне, Богородичен: Подаждь нам Твою милость, Госпоже, всегда на Тя надеющимся, и испроси здравие болящему, врачебнии Твои руце со Предтечею, Богородице, ко Христу Богу простирающи.

 

Песнь 5

Ирмос: На земли Невидимый явился еси, и человеком волею сожил еси, Непостижимый, и к Тебе утренююще, воспеваем Тя, Человеколюбче.

Стих: Утрудихся воздыханием моим.

Дщерь Иаирову, уже умершую, яко Бог оживил еси, и ныне возведи, Христе Боже, от врат смертных болящаго, Ты бо еси Путь и Живот всем.

Стих: Измыю на всяку нощь ложе мое, слезами моими постелю мою омочу.

Сына вдовича оживив, Спасе, тоя слезы преложил еси на радость: и ныне спаси от недуга тлеющаго раба Твоего, да и наша скорбь и болезнь на радость прейдет.

Слава: Огненная болезнь иногда, Христе, тещи Петрове прикосновением Твоея руки исцеле, и ныне таяжде всесильная Твоя десница да возставит болящаго раба Твоего, да востав, якоже и сия, послужит Тебе.

И ныне, Богородичен: В скорби сущи грешнии, и не имуще к Богу дерзновения, к Тебе, Пречистая Богомати, вопием: моли Сына Твоего подати болящему здравие.

 

Песнь 6

Ирмос: Бездна последняя грехов обыде мя, и исчезает дух мой; но прострый, Владыко, высокую Твою мышцу, яко Петра мя, Управителю, спаси.

Стих: Смятеся от ярости око мое.

Бездну милости имеяй, Христе Боже, услыши моления раб Твоих, и якоже Петром Тавифу воскресил еси, сице и ныне в болезни лежащаго воздвигни, послушав церковныя молитвенники.

Стих: Обетшах во всех вразех моих.

Врачу душам и телесем нашим, понесый недуги всего мира, Христе, Енея Петром исцеливый и Евтиха Павлом воскресивый, и ныне болящаго исцели святых апостол молитвами.

Слава: Преложи, Христе, на радость рыдание о недужнем ныне скорбящих, да Твою получивше милость, внидем в дом Твой со обетованными дары, славяще Тя со Отцем и Духом во Едином Существе Нераздельнаго Бога.

И ныне, Богородичен: Приидите, о друзи, припадем к Божией Матери. Та бо имать власть недужныя исцеляти, со безмездникома вкупе, духовным помазующе молитв Своих богоприятных елеем.

Господи, помилуй. (Трижды)

Слава, и ныне:

 

Кондак, глас 2-й

 На одре болезни лежащаго и смертною раною уязвленнаго, якоже иногда воздвигл еси, Спасе, Петрову тещу и разслабленнаго на одре носимаго, сице и ныне, Милосерде, страждущаго посети и исцели: Ты бо един еси недуги и болезни рода нашего понесый и вся могий, яко Многомилостив.

Икос

Иже руки Своея горстию содержай концы, Иисусе Боже, Иже Отцу собезначальный и Духу Святому совладычествуяй, яко плотию явился еси недуги исцеляя и страсти очистил еси, слепыя просветил еси, и разслабленнаго словом Божественным совозставил еси, сего право ходяща сотворив, и одр повелел еси на рамо взяти. Темже вси с ним воспеваем и поем: щедре Христе, даждь ми исцеление.

 

Песнь 7

Ирмос: Прежде образу златому, персидскому чтилищу, отроцы не поклонишася, трие поюще посреде пещи: отцев Боже, благословен еси.

Стих: Отступите от мене, вси делающии беззаконие.

Креста Твоего, Господи, Животворнаго, имже смерть погибе, и мертвии оживотворени быша, Божественным знамением ныне болящаго воздвигни, якоже при Елене умершую девицу.

Стих: Яко услыша Господь глас плача моего.

Долгую и лютую болезнь Иовлю, на гноищи в червех седящаго и благодарне молящагося, словом исцелил еси, Господи. И ныне болезнующаго и нами молящагося Тебе яко Благ исцели невидимо молитвами святых Твоих.

Слава: Вси вемы, яко всяко умрети нам есть, Тебе Богу тако изволившу, но на мало время, Милостиве, здравия просим болящему, премени от смерти того на живот, подаждь скорбящим утешение.

