Рейтинг@Mail.ru
Рейтинг@Mail.ru
Ваш браузер устарел. Рекомендуем обновить его до последней версии.
Каноны и молитвы к Божией Матери

КАНОНЫ И МОЛИТВЫ К БОЖИЕЙ МАТЕРИ

 

КАНОН МОЛЕБНЫЙ

КО ПРЕСВЯТОЙ БОГОРОДИЦЕ,

поемый во всякой скорби душевной

и обстоянии[1]

Творение Феостирикта монаха

 

Тропaрь Богородице, глас 4-й

К Богородице прилежно ныне притецем, грешнии и смиреннии, и припадем, в покаянии зовуще из глубины души: Владычице, помози, на ны милосердовавши, потщися, погибaем от множества прегрешений, не отврати Твоя рабы тщи, Тя бо и едину надежду имамы. (Дважды)

Слава, и ныне: Не умолчим никогда, Богородице, силы Твоя глаголати, недостойнии: aще бо Ты не бы предстояла молящи, кто бы нас избaвил от толиких бед, кто же бы сохранил до ныне свободны? Не отступим, Владычице, от Тебе: Твоя бо рабы спасaеши присно от всяких лютых.

 

Канон

Глас 8-й

Песнь 1

 Ирмос: Воду прошед, яко сушу, и египетскаго зла избежaв, изрaильтянин вопияше: Избaвителю и Богу нашему поим.

Припев: Пресвятая Богородице, спаси нас.

Многими содержим напaстьми, к Тебе прибегаю, спасения иский: о, Мaти Слова и Дево, от тяжких и лютых мя спаси.

Припев: Пресвятая Богородице, спаси нас.

Страстей мя смущaют прилози, многаго уныния исполнити мою душу; умири, Отроковице, тишиною Сына и Бога Твоего, Всенепорочная.

Слава: Спaса рождшую Тя и Бога, молю, Дево, избaвитися ми лютых: к Тебе бо ныне прибегaя, простирaю и душу и помышление.

И ныне: Недугующа телом и душею, посещения Божественнаго и промышления от Тебе сподоби, едина Богомaти, яко благая, Благaго же Родительница.

 

Песнь 3

Ирмос: Небеснаго круга Верхотворче Господи, и Церкве Зиждителю, Ты мене утверди в любви Твоей, желaний крaю, верных утверждение, едине Человеколюбче.

Припев: Пресвятая Богородице, спаси нас.

Предстaтельство и покров жизни моея полагaю Тя, Богородительнице Дево: Ты мя окорми ко пристaнищу Твоему, благих виновна, верных утверждение, едина Всепетая.

Припев: Пресвятая Богородице, спаси нас.

Молю, Дево, душевное смущение и печали моея бурю разорити: Ты бо, Богоневестная, начальника тишины Христа родилa еси, едина Пречистая.

Слава: Благодетеля рождши добрых виновнаго, благодеяния богатство всем источи, вся бо можеши, яко сильнаго в крепости Христа рождши, Богоблаженная.

И ныне: Лютыми недуги и болезненными страстьми истязaему, Дево, Ты ми помози: исцелений бо неоскудное Тя знаю сокровище, Пренепорочная, неиждивaемое.

Спаси от бед рабы Твоя, Богородице, яко вси по Бозе к Тебе прибегaем, яко нерушимей стене и предстaтельству.

Призри благосердием, всепетая Богородице, на мое лютое телесе озлобление, и исцели души моея болезнь.

 

Тропарь, глас 2-й

Моление теплое и стенa необоримая, милости источниче, мирови прибежище, прилежно вопием Ти: Богородице Владычице, предвари, и от бед избaви нас, едина вскоре предстaтельствующая.

 

Песнь 4

Ирмос: Услышах, Господи, смотрения Твоего тaинство, разумех дела Твоя и прослaвих Твое Божество.

Припев: Пресвятая Богородице, спаси нас.

Страстей моих смущение, кормчию рождшая Господа, и бурю утиши моих прегрешений, Богоневестная.

Припев: Пресвятая Богородице, спаси нас.

Милосердия Твоего бездну призывaющу подaждь ми, Яже Благосердаго рождшая и Спaса всех поющих Тя.

Припев: Пресвятая Богородице, спаси нас.

Наслаждaющеся, Пречистая, Твоих даровaний, благодaрственное воспевaем пение, ведуще Тя Богомaтерь.

Слава: На одре болезни моея и немощи низлежaщу ми, яко Боголюбива, помози, Богородице, едина Приснодево.

И ныне: Надежду и утверждение и спасения стену недвижиму имуще Тя, Всепетая, неудобства всякаго избавляемся.

 

Песнь 5

Ирмос: Просвети нас повелении Твоими, Господи, и мышцею Твоею высокою Твой мир подaждь нам, Человеколюбче.

Припев: Пресвятая Богородице, спаси нас.

Исполни, Чистая, веселия сердце мое, Твою нетленную дающи радость, веселия рождшая виновнаго.

Припев: Пресвятая Богородице, спаси нас.

Избaви нас от бед, Богородице Чистая, вечное рождши избавление, и мир, всяк ум преимущий.

Слава: Разреши мглу прегрешений моих, Богоневесто, просвещением Твоея светлости, Свет рождшая Божественный и превечный.

И ныне: Исцели, Чистая, души моея неможение, посещения Твоего сподобльшая, и здрaвие молитвами Твоими подaждь ми.

 

Песнь 6

Ирмос: Молитву пролию ко Господу, и Тому возвещу печали моя, яко зол душа моя исполнися, и живот мой аду приближися, и молюся, яко Иона: от тли, Боже, возведи мя.

Припев: Пресвятая Богородице, спаси нас.

Смерти и тли яко спасл есть, Сам Ся издaв смерти, тлением и смертию мое естество ято бывшее, Дево, моли Господа и Сына Твоего, врагов злодействия мя избaвити.

Припев: Пресвятая Богородице, спаси нас.

Предстaтельницу Тя живота вем и хранительницу тверду, Дево, и напaстей решaщу молвы, и налоги бесов отгоняющу; и молюся всегда, от тли страстей моих избaвити мя.

Слава: Яко стену прибежища стяжaхом, и душ всесовершенное спасение, и прострaнство в скорбех, Отроковице, и просвещением Твоим присно рaдуемся: о, Владычице, и ныне нас от страстей и бед спаси.

И ныне: На одре ныне немощствуяй лежу, и несть исцеления плоти моей: но, Бога и Спaса миру и Избaвителя недугов рождшая, Тебе молюся, Благой: от тли недуг возстaви мя.

 

Кондaк, глас 6-й

Предстaтельство христиан непостыдное, ходaтайство ко Творцу непреложное, не презри грешных молений глaсы, но предвари, яко Благaя, на помощь нас, верно зовущих Ти; ускори на молитву, и потщися на умоление, предстaтельствующи присно, Богородице, чтущих Тя.

Другой кондaк, глас тот же

Не имамы иныя помощи, не имамы иныя надежды, разве Тебе, Пречистая Дево. Ты нам помози, на Тебе надеемся, и Тобою хвaлимся, Твои бо есмы рабы, да не постыдимся.

 

Стихира, глас тот же

Не ввери мя человеческому предстaтельству, Пресвятая Владычице, но приими моление раба Твоего: скорбь бо обдержит мя, терпети не могу демонскаго стреляния, покрова не имам, ниже где прибегну, окаянный, всегда побеждaем, и утешения не имам, разве Тебе, Владычице мира, уповaние и предстaтельство верных, не презри моление мое, полезно сотвори.