И ныне, Богородичен: Пособствуй и помози нашей нищете, Богородице, Ты бо веси время и час, когда умолити Сына Твоего и Бога нашего, подати болящему здравие и прощение всех грехов.

 

Песнь 8

Ирмос: Служити Живому Богу в Вавилоне отроцы претерпевше, о мусикийских органех нерадиша, и посреде пламене стояще, боголепную песнь воспеваху, глаголюще: благословите, вся дела Господня, Господа.

Стих: Услыша Господь моление мое.

Наказуя наказал еси, Владыко, болезнию раба Твоего, и скоро исцели, милостиве Христе Боже, и еще смерти не предаждь судне, да Тебе покаянием воздаст. Сам бо рекл еси: не хощу смерти грешнаго.

Стих: Господь молитву мою прият.

Господи милостиве, Твоя преславная чудеса и до нас ныне да достигнут: бесы прожени, недуги и раны исцели, болезни уврачуй, и потворы и чародеяния, и всякия язвы избави ны.

Слава: Запретивый, Христе, морским ветром, и страх учеников на радость преложивый, запрети и ныне тяжким болезнем, труждающим раба Твоего, да вси возвеселимся, хваляще Тя во веки.

И ныне, Богородичен: Избави, Богородице, от обышедших ны печалей, бед же и скорбей, и всех различных недугов, отравы же и чародеяний, и бесовскаго мечтания, и от навета злых человек, и от напрасныя смерти, молимся.

 

Песнь 9

Ирмос: На Синайстей горе виде Тя в купине Моисей, неопально огнь Божества заченшую во чреве; Даниил же Тя виде Гору несекомую, Жезл прозябший, Исаиа взываше, от корене Давидова.

Стих: Да постыдятся и смятутся вси врази мои.

Источниче жизни, Подателю милости, Христе, не отврати лица Твоего от нас, но облегчи болезни утружденному болезнию и воздвигни его, якоже Фаддеом Авгаря, да присно Тебе славит со Отцем и Духом Святым Единаго Бога.

Стих: Да возвратятся и устыдятся зело вскоре.

Евангельскому верующе глаголу, Твое ищем обещание, Христе: просите, бо рекл еси, и дастся вам. Тем и ныне предстояще молим Тя, возстави от одра здрава лютым поверженнаго недугом, да Тя с нами вкупе величает.

Слава: Мучимый недугом и внутрь невидимыми ранами Тебе, Христе, нами вопиет; не нам, Господи, ни нас ради, вси бо мы исполнени грехов, но Матерними и Предтечи Твоего молитвами подаждь исцеление болящему, да Тя вси возвеличим.

И ныне, Богородичен: Божия Мати Пречистая, со всеми святыми призываем Тя, со Ангелы и Архангелы, с пророки и патриархи, со апостолы и святители, с преподобными и праведными молися Христу Богу нашему подати здравие болящему, да Тя вси величаем.

 

Молитва

Боже сильный, милостию строяй вся на спасение роду человеческому, посети раба Своего сего (имя), нарицающа имя Христа Твоего, исцели его от всякаго недуга плотскаго; и отпусти грех и греховныя соблазны, и всяку напасть, и всяко нашествие неприязненно далече сотвори от раба Твоего. И воздвигни от одра греховнаго, и устрой его во Святую Твою Церковь здрава душею и телом, и делы добрыми славящаго со всеми людьми имя Христа Твоего, яко Тебе славу возсылаем, со Безначальным Ти Сыном и со Святым Духом, ныне и присно и во веки веков. Аминь.



[1] Напечатанное курсивом (названия молитв и примечания) не читается во время молитвы. Текст канона приводится по изданию: Молитвы об исцелении болящих. – М.: Изд. Тихомирова М.Ю., 2015. www.pravmolitva.ru

[2] Когда написано «Слава:», надо читать полностью: «Слава Отцу и Сыну и Святому Духу».

[3] Когда написано «И ныне:», надо читать полностью: «И ныне и присно и во веки веков. Аминь».

КАНОН ЗА БОЛЯЩУЮ[1]

Глас 3-й

Песнь 1

Ирмос: Пресекаемое море жезлом древле, Израиль пройде яко по пустыни, и крестообразно яве предуготовляет стези. Сего ради поим во хвалении чудному Богу нашему, яко прославися.

Стих: Господи, да не яростию Твоею обличиши мене, ниже гневом Твоим накажеши мене.