 

Песнь 7

Ирмос: От Иудеи дошедше отроцы, в Вавилоне иногдa, верою Троическою плaмень пещный попрaша, поюще: отцев Боже, благословен еси.

Припев: Пресвятая Богородице, спаси нас.

Наше спасение якоже восхотел еси, Спaсе, устроити, во утробу Девыя вселился еси, Юже миру предстaтельницу показал еси: отец наших Боже, благословен еси.

Припев: Пресвятая Богородице, спаси нас.

Волителя милости, Егоже родилa еси, Мaти чистая, умоли избaвитися от прегрешений и душевных скверн верою зовущим: отец наших Боже, благословен еси.

Слава: Сокровище спасения и источник нетления, Тя рождшую, и столп утверждения, и дверь покаяния, зовущим показал еси: отец наших Боже, благословен еси.

И ныне: Телесныя слабости и душевныя недуги, Богородительнице, любовию приступaющих к крову Твоему, Дево, исцелити сподоби, Спaса Христа нам рождшая.

 

Песнь 8

Ирмос: Царя Небеснаго, Егоже поют вои aнгельстии, хвалите и превозносите во вся веки.

Припев: Пресвятая Богородице, спаси нас.

Помощи яже от Тебе требующия не презри, Дево, поющия и превозносящия Тя во веки.

Припев: Пресвятая Богородице, спаси нас.

Неможение души моея исцеляеши и телесныя болезни, Дево, да Тя прослaвлю, Чистая, во веки.

Слава: Исцелений богатство изливaеши верно поющим Тя, Дево, и превозносящим неизреченное Твое рождество.

И ныне: Напaстей Ты прилоги отгоняеши и страстей находы, Дево: темже Тя поем во вся веки.

 

Песнь 9

Ирмос: Воистину Богородицу Тя исповедуем, спасеннии Тобою, Дево Чистая, с безплотными лики Тя величaюще.

Припев: Пресвятая Богородице, спаси нас.

Тока слез моих не отвратися, Яже от всякаго лица всяку слезу отъемшаго, Дево, Христа рождшая.

Припев: Пресвятая Богородице, спаси нас.

Радости мое сердце исполни, Дево, Яже радости приемшая исполнение, греховную печаль потребляющи.

Припев: Пресвятая Богородице, спаси нас.

Пристaнище и предстaтельство к Тебе прибегaющих буди, Дево, и стена нерушимая, прибежище же и покров и веселие.

Слава: Света Твоего зарями просвети, Дево, мрак неведения отгоняющи, благоверно Богородицу Тя исповедающих.

И ныне: На месте озлобления немощи смирившагося, Дево, исцели, из нездрaвия во здрaвие претворяющи.

 

Стихиры, глас 2-й

Высшую небес и чистшую светлостей солнечных, избaвльшую нас от клятвы, Владычицу мира песньми почтим.

От многих моих грехов немощствует тело, немощствует и душа моя; к Тебе прибегaю, Благодaтней, надеждо ненадежных, Ты ми помози.

Владычице и Мaти Избaвителя, приими моление недостойных раб Твоих, да ходaтайствуеши к Рождшемуся от Тебе; о, Владычице мира, буди Ходaтаица!

Поем прилежно Тебе песнь ныне, всепетой Богородице, рaдостно: со Предтечею и всеми святыми моли, Богородице, еже ущедрити ны.

Вся Ангелов воинства, Предтече Господень, апостолов двоенадесятице, святии вси с Богородицею, сотворите молитву, во еже спастися нам.

 

Молитва первая

ко Пресвятой Богородице

Царице моя преблагaя, надеждо моя Богородице, приятелище сирых и странных предстaтельнице, скорбящих рaдосте, обидимых покровительнице! Зриши мою беду, зриши мою скорбь, помози ми яко немощну, окорми мя яко стрaнна. Обиду мою веси, разреши ту, яко волиши: яко не имам иныя помощи, разве Тебе, ни иныя предстaтельницы, ни благия утешительницы, токмо Тебе, о Богомaти, яко да сохраниши мя и покрыеши во веки веков. Аминь.

 

 

 

Молитва вторая

ко Пресвятой Богородице[2]

Надеждо ненадежных, сило безпомощных, пристанище обуреваемых, покрове напаствуемых, заступление обидимых, хлебоманно, услаждающая алчущих, нектаре небеснаго упокоения жаждущих, Мати Преблагословеннаго Бога, Преблагословенная и Пренепорочная Дево! К Тебе единей прибегаю, к Твоему покрову вседушно преклоняю колена, Владычице. Не презри плача и слез, утехо плачущих! Аще ужасает мя мое недостоинство и окаянство моих грехов, но уверяет мя цельбоносный сей образ, на немже благодать Твою и силу, яко неисчерпаемое море, вижду: слепых прозревших, скачущих хромых, странствующих, аки под сению Твоего призрения, Матерне упокоенных и по всякому прошению благоизобильствующих; на оных помилования образ взирая, прибегох, слеп сый душевными очима и хром душевными чувствы. О Свете Незаходимый! Просвети и исправи мя; веси всякую мою скорбь, веси всякую беду; не презри моления моего, о, Полезнодательнице! Не возгнушайся мене, грешнаго, не презри мене, сквернаго; вем, яко вся можеши, елика волиши, о добрая Надеждо моя, упование мое от сосцу матере моея. К Тебе привержен есмь от чрева матере моея, Тебе оставлен есмь; не остави мене, не отступи от мене, ныне и присно и во веки веков. Аминь.

 

Молитва третья

ко Пресвятой Богородице[3]

Преблагословенная Владычице, Приснодево Богородице, Бога Слова паче всякаго слова на спасение наше рождшая и благодать Его преизобильно паче всех приявшая, море явльшаяся Божественных дарований и чудес приснотекущая река, изливающая благость всем, с верою к Тебе прибегающим! Чудотворному Твоему образу припадающе, молимся Тебе, Всещедрей Матери Человеколюбиваго Владыки: удиви на нас пребогатыя милости Твоя, и прошения наша, приносимая Тебе, Скоропослушнице, ускори исполнити все, еже на пользу, во утешение и спасение коемуждо устрояющи. Посети, Преблагая, рабы Твоя благодатию Твоею, и подаждь недугующим цельбу и совершенное здравие, обуреваемым тишину, плененным свободу и различными образы страждущих утеши. Избави, Всемилостивая Госпоже, всяк град и страну от глада, язвы, труса, потопа, огня, меча и иныя казни временныя и вечныя, Матерним Твоим дерзновением отвращающи гнев Божий; и душевнаго разслабления, обуревания страстей и грехопадений свободи рабы Твоя, яко да непреткновенно во всяком благочестии поживше в сем веце, и в будущем вечных благ сподобимся благодатию и человеколюбием Сына Твоего и Бога, Емуже подобает всякая слава, честь и поклонение со Безначальным Его Отцем и Пресвятым Духом, ныне и присно и во веки веков. Аминь.

 

Молитва четвертая

ко Пресвятой Богородице[4]

Приими, о Всеблагословенная и Всемощная Госпоже Владычице Богородице Дево, сия молитвы, со слезами Тебе ныне приносимыя от нас, недостойных раб Твоих, ко Твоему цельбоносному образу пение возсылающих со умилением, яко Тебе Самой зде сущей и внемлющей молению нашему. По коемуждо бо прошению исполнение твориши, скорби облегчаеши, немощным здравие даруеши, разслабленныя и недужныя исцеляеши, от бесных бесы прогоняеши, обидимыя от обид избавляеши, прокаженныя очищаеши и малыя дети милуеши; еще же Госпоже Владычице Богородице, от уз и темниц свобождаеши и всякия многоразличныя страсти врачуеши: вся бо суть возможна ходатайством Твоим к Сыну Твоему, Христу Богу нашему. О Всепетая Мати, Пресвятая Богородице! Не престай молитися о нас, недостойных рабех Твоих, славящих Тя и почитающих Тя, и покланяющихся со умилением пречистому образу Твоему, и надежду имущих невозвратну и веру несумненну к Тебе, Приснодеве Преславней и Непорочней, ныне и присно и во веки веков. Аминь.