В день печали, нашедшия на ны, к Тебе, Христе Спасе, припадающе, Твоея милости просим. Облегчи болезнь рабы Твоея, рцы и нам, яко и сотнику: иди, се здрав есть отрок твой.

Стих: Помилуй мя, Господи, яко немощен есмь.

Мольбы и моления приносяще, с воздыханием и верою к Тебе вопием: Сыне Божий, помилуй нас и воздвигни от одра лежащую, якоже разслабленнаго словом, рекий: возми одр твой, отпущаются ти греси твои.

Слава: Твоего, Христе, образа подобию поклоняющеся, сего верою лобызаем и болящей здравия просим, подражающе кровоточивей, яже воскрилия риз Твоих прикоснувшися, исцеление недуга прияла есть.

И ныне: Богородичен: Пречистая Госпоже Богородице, всем известная Помощнице, не презри нас, к Тебе припадающих, но моли яко Благая Сына Своего и Бога нашего, дати здравие болящей, да Тя с нами прославляет.

 

Песнь 3

Ирмос: Иже от не сущих вся приведый, словом созидаемая, совершаемая Духом, Вседержителю Вышний, в любви Твоей утверди мене.

Стих: Исцели мя, Господи, яко смятошася кости моя, и душа моя смятеся зело.

От тяжких болезней на землю поверженная к Тебе, Христе, нами вопиет; подаждь здравие телеси ея, якоже Езекии плакавшуся к Тебе.

Стих: И Ты, Господи, доколе: обратися, Господи, и избави душу мою.

Призри, Господи, на наше смирение и не помяни беззаконий наших. Но веры ради болящую, якоже прокаженнаго, словом исцели, да Твое, Христе Боже, славится имя.

Слава: Церкви, юже освятил еси, Христе, не даждь поношения, но воздвигни невидимо на одре болезни лежащую, иже молится Тебе, да не рекут невернии: где есть Бог их.

И ныне, Богородичен: К Твоему пречистому, Богородице, образу руце воздеюще, вопием, услыши раб Твоих молитву и спаси в недузе лежащую, да от болезни востав, воздаст обеты, яже в печали глаголаша уста ея.

 

Господи, помилуй. (Трижды)

 

Седален, глас 8-й

Якоже древле воздвигл еси Петрову тещу и спасл еси разслабленнаго носима на одре, тако и ныне посети болящую рабу Твою, Милостиве: Ты бо един еси понесый недуги рода нашего, и Тебе единаго вемы терпеливаго, и милосердаго, и милостиваго Врача душ и телес, Христа Бога нашего, наводящаго недуги и паки возставляющаго, и подавающаго прощение кающимся о согрешениих, едине Милосерде и Всемилостиве.

 

Слава: Аз, грешная, плачуся на одре моем лежа, прощение подаждь, Христе Боже, грехом моим, яже от юности моея сотворих, и от болезни мя воздвигни, да славлю Тя, единаго всемилостиваго душ и телес Врача.

И ныне, Богородичен: Умилосердися, Владычице, и воздвигни мя от одра болезненнаго, крепость бо моя во мне изнеможе и вся нечаянием одержима есмь, Мати Божия Пречистая, исцели недугующую люте, Ты бо еси Помощница христианом.

 

Песнь 4

Ирмос: Положил еси к нам твердую любовь, Господи: Единороднаго бо Твоего Сына за ны на смерть дал еси. Темже Ти зовем благодаряще: слава силе Твоей, Господи.

Стих: Спаси мя ради милости Твоея.

Тебе, Творче, молимся, вся грехи рабы Твоея прости, не хощеши бо смерти грешнаго, оживи и уздрави болящую, да востав послужит Ти, исповедая с нами Твою благость.

Стих: Яко несть в смерти поминаяй Тебе, во аде же кто исповестся Тебе?

Уже отчаянную лютым недугом и к смерти приближившуюся, возврати, Христе, на живот и даждь плачущимся утешение, да вси прославляем Твоя святая чудеса.

Слава: Слезы Манассиины, ниневитян покаяние и Давидово исповедание приим, вскоре сих спасл еси, и наша молитвы ныне приими, благосерде Господи, и подаждь здравие болящей, о нейже Тя молим.

И ныне, Богородичен: Подаждь нам Твою милость, Госпоже, всегда на Тя надеющимся, и испроси здравие болящей, врачебнии Твои руце со Предтечею, Богородице, ко Христу Богу простирающи.

 

Песнь 5

Ирмос: На земли Невидимый явился еси, и человеком волею сожил еси, Непостижимый, и к Тебе утренююще, воспеваем Тя, Человеколюбче.

Стих: Утрудихся воздыханием моим.

Дщерь Иаирову, уже умершую, яко Бог оживил еси, и ныне возведи, Христе Боже, от врат смертных болящую, Ты бо еси Путь и Живот всем.

Стих: Измыю на всяку нощь ложе мое, слезами моими постелю мою омочу.

Сына вдовича оживив, Спасе, тоя слезы преложил еси на радость: и ныне спаси от недуга тлеющую рабу Твою, да и наша скорбь и болезнь на радость прейдет.

Слава: Огненная болезнь иногда, Христе, тещи Петрове прикосновением Твоея руки исцеле, и ныне таяжде всесильная Твоя десница да возставит болящую рабу Твою, да востав, якоже и сия, послужит Тебе.

И ныне, Богородичен: В скорби сущи грешнии, и не имуще к Богу дерзновения, к Тебе, Пречистая Богомати, вопием: моли Сына Твоего подати болящей здравие.

 

Песнь 6

Ирмос: Бездна последняя грехов обыде мя, и исчезает дух мой; но прострый, Владыко, высокую Твою мышцу, яко Петра мя, Управителю, спаси.

Стих: Смятеся от ярости око мое.

Бездну милости имеяй, Христе Боже, услыши моления раб Твоих, и якоже Петром Тавифу воскресил еси, сице и ныне в болезни лежащую воздвигни, послушав церковныя молитвенники.

Стих: Обетшах во всех вразех моих.

Врачу душам и телесем нашим, понесый недуги всего мира, Христе, Енея Петром исцеливый и Евтиха Павлом воскресивый, и ныне болящую исцели святых апостол молитвами.

Слава: Преложи, Христе, на радость рыдание о недужней ныне скорбящих, да Твою получивше милость, внидем в дом Твой со обетованными дары, славяще Тя со Отцем и Духом во Едином Существе Нераздельнаго Бога.

И ныне, Богородичен: Приидите, о друзи, припадем к Божией Матери. Та бо имать власть недужныя исцеляти, со безмездникома вкупе, духовным помазующе молитв Своих богоприятных елеем.

 

Господи, помилуй. (Трижды)

Слава, и ныне:

 

Кондак, глас 2-й

На одре болезни лежащую и смертною раною уязвленную, якоже иногда воздвигл еси, Спасе, Петрову тещу и разслабленнаго на одре носимаго, сице и ныне, Милосерде, страждущую посети и исцели: Ты бо един еси недуги и болезни рода нашего понесый и вся могий, яко Многомилостив.

 

Икос

 Иже руки Своея горстию содержай концы, Иисусе Боже, Иже Отцу собезначальный и Духу Святому совладычествуяй, яко плотию явился еси недуги исцеляя и страсти очистил еси, слепыя просветил еси, и разслабленнаго словом Божественным совозставил еси, сего право ходяща сотворив, и одр повелел еси на рамо взяти. Темже вси с ним воспеваем и поем: щедре Христе, даждь ми исцеление.

 

Песнь 7

 Ирмос: Прежде образу златому, персидскому чтилищу, отроцы не поклонишася, трие поюще посреде пещи: отцев Боже, благословен еси.

Стих: Отступите от мене, вси делающии беззаконие.

Креста Твоего, Господи, Животворнаго, имже смерть погибе, и мертвии оживотворени быша, Божественным знамением ныне болящую воздвигни, якоже при Елене умершую девицу.

Стих: Яко услыша Господь глас плача моего.

Долгую и лютую болезнь Иовлю, на гноищи в червех седящаго и благодарне молящагося, словом исцелил еси, Господи. И ныне болезнующую и нами молящуюся Тебе яко Благ исцели невидимо молитвами святых Твоих.

Слава: Вси вемы, яко всяко умрети нам есть, Тебе Богу тако изволившу, но на мало время, Милостиве, здравия просим болящей, премени от смерти ту на живот, подаждь скорбящим утешение.

И ныне, Богородичен: Пособствуй и помози нашей нищете, Богородице, Ты бо веси время и час, когда умолити Сына Твоего и Бога нашего, подати болящей здравие и прощение всех грехов.