 

Молитва пятая

ко Пресвятой Богородице[5]

О Пресвятая Госпоже Царице Богородице, Высшая всех Небесных Сил и Святейшая всех святых! Припадаем и покланяемся Тебе пред всечестным и цельбоносным образом Твоим, воспоминающе дивное явление Твое болящему клирику Викентию, и усердно молим Тя, Всесильную рода нашего Заступницу и Помощницу: якоже древле подала еси исцеление тому клирику, тако и ныне исцели наша души и телеса, болезнующия ранами грехов и страстей многоразличных, избави нас от всяких напастей, бед, скорбей и вечнаго осуждения. Сохрани от душепагубных учений и безверия, от льстивых и наглых нападений невидимых врагов. Подаждь нам христианскую кончину, безболезненну, мирну, непостыдну, Святых Таин причастну. Сподоби нас на нелицеприятнем Судищи Христове стати одесную Всеправеднаго Судии и блаженный глас Его услышати: «Приидите, благословеннии Отца Моего, наследуйте уготованное вам Царствие от сложения мира». Аминь.

 

КАНОН БЛАГОДАРСТВЕННЫЙ

КО ПРЕСВЯТОЙ БОГОРОДИЦЕ

по избавлении от болезни[6]

 

Глас 8-й

Песнь 1

Ирмос: Воду прошед, яко сушу, и египетскаго зла избежав, израильтянин вопияше: Избавителю и Богу нашему поим.

Припев: Пресвятая Богородице, спаси нас.

Двере Божественнаго Востока, двери сострастия ми отверзла еси и от пути, во ад ведущаго, избавила еси, темже присно благодарне славлю Тя.

Припев: Пресвятая Богородице, спаси нас.

Сердцем и духом и умом смиренным, зане улучих, Святая Дево, помощь от Тебе, благодарю Тя непрестанно, раб Твой.

Слава: Печаль прейде мне в радость, се бо видим есмь здрав благодатию Твоею: темже, Пренепорочная Марие, благодарю и верою славлю Тя.

И ныне: Ко храму Твоему Божественному прибег, и болезньми всяческими обуреваем люте, раб Твой улучи тишину: и сего ради, Дево, славит Тя.

 

Песнь 3

Ирмос: Небеснаго круга Верхотворче Господи, и Церкве Зиждителю, Ты мене утверди в любви Твоей, желаний краю, верных утверждение, едине Человеколюбче.

Припев: Пресвятая Богородице, спаси нас.

Глубина греха мя в пучину зияющую вверже, Чистая, немощи, но притекох в тишайшее щедрот Твоих пристанище, и исцеление улучив, любовию славлю Тя.

Припев: Пресвятая Богородице, спаси нас.

Моея немощи прохлада Ты была еси, и обдержащия болезни вскоре избавила еси, Богоблагодатная: сего ради благодарственныя гласы Ти провещаю верою, раб Твой.

Слава: Моего не презрела еси горькаго моления, точиши бо источник сострастия, Благоутробная Владычице: темже болезнь мою и души муку Божественным посещением Твоим скоро утолила еси.

И ныне: От одра болезни, от врат адовых, от теснейшаго озлобления возвела мя еси к свету ослабы, на широту крепости: сего ради величаю Тя, Нескверная Владычице.

 

Песнь 4

Ирмос: Услышах, Господи, смотрения Твоего таинство, разумех дела Твоя и прославих Твое Божество.