 

Песнь 8

Ирмос: Служити Живому Богу в Вавилоне отроцы претерпевше, о мусикийских органех нерадиша, и посреде пламене стояще, боголепную песнь воспеваху, глаголюще: благословите, вся дела Господня, Господа.

Стих: Услыша Господь моление мое.

Наказуя наказал еси, Владыко, болезнию рабу Твою, и скоро исцели, милостиве Христе Боже, и еще смерти не предаждь судне, да Тебе покаянием воздаст. Сам бо рекл еси: не хощу смерти грешнаго.

Стих: Господь молитву мою прият.

Господи милостиве, Твоя преславная чудеса и до нас ныне да достигнут: бесы прожени, недуги и раны исцели, болезни уврачуй, и потворы и чародеяния, и всякия язвы избави ны.

Слава: Запретивый, Христе, морским ветром, и страх учеников на радость преложивый, запрети и ныне тяжким болезнем, труждающим рабу Твою, да вси возвеселимся, хваляще Тя во веки.

И ныне, Богородичен: Избави, Богородице, от обышедших ны печалей, бед же и скорбей, и всех различных недугов, отравы же и чародеяний, и бесовскаго мечтания, и от навета злых человек, и от напрасныя смерти, молимся.

 

Песнь 9

 Ирмос: На Синайстей горе виде Тя в купине Моисей, неопально огнь Божества заченшую во чреве; Даниил же Тя виде Гору несекомую, Жезл прозябший, Исаиа взываше, от корене Давидова.

Стих: Да постыдятся и смятутся вси врази мои.

Источниче жизни, Подателю милости, Христе, не отврати лица Твоего от нас, но облегчи болезни утружденней болезнию и воздвигни ю, якоже Фаддеом Авгаря, да присно Тебе славит со Отцем и Духом Святым Единаго Бога.

Стих: Да возвратятся и устыдятся зело вскоре.

Евангельскому верующе глаголу, Твое ищем обещание, Христе: просите, бо рекл еси, и дастся вам. Тем и ныне предстояще молим Тя, возстави от одра здраву лютым поверженную недугом, да Тя с нами вкупе величает.

Слава: Мучимая недугом и внутрь невидимыми ранами Тебе, Христе, нами вопиет; не нам, Господи, ни нас ради, вси бо мы исполнени грехов, но Матерними и Предтечи Твоего молитвами подаждь исцеление болящей, да Тя вси возвеличим.

И ныне, Богородичен: Божия Мати Пречистая, со всеми святыми призываем Тя, со Ангелы и Архангелы, с пророки и патриархи, со апостолы и святители, с преподобными и праведными молися Христу Богу нашему подати здравие болящей, да Тя вси величаем.

 

Молитва

Боже сильный, милостию строяй вся на спасение роду человеческому, посети рабу Свою сию (имя), нарицающую имя Христа Твоего, исцели ю от всякаго недуга плотскаго; и отпусти грех и греховныя соблазны, и всяку напасть, и всяко нашествие неприязненно далече сотвори от рабы Твоея. И воздвигни от одра греховнаго, и устрой ю во Святую Твою Церковь здраву душею и телом, и делы добрыми славящу со всеми людьми имя Христа Твоего, яко Тебе славу возсылаем, со Безначальным Ти Сыном и со Святым Духом, ныне и присно и во веки веков. Аминь.

 

Молитвы ко Господу о болящих

 Тропарь, глас 4-й

Скорый в заступлении един сый, Христе, скорое свыше покажи посещение страждущему рабу Твоему, и избави от недуг и горьких болезней; и воздвигни во еже пети Тя и славити непрестанно, молитвами Богородицы, Едине Человеколюбче.

 

Кондак, глас 2-й

 На одре болезни лежащаго и смертною раною уязвленнаго, якоже иногда воздвигл еси, Спасе, Петрову тещу и разслабленнаго на одре носимаго; сице и ныне, Милосерде, страждущаго посети и исцели: Ты бо един еси недуги и болезни рода нашего понесый и вся могий, яко Многомилостив.