Припев: Пресвятая Богородице, спаси нас.

От обдержащаго зноя росою милости Твоея свободила еси огнем жегомое сердце мое: сего ради, Дево, ублажаю Тя.

Припев: Пресвятая Богородице, спаси нас.

На мне удивила еси, Нескверная Богоневесто, милости Твоя, избавльши мя озлобления и обдержащаго отчаяния.

Слава: Гласа моего услышавши, всякое от мене отъяла еси неудобство: темже всегда славлю Тя прославленную, Приснодево.

И ныне: Сострастия сподобила еси несострадательна мя и посетила еси мя, обстоянии теснимаго, Богородице: темже величаю Тя.

 

Песнь 5

Ирмос: Вскую мя отринул еси от лица Твоего, Свете Незаходимый, и покрыла мя есть чуждая тьма, окаяннаго? Но обрати мя и к свету заповедей Твоих пути моя направи, молюся.

Припев: Пресвятая Богородице, спаси нас.

Обдержащий мя мрак посещением Твоим, Чистая, потребися, многия болезни облегчение невидимо прияша: о сих славлю, благодарю и величаю теплое Твое, Дево, заступление.

Припев: Пресвятая Богородице, спаси нас.

Во смирении сердца песнь благодарственную, Чистая, приношу Ти, верный раб Твой, избавлься стужающих, Всенепорочная, и вопию Ти: радуйся, Прибежище в нуждах сущим, радуйся, Едина человеком Помоще.

Слава: Мрачный хитон стужающия мя болезни совлекла еси, и в светлую здравия одежду паче чаяния облекла еси, темже ныне ликую радостию во храме Твоем, воспевая Твоя, Дево, чудеса.

И ныне: Неусыпным молением мя, хотящаго в смерть уснути, возбудила еси, и тяготам конец посещением Твоим Божественным положила еси, и возвела еси мя из глубины болезни многия: сего ради, Дево, славлю Тя.

 

Песнь 6

Ирмос: Очисти мя, Спасе, многа бо беззакония моя, и из глубины зол возведи, молюся: к Тебе бо возопих, и услыши мя, Боже спасения моего.

Припев: Пресвятая Богородице, спаси нас.

Плач в радость обратила еси молебника Твоего, растерзала бо еси ми вретище, Всенепорочная, озлобления многаго, и здравия веселием препоясала еси.

Припев: Пресвятая Богородице, спаси нас.

Разслаблена яко прежде Сын Твой возстави, Богородительнице Чистая, тако и мене, раба Твоего, от болезни исхитила еси, смерть раждающия: сего ради величаю Тя.

 Слава: Кончину жизни моея помышляюща помиловала еси: и ныне, Дево Чистая, храм Твой святый радуяся обхожду, благодарным языком и сердцем ублажаю Тя.

И ныне: Души моея уклонения исцели, Приснодево, якоже уставила еси лютыя болезни телесныя: яко да отобоюду здравствуяй, хвалу благодарения принесу Ти.

 

Кондaк, глас 6-й

Предстaтельство христиан непостыдное, ходaтайство ко Творцу непреложное, не презри грешных молений глaсы, но предвари, яко Благaя, на помощь нас, верно зовущих Ти: ускори на молитву, и потщися на умоление, предстaтельствующи присно, Богородице, чтущих Тя.

 

Песнь 7

Ирмос: Отроцы еврейстии в пещи попраша пламень дерзновенно и на росу огнь преложиша, вопиюще: благословен еси, Господи Боже, во веки.

Припев: Пресвятая Богородице, спаси нас.

Радуйся, радосте стужаемых и заступление утруждаемых, радуйся, покрове нагих и славо вопиющих: благословен, Пречистая, Плод чрева Твоего.

Припев: Пресвятая Богородице, спаси нас.

Врачевание точиши болящим от длани Твоея, Марие Богородице, от негоже раба Твоего напоила еси, вопиющаго: благословен, Пречистая, Плод чрева Твоего.

Слава: Киими гласы Тя воспою? Киим языком Тя, Дево, величаю? Яко болезни горькия и трудов тягчайших за благоутробие неизреченное избавила еси раба Твоего.

И ныне: Видела еси скорбь мою, Дево, и вняла еси гласу моему и избавила еси лютых моих страстей и болезней, и бед: благодарю Тя, Владычице, надеждо моя известная.

 

Песнь 8

Ирмос: Седмерицею пещь халдейский мучитель Богочестивым неистовно разжже, силою же лучшею спасены сия видев, Творцу и Избавителю вопияше: отроцы благословите, священницы воспойте, людие превозносите во вся веки.

Припев: Пресвятая Богородице, спаси нас.

Болезньми теснимый, огневицею палимый и треволнением лютым волнуемый приступих к Тебе, Владычице Благословенная Пречистая; и яко милостивая не омерзила мя еси отнюд, но спасла еси вопиющаго: священницы благословите, людие превозносите Христа во веки.

Припев: Пресвятая Богородице, спаси нас.

Непрестанными труды мя люте сокрушаема, и отчаянием живота теснима, призрела еси, Непорочная, на мое смирение, и воззвала еси к здравию крепкому вопиющаго от сердца: священницы благословите, людие превозносите Христа во веки.

Слава: На мою призрела еси, Богомати, немощь и за благоутробие паче чаяния спасла еси раба Твоего, Владычице, и веселия исполнила еси, крепости божественныя и радости песнопоющаго: отроцы благословите, священницы воспойте, людие превозносите Христа во веки.

И ныне: Исцеления улучив, Езекия древле в дом Господень скоро притече, Бога Вседержителя благодарити, Владычице: аз же, улучив от Тебе исцеление, к храму Твоему приступих, от души и сердца благодаря Тя, Дево, во вся веки.

 

Песнь 9

Ирмос: Устрашися всяк слух неизреченна Божия снизхождения, яко Вышний волею сниде даже и до плоти, от девическаго чрева быв Человек: темже Тя, Пречистую Богородицу, вернии, величаем.

Припев: Пресвятая Богородице, спаси нас.

Кую Ти хвалу, Благая, по достоянию возслю раб Твой? Зане таковаго мя благодеяния, Чистая, сподобила еси и избавила мя еси страстей, в адовы пропасти мя отсылающих, ходатайством Твоим теплым, Преблагословенная.

Припев: Пресвятая Богородице, спаси нас.

Святое селение Божие, радуйся, едина смертных удобрение, храме Пресвятый Царя и престоле огненный: милосердым Твоим заступлением тяготу облегчила еси болезни моея, и исцеления и жизни сподобила мя еси.

Слава: Приидите, вси братие мои, совозвеселитеся вкупе, величающе Пренепорочную Божию Матерь, источник независтный, от негоже ми ток пресветлый исцеления истече и пламень болезней моих всеконечне погуби.

И ныне: Нескверная Владычице Чистая, сердца моего страсти исцели и будущия мя жизни Божественныя причастника сотвори и бед житейских предстательствы Твоими избави, яко да славлю Тя, заступление верных непостыдное.



[1] Текст канона приводится по изданию: Каноны на каждый день для домашнего чтения. – М.: Изд. Тихомирова М.Ю., 2016. www.pravmolitva.ru

[2] Читается обычно пред иконою «Всех скорбящих Радость».

[3] Читается обычно пред иконою «Скоропослушница».

[4] Читается обычно пред иконою «Целительница».

[5] Читается обычно пред иконою «Целительница».

[6] Творение святителя Иоанна Евхаитского. Текст канона приводится по изданию: Богородичник: Каноны Божией Матери на каждый день. Изд. 4-е, испр. – М.: Православный Свято-Тихоновский гуманитарный университет, 2013, с. 492–499.