 

Молитва о болящем

Владыко Вседержителю, Святый Царю, наказуяй и не умерщвляяй, утверждаяй низпадающия и возводяй низверженныя, телесныя человеков скорби исправляяй, молимся Тебе, Боже наш, раба Твоего (имя) немощствующа посети милостию Твоею, прости ему всякое согрешение вольное и невольное. Ей, Господи, врачебную Твою силу с небесе низпосли, прикоснися телеси, угаси огневицу, укроти страсть и всякую немощь таящуюся, буди врач раба Твоего (имя), воздвигни его от одра болезненнаго и от ложа озлобления цела и всесовершенна, даруй его Церкви Твоей благоугождающа и творяща волю Твою. Твое бо есть, еже миловати и спасати ны, Боже наш, и Тебе славу возсылаем, Отцу и Сыну и Святому Духу, ныне и присно и во веки веков. Аминь.

 

Молитва ко Господу

(читаемая от лица болящего)

Владыко! Я в руках Твоих: помилуй меня по воле Твоей и, если мне полезно, исцели меня вскоре. Аминь.

 

Молитва ко Господу

болящего о даровании терпения

О дивный Создателю, человеколюбивый Владыко, многомилостивый Господи! С сердцем сокрушенным и смиренным сице молю Тя: не возгнушайся грешнаго моления моего, не отрини слез моих и воздыхания, услыши мене, якоже хананею, не презри мене, якоже блудницу, яви и на мне, грешнем, великую милость человеколюбия Твоего, ризою Твоею честною защити, помилуй и подкрепи мя, да вся попускаемыя Тобою к пользе моей беды и напасти со благодарением в надежде вечных благ претерплю; изряднее же печаль мою на радость претвори, да не во отчаяние впаду и погибну аз, окаянный. Ты бо еси Источник милости и непостыдная спасения нашего надежда, Христе Боже наш, и Тебе славу возсылаем со Безначальным Твоим Отцем и с Пресвятым и Благим и Животворящим Твоим Духом, ныне и присно и во веки веков. Аминь.

 

Молитва ко Господу

о даровании терпения и любви

при уходе за больным

Господи Иисусе Христе, Сыне Бога Живаго, Агнче Божий, вземляй грехи мира, Пастырю добрый, положивый душу Твою за овцы Твоя, Небесный Врачу душ и телес наших, исцеляяй всякий недуг и всякую язву в людех Твоих! Тебе припадаю, помози ми, недостойному рабу Твоему. Призри, Многомилостиве, на делание и служение мое, даждь ми быти верным в мале, послужити болящим, Тебе ради, носити немощи немощных, и не себе, но Тебе единому угодити во вся дни живота моего. Ты бо рекл еси, о Сладчайший Иисусе: понеже сотвористе единому сих братий Моих меньших, Мне сотвористе. Ей, Господи, суди мне, грешному, по сему глаголу Твоему, яко да сподоблюся творити благую Твою волю во отраду и утешение искушаемых, недугующих раб Твоих, ихже искупил еси честною Твоею Кровию. Низпосли ми благодать Твою, попаляющую во мне страстей терние, призвавый мя, грешнаго, на дело служения о имени Твоем, без Тебе не можем творити ничесоже; посети убо нощию и искуси сердце мое, внегда предстояти ми у возглавия болящих и низверженных, уязви душу мою Твоею любовию, вся терпящею и николиже отпадающею. Тогда возмогу, Тобою укрепляем, подвигом добрым подвизатися и веру соблюсти, даже до последняго моего издыхания. Ты бо еси Источник исцелений душевных же и телесных, Христе Боже наш, и Тебе яко Спасителю человеков и Жениху душ, грядущему в полунощи, славу и благодарение, и поклонение возсылаем, ныне и присно и во веки веков. Аминь.

 

Молитва ко Господу благодарственная

после исцеления от болезни

(праведного Иоанна Кронштадтского)

Слава Тебе, Господи, Иисусе Христе, Сыне Единородный Безначальнаго Отца, едине исцеляяй всяк недуг и всяку язю в людех, яко помиловал мя еси, грешнаго, и избавил еси мя от болезни моей, не попустив ей развиться и умертвить меня по грехам моим. Даруй мне отныне, Владыко, силу твердо творить волю Твою во спасение души моея окаянныя и во славу Твою со Безначальным Твоим Отцем и Единосущным Твоим Духом, ныне и присно и во веки веков. Аминь.



[1] В настоящем издании текст Канона за болящего (болящую) для удобства чтения приводится дважды, чтобы избежать в молитве концентрации внимания на особенностях вариантов мужского и женского рода.